 Məhbus baş redaktor ədliyyə nazirinə müraciət edib
Həbsxanada olan vicdan məhbusu, jurnalist Eynulla Fətullayev ədliyyə
naziri cənab Fikrət Məmmədova məktubla müraciət edib. Müraciətin surəti
ədliyyə nazirinin müavini, pentensiar xidmətin rəisi Nazim Ələkbərova
və Bakı Istintaq Təcridxanasının rəisi Elxan Sadıxova ünvanlanıb.
Müraciətdə deyilir:
Hörmətli Fikrət müəllim!
Sizi Azərbaycan hökumətində çox az sayda ziyalı və təvazökar şəxslərdən
biri kimi qəbul edərək, şəxsən Sizə müraciət etmək fikrinə düşdüm.
Avropa Məhkəməsinin iki qərarına, Avropa Şurasının Nazirlər Komitəsinin
yekun rəyinə, dünya liderlərinin çağırışlarına, beynəlxalq birliyin və
ölkə ictimaiyyətinin təkidli tələblərinə rəğmən, Azərbaycan
hakimiyyətində yer tutmuş bəzi kriminal dairələr öz cılız qruplaşma
maraqlarından çıxış edib, 2009-cu ilin dekabrında mənə qarşı çox çirkin
və əxlaqsız təxribat təşkil edərək, 12 saylı cəzaçəkmə müəssisəsinin
ərazisində geyim əşyalarıma narkotik maddə yerləşdirib, növbəti dəfə
mənim məhkum olunmağıma nail olub, azadlığa buraxılmağımın qarşısını
aldılar. Bu çirkin olay Ədliyyə Nazirliyinin tabeçiliyində olan
müəssisədə törədilsə də, fəqət Ədliyyə Nazirliyinin bu cinayətin
modelləşdirən və həyata keçirənlər sırasında olmadığına əminəm. Ciddi
prosessual pozuntularla və qanunsuzluqlarla müşayiət olunan məhkəmə
prosesinin nəticəsində mən yenidən 2 il 6 ay azadlıqdan məhrum
edilmişəm. Heç bir əsas olmadan, Avropa Məhkəməsinin və Ali Məhkəmənin
Plenumunun bəraətverici qərarlarını nəzərə almadan, yalnız vergilərdən
yayınma kimi (buna görə mən 3 aylıq azadlıqdan məhrum edilmə cəzasına
məhkum edilmişdim) yüngül cinayətə və diffamasiyaya istinad edən məhkəmə
saxta narkotiklərdən istifadə ittihamı kimi heç bir ictimai
təhlükəliliyi olmayan məhkumluğumu qabardıb, mənə verilmiş son cəzanı
ciddi rejimli cəzaçəkmə müəssisəsində çəkməyi təyin edib. Beləliklə, mən
xüsusilə ağır, amansız və dəfələrlə cinayətlər törətmiş
residivistlərlə, ağır və mütəşəkkil cinayətkarlıq ideyalarının
təbliğatçıları ilə bir müəssisədə, bir barakda, bir dam altında
saxlanmalıyam. Nəzərinizə çatdırıram ki, mən təhqiqatçı jurnalistika ilə
məşğul olan şəxs kimi 11 illik fəaliyyətim dövründə bu cür şəxslərin
əksəriyyətinin fəaliyyətini ifşa etmişəm, cinayətkar fəaliyyətlərini
qələmə alaraq məhkəmə reportajları vasitəsilə Azərbaycan ictimaiyyətinə
və oxuculara çatdırmışam. Onu da nəzərə alsaq ki, bu cinayətkarların bir
hissəsi hüquq-mühafizə orqanlarında pənah tapmış mafioz dəstənin
agentura şəbəkəsini təşkil edir, bu halda məndən qisas üçün tam münbit
şərait yaranacaq.
