Azərbaycan tarixində bir separatizm olub – o da erməni separatizmi
Bir neçə gün öncə "Youtube” internet resursunda "Talış-Muğan Muxtar Respublikası”nın təsis yığıncağından videoçəkiliş yerləşdirilib. Görüntülərdə diqqət çəkən əsas məqam bu gün siyasi məhbus kimi tanınan Hilal Məmmədovun rəyasət heyətində əyləşməsidir. Müsavat başqanının müşaviri Yadigar Sadıqov Hilal Məmmədovun hüquqlarının müdafiəsi istiqamətində kifayət qədər fəallıq göstərən şəxslərdəndir. Qaynar.info olaraq onun bu məsələyə münasibətini öyrəndik.
- Hilal Məmmədovun "TMMR”-in təsisində iştirakı əvvəlcədən hamının bildiyi işdir. Hakimiyyət orqanlarının da əlində bu haqda istər agentura məlumatları, istərsə də videoçəkilişlər kifayət qədər olub. Bu səbəbdən Hilal Məmmədov 13 il mühacirət həyatı yaşayıb və 2005-ci ildə Azərbaycana qayıdıb. Lakin indiyə qədər ona "TMMR”-lə bağlı ittiham irəli sürülməyib. İndiki cinayət işinin də 1993-cü il hadisələri ilə əlaqəsi yoxdur.
- Müsavat Partiyasının o hadisələrə münasibəti necədir?
- Müsavat Partiyası o zaman hadisələrə ilk qiymət verən partiya olub. Bir çoxları partiyanın başqanı İsa Qəmbərin parlamentdə Lənkəranda baş verən hadisələr məsələsini qaldırmağa çalışmasını xatırlayırlar. Lakin parlamentin o vaxtkı sədri H.Əliyev buna imkan vermədi və başqanı təxribatçılıqda günahlandırdı. 1993-cü il avqustun 23-də Lənkəranda "TMMR”-ə qarşı baş vermiş və onun devrilməsi ilə nəticələnmiş vətəndaş etirazları nəticəsində 3 nəfər həlak oldu ki, onlardan biri də Müsavat Partiyası Lənkəran təşkilatının sədr müavini Etibar Əliyev idi.
- O zaman sizinlə əks mövqedə olmuş Hilal Məmmədovu bu gün müdafiə etmək nə qədər düzgün mövqedir?
- Müsavat Partiyası təkcə həmfikir olduqlarının hüquqlarını müdafiə eləmir. Bizim üçün insan hüquqları mövcuddur və insanların bizim dostumuz, həmfikirimiz olması vacib deyil. Hilal Məmmədovun cibinə, evinə narkotik atıb tutdular. Müsavat Partiyası tamamilə düzgün mövqe tutub.
- Belə demək mümkündürmü ki, Müsavat Partiyası separatçını müdafiə edir? Bəlkə də, sizə qarşı belə ittihamlar səslənə bilər...
- Bu, mümkün deyil. Əvvəla, insanın 20 il öncə tutduğu mövqe o demək deyil ki, indi də həmin mövqedədir. İkincisi, yayılan videoçəkilişin müsbət məqamı ondan ibarətdir ki, müstəqil dövlət yaradılmasından söhbət getmədiyi aydın olur. Mövcud hakimiyyət Qarabağ ermənilərinə ən yüksək muxtariyyət vəd edir. Belə çıxır ki, separatizmə rəvac verirlər? Və nəhayət, o zaman baş verən hadisələri mən daha çox hakimiyyət mübarizəsinin təzahürü hesab edirəm, nəinki milli məsələ.
Ümumiyyətlə, 20-25 il öncəki tariximiz o qədər mürəkkəb prosseslərlə müşaiyət olunub ki, hər kəsə qarşı ittihamlarla çıxış etmək üçün kifayət qədər əsaslar var. Lakin bunlara aludə olmaq gələcəyimizi düşünməyə mane olur. Hakimiyyətin istədiyi də zatən budur: cəmiyyətin müxtəlif təbəqələri arasında şübhə toxumları səpmək, təəssüf doğuracaq hadisələri qabartmaqla qarşılıqlı ittihamlara rəvac vermək və birliyi pozmaq. Azərbaycan tarixində bir separatizm olub – o da erməni separatizmi. Milli-azadlıq hərəkatı və Qarabağ müharibəsi zamanı Azərbaycanın müxtəlif xalqlarının çiyin-çiyinə mübarizəsi bizim qürur tariximizdir. Mən xalqlarımıza inanıram və onların türklərdən heç də az azərbaycançı olmadıqlarına əminəm.
İlkin PİRƏLİ
Qaynar.info
