"Yetər ki, biz bir-birimiz haqqında danışdıq, gəlin bir-birimizlə danışaq"
Tanınmış ziyalı, kinorejissor Eldəniz Quliyevin Azərbaycan Dövlətçiliyi Naminə Demokratik Talış Birliyini yaratmasına YAP-ın Siyasi Şurasının üzvü Aydın Mirzəzadə sərt münasibət bildirib. O vurğulayıb ki, E.Quliyevin bu addımı təhlükəli tendensiyaya rəvac verir: "Istənilən bir ölkədə xüsusilə Azərbaycan kimi müstəqiliyini 21 ilini yaşayan gənc bir dövlətdə milli və etnik zəmində hansısa siyasi təşkilatın yaradılması çox təhlükəli və qorxulu bir haldır. Siyasi təşkilatlar və partiyalar milli zəminə, milli və etnik mənsubiyyətə görə deyil, siyasi əqidəyə görə yaradılır, formalaşdırılır”.
A.Mirzəzadənin söylədiklərinə E.Quliyevin münasibətini öyrəndik. E.Quliyev bildirdi ki, yeni yaranan təşkilatın məqsədi və məramı barədə mətbuatda geniş məlumat verilib. Amma bütün bunlara rəğmən hakimiyyətdən bu tip açıqlamalar gəlir: "Bu bir daha göstərir ki, biz düz yoldayıq. Biz demokratik islahatlar tələb edirik. Hər bir Azərbaycan vətəndaşına bərabər hüquqlar diləyirik. Onlar özlərini vətəndaş kimi hesab etməlidirlər. Biz bəyan edirik ki, yetər ki, biz bir-birimiz haqqında danışdıq, gəlin bir-birimizlə danışaq. Məhz bu nüansı hakimiyyət təmsilçiləri anlamaq istəmir. YAP-ı silkələsən YAP-ın yüz minlik üzvlərindən heç kim qalmayacaq. Ona görə mən bu təşkilatı lallar, karlar təşkilatı adlandırmışam”.
Hakimiyyətin siyasətinin yalan üzərində qurulduğunu deyən E.Quliyev vurğuladı ki, bu hakimiyyətin tənqidi onlar üçün tərif, söyüşü alqış deməkdir (Azadlıq Qəzeti).
