Həmişə demişəm bir daha təkrarlayıram, istər şiə olsun, istər sünnü, istərsə də lap elnurizm təriqəti, fərq etməz, müsəlman problemlərə məntiq və biliklə deyil, emossiya və duyğularla yanaşdıqca başı dərddə olacaq.
Səudiyyə hakimiyyəti ayətullah Nimri etdam etdiyi haqqında rəsmi məlumat yayıb. Diqqət edin, rəsmi məlumata görə Nimr qətlə yetirilməyib, hansısa bir narkomanın, alkaşın, cinayətkarın, terrorçunun qurbanı olmayıb, onkoloji xəstəlikdən, ürək çatışmamazlığından və başqa xəstəlikdən ölməyib, hansısa bir qəzada dünyasını itirməyib. Ayətullah, məhkəmənin, dövlətin adından çıxartdığı hökm əsasında, protokolların tərtibatı ilə müşayət olunan, dövlətin rəsmi cəlladları tərəfindən edam hökmünün icrası nəticəsindən öldürülüb – EDAM edilib. Yəni, heç kim deyə bilməz ki, səud Kralı Yeni İl gecəsində İtaliyadan sifarişlə gələn model qızlarla möhkəm vurmuşdu, sərxoş vəziyyətdə belə bir məlumat yaydırıb.
Azərbaycanda mənim də aid olduğum şiə kontinqentinin əksər təmsilçiləri, media və sosial şəbəkələrdə bu edamla bağlı səud rejiminə qarşı EMOSSİONAL lənətlərini əsirgəmirlər. Allah onların dillərinə və özlərinə qüvvət, mənə də bir iki milyon dollar versin.
Ayətullah Nimr haqqında təfsilatlı məlumatım yoxdur, ancaq, ötən il youtube-də bircə çıxışını titerlə izlədim, daha deyə bilmərəm ərəb dilindən rus dilinə nə dərəcədə uğurlu tərcümə olunmuşdu, söhbətin məğzi təxminən bundan ibarət idi ki, səud rejimi Ayətullahı İrana cəsusluqda ittiham edir, ağaye Nimr bu ittihamı rədd edirdi və bildirirdi ki, O, sadəcə haqqı tələb edir. İnsaf naminə deyim ki, Ayətullah həmin çıxışında məntiqli bir fikir də söyləyərək qeyd edir ki, əgər səud rejiminin İranla problemi varsa buyursun ordusunu yeritsin İrana, onun və ailəsinin üstünə yox. Onu da qeyd edim ki, ayətullah Nimrin konkret olaraq ərəb – İsrail münaqişəsinə münasibətinin necə olduğu mənə məlum deyil.
Bütün bunları nə üçün yazıram ?
Deməli, İrandakı Ayətullah rejimi və Azərbaycandakı bir çox şiələr gecə gündüz İsraili ərəblərin torpaqlarını işğal etməkdə, ərəbləri məhv etməkdə ittiham edir. Daha onlar üçün maraqlı deyil ki, ən qədim xalqlardan biri olan, tək Allahlığı bəyan edən, İbrahim Peyğəmbərin övladları olan, yəhudilərin öz tarixi vətəninə, vəd olunmuş torpaqlarına dönmək haqqı var. Ən əsası, ən önəmlisi, onlar üçün maraqlı deyil ki, yəhudilər, hər cür təbbi çətinliyə, dörd bir tərəfi amansız düşməninlə mühasirədə olmasına baxmayaraq bütün Yaxın Şərqdə qısa bir müddətdə bu günə qədər yeganə mütərəqqi dövləti və cəmiyyəti qurmağa və QORUMAĞA nail olublar. Hansı ki, 22 ərəb ölkələrinin heç birində, bəzilərinin isə, elə həmin o Səudiyyə Ərəbistanı kimi neftlə zəng olan ərəb ölkələrində belə, daha iri ərazilərə baxmayaraq, ərəblər bir mütərəqqi dövlət qurmağa nail olmayıblar. Ancaq bunları qoyuram bir kənara və keçirəm məni maraqlandıran, düşündürən, bəzi suallara:
Əgər Səud Krallığı müsəlman hakimiyyətidirsə, onda nə üçün bir müsəlman hakimiyyətinin kimisə (ayətullah belə olsa) edam (bir daha təkrar edirəm qətl və edam hüquqa görə ayrı ayrı anlayışlardır) etməsi, həmin hakimiyyəti lənət obyektinə çevirir ?
