Azərbaycan Respublikası Məhkəmə-hüquq Şurasının sədri Fikrət Məmmədov cənablarına
Surəti: Azərbaycan Respublikası Ali Məhkəməsinin sədri Ramiz Rizayev cənablarına
Surəti: Bakı Ağır Cinayətlər Məhkəməsinin sədri Mahmud Nəbiyev cənablarına
Surəti: Bakı Ağır Cinayətlər Məhkəməsinin hakimi Azər Orucov cənablarına
Möhtərəm sədr,
İlk öncə, nəzərinizə çatdırmaq istəyirəm ki, barəmdə Bakı Ağır Cinayətlər Məhkəməsində 3 aydan artıq müddət ərzində davam etməkdə olan qapalı məhkəmə iclaslarında Bakı Ağır Cinayətlər Məhkəməsinin hakimi Azər Orucov tərəfindən Azərbaycan Respublikası (AR) Konstitusiyasında və AR CPM-nin müvafiq (91.5.16.; 91.5.18.; 91.5.32.; 91.5.38.; 91.7. və digər) maddələrində təsbit olunan mənim müdafiə hüquqlarım ən kobud şəkildə pozulmaqdadır. Hakim Azər Orucov tərəfindən qapalı məhkəmə prosesində mənə və vəkillərimə qarşı açıq-aşkar qərəzli mövqeyin nümayiş etdirilməsi, onun adi etik qaydalarına əməl etməməsi, məhkəmə iclas protokoluna əsassız, yalan və uydurma ifadələrin daxil edilməsində xüsusi maraq göstərməsi, onları təkzib edən real arqument və subutlara isə etinasız yanaşması, vəsadətlərimin mütləq əksəriyyətini qəbul etməməsi, məhkəmə çəkişmə prinspindən aydın şəkildə imtina etməsi, özünü ittiham tərəfi kimi aparması bir daha həbsimin sifarişli olduğunu və istintaq orqanları kimi, hakim Azər Orucovun da bu cinayətin icraçısına çevrildiyini aydın ifadə edir.
Hakim Azər Orucovun son iclaslarda mənə qarşı hədsiz aqressivliyi daha da artmışdır. Bunun da əsas səbəbi məhz mənə qarşı AR CM 274 və 288.2.2 maddələriylə irəli sürülən ağır ittihamların saxta və cəfəngiyyat olmasının tam aşkarlığı ilə ortaya çıxmasıdır. Hakim Azər Orucov CM-nin 274-cü (dövlətə xəyanət) maddəsiylə mənə elan edilmiş ittihamı, üzünü yalnız bir dəfə rəhmətlik prof. Novruzəli Məmmədovun məhkəməsində şahid qismində dindirildiyim zaman gördüyüm, 1973-cü ildən KGB-MTN agent-provokatoru kimi yüzlərlə digər sifarişli oyunlarında istifadə edilən Elman Quliyev adlı şəxsin uydurmalarıyla əsaslandırmağa cəhd edir, CM-nin 283.2.2 maddəsilə elan edilmiş ittihamı isə saxta və yalan və heç bir dəlilə söykənməyən ekspert rəylərilə düzüb qoşmaq istəyir.
Beləliklə, qanunsuz həbsim və həbsdə saxlandığımın məsuliyyətini dərk etməkdə olan istintaq-məhkəmə orqanları bu cinayətlərini hakim Azər Orucovun əliylə nəyin bahasına olursa-olsun ört-basdır etməyə cəhd göstərirlər. Məhz məhkəmənin qapalı keçirilməsinin əsas sirrləri də onların bu cinayətlərini cəmiyyətdən gizlətmək istəyidir.
Ciblərimə nümayişkarənə şəkildə narkotika atdırıb məni həbs etdirənlər, mənə məxsus, yalnız pedaqoji və elmi işimlə bağlı yazılardan ibarət olan fleş-kartıma da müdaxilə edərək, ora "Talış xalqına müraciət” adli saxta bir sənədi də daxil etməkdən çəkinməmişlər. Bu saxtakarlığın ən paradoksal cəhəti isə budur ki, bir yandan mən Elman Quliyev kimi təxribatçının uydurma ifadələriylə İrana casusluq etməkdə ittiham edilir, digər tərəfdən isə, yuxarıda adı çəkilən mətnə istinadən güya mən Azərbaycan və İran talışlarına müraciət edərək, onlara "vahid dövlət şəklində birləşərək, hər iki dövlətin əsarətindən azad olmaq” çağırışı ilə müraciət etmişəm.
Məlumdur ki, müasir kompüter texnologiyaları informasiya daşıyıcılarına daxil edilmiş məlumatların texniki bazasını, o cümlədən informasiyanın texniki daşıcıya daxil edilmə tarixlərini ortaya çıxarmağa imkan verir. Lakin hakim Azər Orucov həmin müraciətin həbs zamanı üstümdən götürülən flaş-karta məhz mənim həbs tarixindən sonra daxil edilməsilə bağlı texniki ekspertizanın aparılması haqqında vəsatətləri təmin etmək və bu barədəki tələblərimizi qəbul etmək istəmir.
Qətiyyən şübhə yoxdur ki, mənə qarşı CM-nin 234.4.3. maddəsiylə sürülən saxta və əsassız ittiham da ifşa ilə nəticələnəcəkdir.
Möhtərəm sədr,
Sizdən xaiş edirəm ki, yuxarıdakıları nəzərə alıb, vəzifə səlahiyyətlərindən sui-istifadə edərək məni nümayişanə surətdə şərləməklə barəmdə törədilən cinayəti ört-basdır etməyə cəhd edən, CPM-nin 91-ci maddəsiylə nəzərdə tutulan hüquqlarımı kobud şəkildə pozan, qapalı məhkəmə prosesində mənə və vəkillərimə qarşı açıq-aşkar qərəzli mövqe nümayiş etdirən, adi etik qaydalarına əməl etməyən, məhkəmə iclas protokoluna əsassız, yalan və uydurma ifadələrin daxil edilməsində xüsusi maraq göstərən, onları təkzib edən real arqument və subutlara etinasız yanaşan, vəsadətlərimin mütləq əksəriyyətini qəbul etməyən, məhkəmə çəkişmə prinspindən aydın şəkildə imtina edən, özünü ittiham tərəfi kimi aparan hakim Azər Orucov barədə müvafiq tədbir görəsiniz.
Hörmətlə,
Hilal Məmmədov
22 Aprel 2013-cu il
