 Ruhulla
Axundzadə: "Məni etnik təfriqəçilikdə günahlandırırlar.
Soruşan lazımdır, axı mənim anam türk, atam talış, həyat yoldaşım da
şafeidir. Mən necə təfriqəçi ola bilərəm"
Ağır Cinayətlərə dair işlər üzrə Məhkəmədə hicab müdfiəçiləri Azərbaycan İslam Partiyasının (AİP) sədri Hacı Mövhün Səmədov, onunla yanaşı - AİP sədrinin müavini Vaqif Abdullayev, Astara rayon təşkilatının sədri Ruhulla Axundzadə (foto), Mövsüm Səmədovun qayını Firdovsi Məmmədrzayev, əmisi oğlu Dəyanət Səmədov, Masallı ruhanisi Seyyid Fəramiz Abbasov və Quran hafizi Zülfüqar Mikayılzadənin cinayət işi üzrə növbəti məhkəmə iclası keçirilb.
Proses partiyanın Astara rayon təşkilatının sədri Ruhulla Axundzadənin ifadəsi ilə başlayıb. R.Axundzadə çıxışına Azərbaycan tarixinə qanlı hərflərlə yazılmış 1937-ci il repressiya qurbanlarından söhbət açmaqla başladı: «Azərbaycanın qeyrətli oğulları Mikayıl Müşfiq, Ruhulla Axundov repressiyaya məruz qaldılar. Bunlardan əlavə adını bildiyimiz və bilmədiyimiz minlərlə ruhani Nargin adasında güllələndi. Lakin üstündən illər keçməsinə baxmayaraq, tarix onları qiymətləndirdi. O zaman Azərbaycanın bu qiymətli oğullarının həlak olmasında yuxarıda oturan ermənilərin barmağı var idi. Bəs indi nə olub?».
Astarada baş verən özbaşınalıqdan danışan Rufulla Axundzadə, qanunsuzluqlarla daim mübarizədə olduğundan da söhbət açdı: "Həbs olunan gündən yalan və iftiraya məruz qalmışam. Uzun illərdir, korrupsiyaya qarşı mübarizə aparmışam. Mən hər yerdə haqq sözümü demişəm və bundan sonra da deyəcəm. İcra hakimiyyəti başçısının, prokurorun, polis rəisinin qanunsuz hərəkətlərinə qarşı olmuşam və olacam".
Ruhulla Axundzadə deyib: Mən inqilabçı, mərd, qorxmaz, dövlətini, Vətənini, xalqını çox sevən bir insan kimi hərəkatın ilk günlərində fəaliyyət göstərmiş bir insanam. Cavanlıqda mənim silahım ancaq kəllə, yumruq və məntiq olub. Ümumiyyətlə, biz müsəlmanların yeganə ən böyük silahı duadır. Sənə qarşı ədalətsizlik edənə nifrin yağdırırsan, yaxşılıq edənə dualar edirsən. İndi məni etnik təfriqəçilikdə günahlandırırlar. Soruşan lazımdır, axı mənim anam türk, atam talış, həyat yoldaşım da şafeidir. Mən necə təfriqəçi ola bilərəm.
Məhkəmədə Dəyanət Səmədov belə ifadə verib: "Birinci axtarışda mənim evimdən 3 patron çıxmışdı. Dövlət tərəfindən təyin olunmuş vəkil mənə bildirdi ki, tapılan 3 patronu boynuna alsan yüngül maddə ilə ittiham olunacaqsan və ailə vəziyyətini nəzərə alaraq məhkəmə zalından azad oluna da bilərsən. Lakin mənim iştirakım olmadan ikinci axtarış aparılıb və guya iki torba silah tapılıb".
Firdovsi Məmmədrzayev ifadəsində bildirib ki, o, olmayan vaxt evində axtarış aparılıb: "Mən uşağım xəstə olduğu üçün onu Bakıya gətirmişdim. Mənim evimdə axtarış aparılan zaman evdə azyaşlı oğlum olub. Evdə yorğan-döşək yükünün arasından guya qumbaralar tapıblar. Həmin gün mən Bakıda qalmalı idim. Belə çıxır ki, mən arasında qumbara qoyduğum döşəyin üstündə mənim oğlum yatmalı idi".
Quran hafizi Zülfüqar Mikayılzadənin də ifadəsi dinlənildi. O çıxışında Quranın başqa dinlərə hörmətlə yanaşdığını təlim etdiyini söylədi. Prokurorun İslam Partiyası ilə bağlı sualın cavabında Zülfüqar Mikayılzadə bildirdi: "Mənim İslam Partiyası barədə məlumatım olub, partiya ilə əlaqəm olmayıb".
O ittihamların bütün halda Azərbaycanın əleyhinə olduğunu bildirdi: «Ermənilər neçə illərdir sübut eləmək istəyir ki, azəri-türkləri onlara qarşı soyqırım, terror eləyib. Hətta bu məsələni dünya səviyyəsində yaymağa çalışırlar. Əgər siz bizi günahsız olaraq belə bir maddədə ittiham edirsinizsə, ilkin olaraq onları haqlı çıxardırsınız. Digər tərəfdən Əhli-beytsevərlərin ideologiyasına da ziddir. Heç kim deyə bilməz ki, bizlər kiməsə qarşı qətliam aparmışıq. Bu bizim ümmətçiliyimizə zərərdir. Çünki əqidəmizə görə hətta əhli-kitabla ən gözəl surətdə danışmalıyıq. Artıq BMT-də Həzrət Əlinin insan haqlarına verdiyi qiymət təsdiqlənib. Göründüyü kimi, bu ittihamlar biz Əhlibeytsevərlərə yaraşmaz».
Avqustun 11 -də keçirilən məhkəmə də Azərbaycan İslam Partiyasının sədri Hacı Möhsün Səmədov çıxış edərək bidirmişdir: "Bizi həqiqətdə nəyə görə həbs etmisinizsə ona görədə ittiham edin. Kişi kimi deyin ki, əqidənizə görə, çıxışlarınıza görə ittiham olunursunuz. Bizim əqidəmizdə sizin irəli sürdüyünüz terrora yer yoxdur. Biz terroru lənətləyirik. Siz isə bizi bundan ittiham edirsiniz..."
Növbəti iclas avqustun 22-nə təyin olunub.
TALISH.ORG
|