Yox, əgər səud rejimi müsəlman deyilsə, onda hansı haqla Məkkə və Mədinə üzərində sərəncam vermək səlahiyyətinə və real olaraq hakimiyyətinə sahibdir ?
Əgər hesab edilirsə ki, səud rejimi lap elə Britaniya Krallığının dəstəyilə Məkkə və Mədinəni zəbt edib, orda haqqı olmayan hakimiyyətini qurub, onda sual yaranımırmı ki, hansı məntiqlə Ayətullah rejimi və Azərbaycan şiələri (bəziləri istisna olmaqla) Məkkə və Mədinəni kənarda qoyub, Yərusəlimin (Qüds) İsrail tərəfindən işğalından danışır ? Özü də İran hakimiyyəti yalnız danışmaqla İsrailə qarşı düşmənçiliyini məhdudlaşdırmır, rəsmi dövlət səviyyəsində Həmasa və Hizbullaha hər cür, o cümlədən siyasi, iqtisadi və hətta hərbi dəstək verir, verdiyi dəstəyi açıq mətnlə dövlət səviyyəsində bəyan edir.
Bəlkə, Ayətullah rejimi və onların siyasi baxışlarının bölüşən şiələr hesab edir ki, Məkkə və Mədinə müqədəssliyinə görə birinci deyil, Yərusəlimdən öncə deyil ? Vəyaxud, Yərusəlim də Məkkə və Mədinə qədər, tamamilə bərabər şəkildə müqəddəsdir və müqəddəs yerləri azad etmək üçün Səudiyyədən deyil, məhz elə İsraildən başlamaq lazımdır ? Onda da istər istəməz sual yaranır ki, ayıb olmurmu, 70 ildir, bu gün belə, İsrailin ən müasir texnologiyası ilə təchiz olunmuş zirehli texnikasının üstünə əlinə daş verməklə tifil ərəbləri (fələstinlilər nəzərdə tutulur) yollayırsınız ? Hə, Həmas Kəssam raketlərdən də istifadə edir ki, həmin raketlər israillilərin həyatı üçün təhlükə təşkil etdiyində elə göydə İsrailin RƏM sistemləri tərəfindən məhv edilərək külə döndərilir. Axı Ayətulla rejiminin bütün siyasəti dinə, mənsə deyərdim konkret şəxslərin emossiya və duyğularından yaranan düşüncə tərzinə köklənib. Cənub qonşumuz nizami orduya sahibdir, tez tez hərbi təlimlər keçirir və elə dünən, növbəti dəfə ballistik raketlərin sınağını keçirdi. Hətta bəzi ekspertlərin fikricə, İran ordusu, NATO-un ikinci ordusu olan Türkiyə ilə belə rəqabət aparmaq gücünə sahibdir. Onda necə olur ki, silahlı qüvvələrin ali baş komandanı ayətullah Əli Xamnei Qüdsün azad olunması üçün orduya əmr vermir, 70 ildir əlinə daş alıb atmaqla, özünü intihar etməklə qələbəsini bayram edən sadəlöhv və savadsız ərəbləri meydana buraxır ? Bu və başqa bu kimi suallar cavab istəyir.
- İran hakimiyyəti etiraf etsə də, etməsə də ya qəbul etməliyik ki, İsrail sadəcə olaraq bəhanədir və Ayətullah rejimi İslam dinini aşırı şəkildə siyasi maraqları üçün istismar edir. Bu halda İran hakimiyyəti İslamın və müsəlmanların dünya ictimaiyyətinin qəzəbinə və nifrətinə tuş gəlməsindən heç də narahat görünmür, ancaq şəxsən mən çox- çox narahatam.
- Ya da, hazırkı İranda, xüsusilə xarici siyasət, hakimiyyətə sahib, reallıqla əlaqəni itirmiş, konkret şəxslərin emossiya və duyğularından irəli gələn, mütləq şəkildə məntiqə əsaslanması məcburi olmayan, gözlənilməz ideya və düşüncənin məhsulu olaraq formalaşır. Bu xüsusiyyətlərinə görə də, sivil dünyada Putinin adı çıxıb. Digəl Putin də Ayətullah rejimi ilə müttəfiq sayılır. Azərbaycanlıların bir atalar sözündə deyildiyi kimi, “ .... həmrəng olmasalar da, həmxasiyyət olarlar”.
P.S. Bu yazıda ironiyadan başqa həqiqətlər də var və hamının çılpaq həqiqəti belə olsa qəbul edəcəyinə ümid etmirəm.
Elnur MƏLİKOV
Vətəndaş Fəalı
