Avropa, Rusiya və Türkiyədəki Azərbaycan təşkilatları Rüstəm İbrahimbəyovla görüş keçirdi
Demokratik Qüvvələrin Milli Şurasının sədri və prezidentliyə vahid namizədi Rüstəm İbrahimbəyov iyulun 15-də Moskvada azərbaycanlıların Rusiya, Avropa ölkələri və Türkiyədə fəaliyyət göstərən bir neçə təşkilatının nümayəndələri ilə görüşüb. Görüş Avropa Azərbaycanlıları Milli Birlik Şurasının sədri Qabil Rzayevin təşəbbüsü ilə baş tutub.
Təşkilat nümaəyndələri Rüstəm İbrahimbəyova onları maraqlandıran məsələlərlə bağlı suallar verib və ətraflı cavablar alıblar. Görüşdə iştirak edən təşkilatların təmsilçiləri Milli Şuranı dəstəklədiklərini və fəaliyyətində ona köməklərini əsirgəməyəcəklərini bildiriblər. Sonda təşkilatlar adından müraciət qəbul olunub. Müraciətdə deyilir ki, Rusiyada, Avropada və Türkiyədə fəaliyyət göstərən təşkilatlarin birliyi "son 20 ildə Azərbaycanda avtoritar rejiminin fəaliyyəti nəticəsində kölə halına düşmüş xalqımızın bu fəlakətdən xilas olması uğrunda mübarizəyə qoşulur”. Bu məqsədlə bu təşkilatlar Milli Şuranı dəstəkləmək, məqsəd və məramının həyata keçməsi üçün ona qanuni, demokratik vasitələrdən istifadə ilə kömək etmək qərarına gəlib.
Müraciəti imzalayan təşkilatlar fəaliyyət göstərdikləri ölkələrdə toplantı və tədbirlərini intensivləşdirmək, cəmiyyətə mütəmadi mesajlar ünvanlamaq, azərbaycanlıları Milli Şura ilə bağlı geniş miqyasda məlumatlandırmaq, Azərbaycan səfirlikləri qarşısında ölkədəki avtoritar rejimin əleyhinə kütləvi aksiyalar keçirmək niyyətindədirlər. Onlar həmçinin fəaliyyət göstədikləri ölkələrdə yaşayan həmvətənlərimizi (Azərbaycan vətəndaşı olan) ya vətənə gəlməklə, ya da olduqları ölkələrdəki səfirliklərimizə getməklə səsvermə prosesində aktiv iştiraka səsləyəcəklər.
Görüşdə iştirak edən və müraciəti imzlayanlar Avropa Azərbaycanlılar Millət Birlik Şurasının (Qabil Rzayev), "Oguznews” agentliyinin (Çingiz Dadaşov), ROO Talış Diasporunun (İsmail Şabanov), AAMBŞ-in Rusiya təşkilatının (Qalib Hüseynov), Beynəlxalq Haqq və Ədalət assosiyasının Rusiya təmsilçiliyinin (Ədalət Zeynalov), Azsaylı müsəlman xalqlarının (Rafik Lianid İlyasoviç), Yeni Sabah təşkilatının (İlqar Alıyev), Moskva vilayəti azərbaycanlılarının mədəni muxtariyyat təşkilatının (Ziyəddin Qulubəyli), Beynəlxalq Haqq və Ədalət təşkilatının Türkiyə təmsilçiliyi (Hasan Toku) rəhbərləri və İctimai xadim Qabil Məmmədovdur (Azadlıq qəzeti).