1, 7, 11, 15 və 17 saylı cəzaçəkmə müəssisələrində mənə böyük təhlükə
var. Odur ki, mən heç bir halda, heç bir təminatla həmin cəzaçəkmə
müəssisələrinin ərazisinə daxil olmayacağam. Aydındır ki, mənə xəsarət
də yetirə bilərlər, hətta qətlə də yetirə bilərlər. 12 saylı cəzaçəkmə
müəssisəsinin rəisi Aftandil Ağayev son narkotik işimlə bağlı Qaradağ
Rayon Məhkəməsində şahid qismində iştirak edərək, öz ifadələrində
göstərmişdi: "Eynulla Fətullayev bizim cəzaçəkmə müəssisəsində cəza
çəkərkən mən çox narahat idim. Yatan yerdə onun əşyalarına nəinki
narkotik ata bilərdilər, hətta onu boğub öldürə bilərdilər.” (Cinayət
işinin materialları, cild 1, səh. 121). Göründüyü kimi hətta ümumi
rejimli cəzaçəkmə müəssisəsində belə, mənə böyük təhlükə mövcud olmuş,
başımın üzərindən Damokl qılıncı asılmış və yalnız təsadüflər
nəticəsində mən təhlükələrdən qurtula bilmişdim.
Belə olan təqdirdə, cəzaçəkmə müəssisəsinə çıxmaqdan imtina etdiyim üçün
ya karserdə, ya da kamera tipli otaqda, təcrid vəziyyətində
saxlanmalıyam. Son illərdə ədliyyə sistemində bir çox müsbət
dəyişikliklər baş versə də, Bakı Istintaq Təcridxanasındakı layihədə öz
əksini tapmış Avropa pentensiar qaydaları tətbiq edilsə də, lakin
saxlanma yerlərində, xüsusilə karserlərdə və OTK-lərdə vəziyyət heç də
ürəkaçan deyildir. 12 saylı cəzaçəkmə müəssisəsinin karserlərində uzun
müddət saxlanılan məhkum kimi deyə bilərəm ki, bu, orta əsr həbsxana
modelidir. Və hətta sağlam insan bu tipli kameralarda bir neçə gün
saxlandıqdan sonra, onun səhhətində mütləq fəsadlar baş verəcəkdir.
Sual oluna bilər, niyə indiyədək bu haqda mətbuata və ictimaiyyətə geniş
açıqlama verməmişəm? Yəqin ki, bu illər ərzində qürurlu insan olduğumu
sübut edə bilmişəm. Istəmirəm kiminsə mənə yazığı gəlsin və yaxud
şikayətimi kimsə həbsxana çətinliklərindən sızıldama kimi qəbul edə
bilər. Bu, məni alçaltmış olardı. Bu haqda heç kimə şikayət etmək
istəmirəm.
Əlbəttə, mən öz ideallarıma görə ölümə də hazır insan kimi bu cəzaçəkmə
müəssisələrinə çıxıb, alnıaçıq və qürurla ölümü qəbul edə bilərəm. Bu
haqda çox düşünmüşəm, lakin bu ölüm təhlükəsi haqda hər kəsi xəbərdar
etməliyəm.
Eyni zamanda çox ümidvaram ki, Siz keçmiş fəaliyyətimlə bağlı ciddi
rejimli cəzaçəkmə müəssisələrində, residivistlərin mühitində gözlənilən
təhlükədən məni sığortalayıb, Azərbaycan Respublikasının Cəzaların
Icrası Məcəlləsinin 72.3, 12.3-cü maddələrini rəhbər tutaraq, məni
məhkəmə və hüquq-mühafizə orqanlarının sabiq işçilərinin saxlandığı 9
saylı cəzaçəkmə müəssisəsinə göndərilməyim barədə müvafiq göstəriş
verəcəksiniz.
Əvvəlcədən öz təşəkkürümü bildirirəm. Xahişimə mənfi cavab veriləcəyi
təqdirdə cəzaçəkmə müəssisəsinin karserində müddətsiz aclıq aksiyasına
başlamaqdan savayı çarəm qalmayacaq. Lakin mən Sizin ədalət hissinizə
ümid edirəm.
|
