 Yaxud, 71 saylı Masallı Kənd Seçki DaIrəsinin sabiq sədri Nağıyev Hacırıza İbrahim oğlu müqəddəs Məkkə ziyarətindən qayıdıb, cümə günü tutduğu vəzifəsindən vidalaşmasının səbəbi nə oldu?
Masallı rayonunun Dəmirçi kənd Əsas Təhsil məktəbinin Ali təhsilli ibtidai sinif müəllimi Asif Abbasov qələminin "qəhrəman” obrazı olan Nağıyev qardaşlarının rayonda, həm də yaşadıqları Bədəlan kəndində uzun illər at oynadıb, meydan sulamaları hamını bezdirmişdi.
Qardaşlardan biri 71 saylı Masallı kənd seçki dairəsinin sədri Hacırıza Nağıyev, digəri Bədəlan kənd ərazi nümayəndəsi Mərdan Nağıyev olmaqla uzun illər idi ki, kənd əhalisinə "qan uddururdular”.
Bu qardaşlar həmin dairədən deputat olan Elmira Axundovaya arxalanaraq, seçki saxtakarlığı, əhalinin paybəlli torpaqlarında qanunsuz olaraq fərdi evlərin tikilməsinə və bir çox özbaşınaçılıqlara imza atıblar.
"Qəhrəman” qardaşların seçki saxtakarlığına, eləcə də kənd torpaqlarının qanunsuz olaraq satmalarına etiraz edən Asif Abbasov və sabiq kənd bələdiyyə sədri Miriş Ağayev 2008-ci ildə rayonun "Əsrin üzəduranları”nın bir neçəsinin "əməyi” sayəsində cinayət məsuliyyətinə cəlb edilmişdilər. Həmin vaxtlar bu haqsızlıqlar barədə "Cənub Xəbərləri” qəzetində silsilə yazılar da yazmışdıq.
Nəticədə Asif müəllim bir il altı ay azadlıqdan məhrum edildi, bələdiyyə sədri Miriş Ağayev isə bir il şərti-icbari cəza aldı.
Asif müəllim bir il cəza çəkəndən sonra, vaxtından əvvəl müsbət xasiyyətnamə ilə azadlığa buraxıldı….
Məsələnin digər tərəfi də budur ki, sabiq İHB-sı Qəzənfər Ağayev Kolatan kənd camaatından "həzm” etdiyi, təxminən 280 min ABŞ-dollar məbləğində təbii qaz çəkilişi üçün verilən pulu ört-bastır etmək məqsədi ilə qonşu Astara rayonuna eyni vəzifəyə transfer edilməsini yəqin ki, hamı xatırlayır.
Ğəzi müəllimin bu qanunsuz əməlini ört-bastır etmək məqsədi ilə, "təp-təzə” gələn İHB-sı Rafil Hüseynov ilk görüşünü də Kolatanla başladı. Tez bir zamanda Kolatan kənd həkim ambulatoriyasını kosmetik təmir etdirəndən sonra təm-təraqlı şəkildə "lentkəsmə” əməliyyatında MM-in deputatı Elmira Axundova da iştirak etdi. Xanım deputat camaat qarşısındakı çıxışında sabiq İHB-sı Q.Ağayevin qanunsuz əməlini dilə gətirib, hətta bu kəndə ögey münasibətin olduğunu da dilə gətirdi. Bir neçə ay keçəndən sonra Elmira xanım MM-dəki çıxışlarının birində Rafil müəllimin "bostanına” daş ataraq, demişdi ki, bəzi İHB-rı lazımsız olaraq, "hasarlar çəkir, yeni təmir edilmiş binaları sökür, təzədən tikdirir” və s..
Gözünə döndüyüm Rafil müəllim də nə qədər olmaya köhnə komsomoldan "süd əmdiyindən”, Masallıda əsas dayağı olan 71-saylı DSM-nin sədri Hacırıza Nağıyevi bir zərbə ilə "nakaut” edib, tutduğu vəzifəsindən kənarlaşdırdı. Maraqlı məqam bu oldu ki, 08 noyabr 2012-ci il tarixdə "haram pulla” Hacırıza Nağıyev Məkkə ziyarətinə gedib, qayıtdıqdan bir həftə sonra, cümə günü, 20 dekabr 2012-ci il tarixdə tutduğu vəzifəsi ilə tez vidalaşması sanki Allahın hökmüimiş...
Digər maraqlı məsələlərdən biri də bu idi ki, Asif müəllim bu qardaşların saxta diplomla işləmələri barədə respublikanın bütün Dövlət orqanlarına, eləcə də KİV- nə nə qədər yazıb şikayət etsə də, son vaxta qədər nəticəsi olmamışdır.
Hal-hazırda ikinci qardaş Nağıyev Mərdan saxta diplomla Bədəlan kənd ərazi nümayəndəsi vəzifəsində qalması barədə söz-söhbətlər də səngimək bilmir.
Mətləb Dadaşov
AJB-nin üzvü,
Masallı rayonu,
02 yanvar 2013-cü il
|
