Eldəniz Quliyev: "Yalanı həqiqət kimi təqdim etmək heç kimə başucalığı gətirmir”
Milli Şuranın, onun Koordinasiya Şurasının üzvü olan professor Hacıbaba Əzimovun "Yeni Müsavat”a dedikləri qurumun digər üzvləri Eldəniz Quliyev və Mehdibəy Səfərovun reaksiyasına səbəb olub. Bu barədə demokratiya.org saytı məlumat yayıb.
Mehdibəy Səfərov adı çəkilən sayta bildirib ki, onlara qarşı böhtan kompaniyasını Hacıbaba Əzimov başlayıb. "O, "Teleqraf” qəzetində ikimizin də adını çəkib. Hətta mən o vaxt Hacıbabaya dedim ki, səni məhkəməyə verəcəyəm. Məqalə yazdım ki, ayıbdır, qoca kişisən, fakt gətirmədən məni hansısa dövlətin agenti elan edirsənsə, bu, çox ağır ittihamdır. Gərək bunu sübut edəsən. Edə bilməsən, Azərbaycan Cinayət Məcəlləsi ilə mənə qəsdən şər atmağa görə cinayət məsuliyyəti daşıyırsan. Ola bilsin ki, biz Hacıbaba ilə həqiqətən məhkəmədə görüşdük, çünki Hacıbaba öz yolundan çıxıb. Ya kimsə onu öyrədir, ya xarici və yaxud daxili orqanın tapşırığı ilə hərəkət edir. Belə çıxır ki, o, xalqlar arasındakı münasibət kimi incə məsələ ilə bağlı tapşırıq alıb".
M.Səfərov qeyd edib ki, H.Əzimovla bir qurumda təmsil olunduğuna görə xəcalət çəkir: "Hacıbaba mənim ideyalarımın tamamilə əleyhinə olan bir adamdır. Mən ölkədə birləşdirici bir vətəndaş cəmiyyətinin, azad, demokratik cəmiyyətin tərəfdarıyam. O isə diktaturanın, monoetnik bir rejimin tərəfdarıdır. Ona görə də biz yəqin ki, gec-tez bu məsələyə qayıdacağıq. Ancaq bu gün mən Hacıbabaya görə Milli Şuradan çıxmağı düzgün saymıram. Mən hər zaman praqmatik addımlar atıram, heç vaxt emosiyalara üstünlük vermirəm”.
Eldəniz Quliyev də H.Əzimovun fikirlərinə kəskin reaksiya verdi: "Sözün doğrusu, mən Hacıbaba Əzimovun bu məsələdə canfəşanlıq etməyinə təəccüb qalmışam. Əvvəla, nə onun yaşına, nə statusuna yaraşar. Bu adam yalanı bayraq edib. Yalanı həqiqət kimi təqdim etmək heç kimə başucalığı gətirmir, o cümlədən Hacıbaba Əzimova. Yalanların birini sizə deyim. Deyir mən birinci başlamıram, cavab verirəm. Ancaq heç kimin onunla işinin olmayan vaxtı ”Teleqraf" qəzetinə çox böyük müsahibə verdi və orda Talış Birliyini, eləcə də Mehdibəy Səfərovu və məni sözün əsl mənasında təhqir etdi və sonra da cavabını aldı. Ondan sonra vəziyyət sakitləşdi. Ancaq yenə də zaman-zaman bu barədə orda-burda, eləcə də Milli Şura çərçivəsində danışmağa başladı ki, bu qurumda xarici kəşfiyyata işləyən adamlar var. Mən də dedim biz hamımız maraqlıyıq ki, Milli Şurada xarici kəşfiyyata işləyən adam olmasın. Bu isə tələb edir ki, ortaya fakt qoyasan. Amma çox təəssüf ki, Hacıbabanın bir dənə pis xasiyyəti var ki, o, neçə illərdir müxalifətin içərisində fəaliyyət əvəzinə şəkil çəkdirməklə məşğuldur. Fikir vermişəm, harda olsa, qabaqda oturur, fotoqraflar gələn kimi özünü düzəldir ki, hamı mənə baxsın, hamı məni görsün".
E.Quliyev H.Əzimovun digər ittihamlarından da bəhs etdi: "Deyir mən El-in kvotası ilə Milli Şuraya seçilmişəm. Sən bilirsən ki, Milli Şuranın yaranmasında mənim əhəmiyyətli rolum olub, mən El-in kvotası ilə yox, qurumu yaradan şəxslərdən biri kimi orda təmsil olunuram. Eləcə də Azəri-Talış Birliyinin sədri Mehdibəy Səfərovu ittiham edib. Hansı ki, Mehdibəy Səfərov neçə-neçə məqaləsində, müsahibəsində qeyd edib ki, biz Azərbaycanda bərabər hüquqlu vətəndaşların yaşamasını istəyirik. Hacıbaba Əzimov isə deyir ki, bu adam separatçılıq edir. Bu mövqe separatçılıqdırsa, onda separatçının ən yekəsi mənəm”
E.Quliyevdən bu məsələlərin Milli Şura daxilində çözülməsinin mümkün olub-olmadığını da soruşduq. Cavabında bildirdi ki, H.Əzimov ağsaqqal olsa da, Milli Şuranın Koordinasiya Şurası yarandığı gün özünü aparmasında, həm də sonradan verdiyi müsahibələrində fərqli mövqe sərgiləyib: "Nə dərəcədə sağlam məntiqə uyğundur ki, Milli Şuranın böhran vəziyyətindən çıxan bir anında, Koordinasiya Şurası yarandığı zaman və gələcək fəaliyyət planları təşkil olunan gün MTN ora dəvət olunur?”
TALISH.ORG
