 HİDAYƏTİ Elmas - 50
Təmom bedə çəmə tolışə şair Elmasi 50 sin. Fərzullayev Elmas Hidayəti zoə çı moədə bıə 1961-nə sorədə. 1978-nə sori oroxnıyəşe Masallu rayoni Bədəloni miyonə məktəb, çəyo 1989-nə sori Boku Sənaye Pedaqoji Texnikum. 1970-nə soriku bə tırki, bə tolışi nıvıştedə. Çap bedə çəy şeron, miniaturon, elmiyə-publisistikə məqaləon devri mətbuatədə. 21 sor ko kardəşe Boku şəhərədə Binoon Dutə İdarədə çan vəzifonədə. Esə çan sore miəlliməti kardedə 137 numrəynə Masallu Peşə məktəbo. Elmasi tojə nıvıştə şeron edaştedəm bə xosə bahandon.
OME PEMANDE BƏ KƏ…
Ome pemande bə kə qıləy Dəvuş pirani:
Votem: Həx pidə, mamu? Hiçki həxış pidəni.
Kiy ki ıştə həxış sə, bəyku bıstən, biçarə,
Dast oməkə bo həxi, bıjən bəsə kaftorə.
Kiy ki həxi nəvedə, peydoş kardə turmədə.
Nohəx paqon novnedə, hınə heste sə pedə..
Azən curi Dəvuşim, çəmə dılon i cure,
Mınən bətı dast okəm? Məhol bəmə bəsıre!
Xəbə səydəm ıştıku: çiçı kardə dınyoədə?
-Orzunom dıldə mandin, həni dılım sə bedə!
Sə bəyji bim, jəşone, hiç rəhmışon nıkarde,
Az ve nəvem bo həxi, hiç fəhmışon nıkarde.
Dandon ru bin, sə sipi, bı cıvonə sinədə.
Kaxt de puli kərt jəydə, çımı çəşon tinədə.
Bə təvil nıvıştə bə: əğə nim , həxi nokəm,
Bə həxi hardəkəsi məcburim, az dast okəm..
-Fikir məkə saqlə tı, iqlə ğarzi ədəni,
Cəfo mədə anədə bəştə coni, bədəni!
Dınyoku taxsi məvind, kiy ki zumande- hardə.
Bı dınyoədə hardəkəs bə dınyoədən kef kardə!
JIQO OMƏ, JIQƏN BƏŞE
Dınyo kanə, əmə tojə,
Parçinədə hışkə pojə.
Ha ruj bəmə "Ələm kujə?”
Kiy bə çiki yod dəbəşe?
Jıqo omə, jıqən bəşe!
Im quzəron dardı-bəlo,
Bılbıl koncoy, handedə lo.
İqlə mardə, daqlə məlo!
Hay boştəno həx pidəşe,
Jıqo omə, jıqən bəşe!
Kiy zumande, nun hardedə,
Zirəkə zoə pul vardedə.
Lut kədə vəşyi mardedə.
Çe kon çıkı sə bebəşe?
Jıqo omə, jıqən bəşe!
Dılım kitob, mijəm ğələm,
İ poəm şoye, i poəm ələm.
Çəşi ruşnəm i qit baləm
Əbəlfəzi daste, kəşe...
Jıqo omə, jıqən bəşe!
Elmasi bıkışt dard-ğəme.
Damə məkən əy, bəbəme.
Deşmenış ve, dustış kame.
Mardon tıbə əy bə çəşe,
Jıqo omə, jıqən bəşe!..
AZ HAKANƏ
Az hakanə mardem pidə:
Noxəşəti qədə-qədə
Çımı xuni didə, didə.
Bədə xəbəy, maştə bəbe,
Şələm ijən peşdə bəbe.
Kışdə mıni im ruziqor,
Şeyton zumand, İblis niqor.
Fikir kardəm bıbum bior...
Fəqət umur, ruj sə bedə,
Larzi qətəm, dıl dəbidə...
JƏQOY , BIVƏ, JƏQOY HESTE
Həmməy votdən: Elmas noxəş;
Bıbaxş, bıvə, mıni bıbaxş,
Qırdo kəno dəyus, oğrəş...
İqlə Xıdo demı duste,
Jəqoy, bıvə, jəqoy heste.
Im mərəzi çəşış dəğıl,
Dəhətdəni bımi ağıl,
Qordonedə mıni əğıl...
Conım qıləy astə- puste,
Jəqoy, bıvə, jəqoy heste.
Ve şıt babay ım xoməti,
Damə kardən de mınnəti,
Mıni ğandən çe hurməti.
Dılım votdə: Zınəm roste.
Jəqoy, bıvə, jəqoy heste.
AZ DE XIDO DƏVOM HESTE?
Vey kəs votdə: dınyo nəğıl,
Əv siprişe, əmə əğıl.
Im sıxanon bomı nəğıl,
Rujım heste, şəvım heste,
Az de Xıdo dəvom heste??
Im ostovo, əvən Ovşum,
Həşi sipyə pəsi avşum.
Dıli votəy məsdə quşım,
Ovım hıste, həvom heste,
Az de Xıdo dəvom heste??
Çımı çəşdə dınyo poke,
Vey çiy oşko, vey çiy çoke.
Çımı bədən tuldəy, xoke,
Quşım heste, qəvım heste,
Az de Xıdo dəvom heste??
ÇIMI İNƏ "HALAY”ƏDƏ DƏP JƏYDƏ
"Əmon, nənə, zolım nənə, yo nənə”,
Əğıləti tı bə çımı yod dənə.
Ə rujon ki, "Otəş dənə, tən-tənə”
Im xatiron zinəniku qəp jəydə,
Çımı nənə "Halay”ədə dəp jəydə...
Konco mande "Tomon mahast, bıqard boy”?
Şin ə rujon, mamand həni, oqard boy,
Bıməs məni: Lik, Hardəbil, Nəmin, Xoy...
Bılbıl məsdə ım handəyon səf jəydə,
Çımı nənə "Halay”ədə dəp jəydə...
TOLIŞƏ BAND, TI ÇİKİŞ?
Az detı zumandim, tı çımı peştiş,
Az ıştı fərzəndim, çanə ki hestiş!
Xətayi vətəniş, Boboki dustiş!
Ha ruj maştə seyr kardedəm az tıni,
Tolışə band, çımı nomiş, çımı niş?
Pındə vişon bəştı ranqi ranq dodə,
Qamo, honi... bılbıl vində handedə,
Avlodonı bə conbozon mandedə,
Elmas ğıbon bəştə yurdi, vətəni,
Tolışə band, çımı nomiş, çımı niş?
Bıvğand: Allahverdi BAYRAMİ
|
