 "Tolışi sədo” qəzetinin həbsdə olan redaktoru, hüquq müdafiəçisi Hilal Məmmədovun Hüquqlarını Müdafiə Komitəsi cümə günü iclas keçirib.
Contact.az saytının məlumatına görə, komitənin həmsədri Rafiq Cəlilov H.Məmmədovla bir kamerada saxlanılan məhkumun durumunun və H.Məmmədovun vəziyyətinin narahatlıq doğurduğunu deyib. Belə ki, H.Məmmədovla eyni kamerada saxlanılan məhkum bir tərəfdən kəskin nevroz, digər tərəfdən ürəktutmaları keçirir. Komitə belə sağlıq durumu yaşayan insanın davranışına nəzarəti itirməsi üzündən H.Məmmədova qarşı istənilən addımı ata bilməsindən narahatlıq ifadə edib. Penitensiar Xidmətin nümayəndələri həmin şəxsin H.Məmmədovun olduğu kameradan cümə günü aparılacağını desələr də, bu vədin yerinə yetirilib-yetirilmədiyini bilmirlər.
H.Məmmədovun həbsdə olduğu 5 ay ərzində ailə üzvlərilə görüşünə cəmi bir dəfə icazə verilib, bundan sonra isə görüşlə bağlı müraciətlərə cavab verilməyib.
H.Məmmədovla bağlı istintaq da başa çatıb, müstəntiqlər H.Məmmədovu cinayət işinin materialları ilə tanış edirlər. H.Məmmədov cinayət işini, ona qarşı ittihamları saxta adlandırır. Komitə sədri qeyd edib ki, müstəntiqlər bəzi yerlərdə Talış Mədəniyyət Mərkəzinin mərhum sədri Novruzəli Məmmədova aid ittihamları eynilə H.Məmmədova aid ediblər. Halbuki, H.Məmmədovun elan edilən həmin ittihama heç bir aidiyyatı olmadığı qeyd edilib. İstintaqın H.Məmmədovu "Talışskiy Vestnik” qəzetinin redaktoru kimi təqdim etməsinin əsassız olduğu deyilib. Komitə həmsədri müstəntiqlərə adı çəkilən qəzetin heç olmasza sonuncu səhifəsinə baxaraq, redaktorun kim olmasını öyrənmələri tövsiyəsi verib. "Bu cinayət işi, bu ittihamlar absurddur”, - deyə komitə həmsədri mövqeyini izah edib.
Gozetci.az portalı məlumat verir ki, iclasda komitə üzvləri onu da bildiriblər ki, Pentensiar Xidmət iki gün öncə H.Məmmədovla bir kamerada olan həmin məhkumu başqa kameraya, sonradan isə oradan Pentensiar Xidmət Müalicə Müəssisəsinə köçürmək istəyib. Lakin H.Məmmədov həmin şəxsin durumundakı problemləri nəzərə alaraq iki gün də dözə biləcəyini və həmin məhkumun onun yanından birbaşa Müalicə Müəssisəsinə köçürülməsini istədiyini deyib: "Həmin məhkumun durumu pis olduğu üçün Hilal Məmmədov ona qayğı ilə yanaşaraq ona da baxır və hesab edir ki, həmin məhkum başqa kameraya köçürülsə, baxımsızlıqdan onun səhhətindəki problemlər çoxala bilər. Buna görə də H.Məmmədov deyib ki, iki gün də dözə bilər, amma həmin məhkum birbaşa Müalicə Müəssisəsinə aparılsın", - deyə komitə üzvləri bildiriblər.
Komitə üzvləri qeyd ediblər ki, anlaşmaya görə, bu gün həmin məhkum H.Məmmədovun saxlanıldığı kameradan çıxarılıb, Müalicə Müəssisəsinə aparılmalı idi.
İclasda çıxış edən Hilal Məmmədovun Hüquqlarının Müdafiə Komitəsinin digər həmsədri, Helsinki Vətəndaş Assambleyasının Azərbaycan Milli Komitəsinin rəhbəri Arzu Abdullayeva bildirib ki, bu hadisələrdən sonra onlarda belə bir təsəvvür yaranıb ki, hansısa qüvvələr Bakı İstintaq Təcridxanasındakı proseslərə təsir edir və bu səbəbdən də Pentensiar Xidmət H.Məmmədovla bağlı yaranmış bu vəziyyəti həll edə bilmir. Komitə üzvləri H.Məmmədovun məhkəməsinin açıq keçirilməsini də tələb etdiklərini deyiblər. Komitə üzvü, hüquqşünas Namizəd Səfərov isə komitə üzvlərinə komitənin görəcək hüquqi işlərlə bağlı tövsiyələr verib.
Sonda aldığımız məlumata görə, H.Məmmədovla saxlanılan həmin məhkum hələ də onunla bir kamerada saxlanılır.
H.Məmmədov 2012-ci il iyunun 21-də həbsə alınıb. Ona qarşı dövlətə xəyanət, milli ədavəti qızışdırmaq, narkotik saxlamaq ittihamları irəli sürülüb.
Yerli və beynəlxalq hüquq müdafiə təşkilatları H.Məmmədova qarşı irəli sürülən ittihamları saxta hesab edir (http://gozetci.az).
TALISH.ORG
|
