Möhtərəm ZİYAlılar! İlk öncə hamınızı "Kürdəxanı” təcridxanasndan salamlayır və zülmətə qarşı yönəldilmiş mübarizə əzminizdən xeyli şövqləndiyimi nəzərinizə çatdırmaq istəyirəm.
Müqəddəs Qurani-Kərimdə bildirildiyi kimi, "o kəslər ki, HAQQ sözü (öyüd-nəsihəti) eşidib, ən yaxşısına uyarlar, onlar Allahın doğru yola yönəltdiyi insanlardır. (Məhz) dərindən düşünən ağıl sahibləri də onlardır” (39:18).
Əziz ZİYA (NUR) əhli! Bu gün, Xalqın düşünən beyni və real elitası olaraq, ölkəmizin və xalqımızın azad və xoşbəxt gələcəyi naminə mübarizənin əsas məsuliyyəti bilavasitə Sizin çiyinlərinizdədir. Artıq heç birinizə sirr deyildir ki, ölkəmiz xeyli xoşagəlməz siyasi proseslərin astanasındadır. Məhz belə çətin günlərdə qarşınızda duracaq ən mühüm vəzifə də - bütün imkan və vasitələrinizlə cəmiyyətə öz mövcud xeyirxah – sülhsevər mövqeyinizlə təsir etmək MİSSİYANIZİ davam etdirmək olacaqdır. Belə ki, xalqın ELİTASI onun önündə getməyə və öz ZİYAsı ilə xalqı xilas etməyə borcludur!
Bu günlərdə, görkəmli alim, prof. Rafiq Əliyevin "Bizim Yol” qəzetində xalqın jurnalisti Natiq Cavadlıya verdiyi müsahibəni oxuyub, bir il öncə saytlarda yayımlanan "Baki Biznes Universitetini tərk etməyimlə bağlı olaraq tələbə və gənclər qarşısında bəzi açıqlamalar və tövsiyələr” adlı məqaləmdəki bəzi analoji fikir və mülahizələri xatırladım. Həmin yazımda mən də prof. Rafiq Əliyevin analoji fikriylə tam şərik olduğumu bildirmişdim ki, elm və təhsilin bərbad olduğu və azad inkişafı üçün heç bir sağlam mühitin olmadığı cəmiyyətdə yetişən gənclər mahiyyətcə Amerikanın istehsalında olan robot əsgərlərindən fərqlənmirlər. Yeri gəlmişkən, həbsim zamanı fleş-kartımda olan həmin məqaləmi də qondarma "cinayət” işinə daxil edərək, "dövlət hakimiyyəti əleyhinə” olan yazı kimi qiymətləndirmişlər. Həmin məqaləmdəki "cinayətim” – gənclərə müraciətim, onların "pultla deyil, vicdanlarının səsiylə, azad şəkildə hərəkət edib, yüksək savada yiyələnməklə yanaşı, həm də hər yerdə öz hüquqlarına sahib çıxmaq” kimi çağırışım olmuşdur.
Bütün bunlara baxmayaraq, bu günkü gənclərimizin sağlam inkişafında Ziyalılar Forumnun çiyinlərinə düşən məsuliyyət də az deyildir. Odur ki, növbəti tövsiyyəm budur: tələbə və gənclərin elmi, mədəni, dini, əxlaqi, təhsil və i.a. tərəqqisi və maarifləndirməsi naminə, mütəmadi olaraq, məsələn, həftədə ən azı bir dəfə olaraq müxtəlif mövzularda seminarlar keçirmək və orada Zialılar Forumunun nümayəndələrinin mühazirələri və ya görüşləri təşkil olunmalıdır.
Məhz belə tədbirlərin mütəmadi olaraq keçirilməsi həm ziyalılarımızın özlərinə, həm də dinləyicilərinə faydalı olaraq, gənclərimizin "robotlaşma” prosesinin qarşısını almaqda ilk və mühüm canlı(!) addım olacaqdır... Başqa sözlə desək, bu seminarlar insanların canlı tövsiyələri və düşüncələri naminə xeyli savab və xeyirxah iş olardı...
Bu müqəddəs yolda hər birinizə uğurlar diləyirəm. Fürsət ikən, mənim və digər siyasi məhbusların müdafiəsində göstərdiyiniz mənəvi dəstəyə görə hamınıza təşəkkür edir və hər biriniz üçün Allahdan min-bir xeyir-dua diləyirik...
Hamınıza hörmətlə,
Hilal Məmmədov,
fizika-riyaziyyat elmləri namizədi, dosent,
İsaxan Aşurov adına mükafatın laureatı
