BƏŞTƏ YOD BİYƏ Ə RUJON
Əvəsor be, bətı gıləy vılım doe,
Bəştə yod biyə, bəştə yod biyə ə rujon.
Də vıli ivrədə bətı dılım doe,
Bəştə yod biyə, bəştə yod biyə ə rujon.
Az ki botı ostova bim, həşi bim,
Bənə orzu bəştı hanon dəşəbim,
Iştı çəşdə lap bə honi oşəbim,
Bəştə yod biyə, bəştə yod biyə ə rujon.
Iştı yoddəy, bılbıl mahne handeədə?
Çəmə orzuon vənəşə bin bandədə,
Çəşə ason dimi səpe mandeədə,
Bəştə yod biyə, bəştə yod biyə ə rujon.
Həni diye, bomı mande əziniş
Deşmen ğoyme, əy oğənde əziniş,
Tı ki, mıni həni vinde əzıniş,
Bəştə yod biyə, bəştə yod biyə ə rujon.
DARDİ BIVOT
Dardi bo avə bıvot,
Qəmqin bəbe, bəbəme.
Çəşonədə botınən
İ-dıqlə ars ebəme.
Dardi bo ovi bıvot,
Əvən botı dıl okə.
Iştə dardi bıvoto,
Şin-şini sıxan bıkə.
Dardi bo Həşi bıvot,
Ekə çəşə arsi tı.
Xıdo tıni bıməso,
Boştı holi bısutı.
Diəkə çıki dard veye,
Ki detı i ğəmədəy?
Iştə dardi bəy bıvot,
Dardı kam bıbu qədəy.
Əncəx yodo beməkə,
Kiy ki dardış kəşəni.
Kiy ki nohəxə koysə
Dılış hiç vaxt arşiəni.
Əçəy tono tı məbəm,
Peşo pəşimon bəbeş.
Çə nodoni çəşədə
Tı ıştən nodon bəbeş.
Bəsıre bəştı holi
Dılı tikəən dod bəbe.
Bəvindeş ki, dardisə
Iqlə dardən zyod bəbe.
Jıqoye çı dınyo ko,
Çımı dust, ıme jimon.
Dardi boy bəmı bıvot,
Qasbu i dardədəmon?!
OMƏM
Bandon, nıznəme az şıməku co be,
İjənən şıməni vindeyro oməm.
Şıməku şımə to az zum səy pidə,
Deşmenon bə zəmin ğandeyro oməm.
İjənən okardon ranqinə vılon,
Eşğiku bə həvəs omedən dılon.
Dardiku, ğəmiku handən bılbılon.
Az dəvon ivrədə handeyro oməm.
Aşığim az bəşmə, aşığ, bo coni.
Deşmenim az bəşmə yadi, deşmeni.
Hiç vaxt co əbınim şıməku həni,
Az şımə tonoku mandeyro oməm.
XƏBƏ BISTƏN
Tı mını xəbə se pie,
Vılonku xəbə bıstən.
Dardı-səri bəsə dəşə
Dılonku xəbə bıstən.
Hakane tovsoniku,
Bandi peşə honiku,
Çə honi lap toniku
Lalonku xəbə bıstən.
Yarəş veye çı dıli...
Zındənişbu ın holi,
Hakane çı bılbıli
Holonku xəbə bıstən.
ÇIMI HANON
Çımı hanon çımı dıli sıronin,
Çəy tilsimi tı okarde əzıniş.
Az əvoni vinde bəznem ha şanqo,
Hiç i kərən tı diə karde əzıniş.
Çımı hanon bəmı qıləy ro bəkan,
De roy bəşem, çı dınyoku bebəşem.
Çımı hanon qıləy kəybə obəkan,
Çə kəybəku bə co dınyo dəbəşem.
Bə dınyoədə ıştə qınon şobədom,
Hənək bəkam çı mələkon arədə.
Şoyşoy kayku ıştə çəşon ebədom,
Hanım bəpie ijən hıtə vırədə...
"Tolışi sədo”
