Etnik və dini azlıqları Milli Şuradan niyə ayrılır?
Milli Şuranın vahid namizədinin müəyyən edldiyi son iclasında etnik azlıqların nümayəndələri ilə digərləri arasında fikir ayrılığı yaşanmışdı. Buna səbəb Milli Şuranın üzvü Mehdibəy Səfərovun avqustun 23-də keçirilən sessiyada Milli Şuranın vahid namizədi seçilən Cəmil Həsənliyə etnik azlıqlarla bağlı verdiyi sual olmuşdu. Cavabla razılaşmayan M.Səfərov sualı təkrara versə də, yenə də qane olmadığını açıqladı. O. daha sonra Cəmil Həsənlinin vahid namizəd seçilməsinin əleyhinə çıxan yeganə şura üzvü oldu.
Milli Şuranın üzvü Eldəniz Quliyev isə Publika.Az-a açıqlamasında M.Səfərovun Cəmil Həsənli ilə görüşüb məsələyə aydınlıq gətirəcəyini bildirmişdi ( bax- http://www.publika.az/index.php?action=static_detail&static_id=63312). Proseslərin bu məcrada inkişafından sonra həbsdə olan "Tolişi Səda” qəzetinin baş redaktoru Hilal Məmmədov həbsxanadan bəyanat yayaraq hökumət nümayəndələrinin onunla görüşdüyünü və ona qarşı haqsızlığın üzə çıxdığını açıqladı. O bildirdi ki, tezliklə həbsdən azad oluna bilər. Belə ehtimallar yaranır ki, proseslərin gedişinə Milli Şurada yaranmış narazılıq səbəb olub.
"Məni Cəmil Həsənli ilə görüşdürməyə səy göstərirlər”
M.Səfərov Publika.Az-a açıqlamasında yaranmış vəziyyət və baş verənlərlə bağlı danışıb. O bildirib ki, o Cəmil Həsənliyə Elçibəyin milli azlıqlarla bağlı olan fərmanı barədə sual verib və onun mövqeyini bilmək istəyib: "Cavab qane etmədi, yenə də təkrara etdim, amma Cəmil müəllim sualdan yayındı. Ona görə də seçimdə səs vermədim. Lakin biz sonra görüşməmişik. Milli Şurada və düşərgədə məni tanıyan insanlar Cəmil müəllimlə görüşməyimizə səy göstərirlər. Məqsədim odur ki, bu məsələ barədə öz fikirlərimizi korrektə edək, ictimaiyyətə ümumi mesajlar verək. Görüş hələ baş tutmayıb və məsələ açıq olaraq qalır”.
M.Səfərov Cəmil Həsənli ilə görüşmək istədiyini deyib. Ona hörmət etdiyini deyən şura üzvü C.Həsənlinin vahid namizəd seçilməsinə sevindiyini, lakin sualına cavab almadığı üçün protest olaraq səsini əleyhinə verdiyini bildirib: "Lakin bu o demək deyil ki, bütün münasibətlər geridə qaldı. Yəqin ki, Cəmil müəllim seçki qabağı platformasında bu məsələyə də toxunacaq və mesaj verəcək. Cəmil müəllimin mesajlarını gözləyirik, ondan sonra fikrimizi dəqiqləşdirəciyik”.
"Demokratik sayılan şurada tam demokrat deyillər”
Onların gözlədiyi olmadığı təqdirdə Milli Şurada təmsil olunmaq perspektivlərinə gəlincə, M.Səfərov tələsmək istəmədiklərini deyib. O bildirib ki, Milli Şuranın vahid namizədinin əleyhinə çıxmaq istəmirlər.
"Ola bilsin ki, Cəmil Həsənliyə qarşı prinsipial mövqeyim olmasın. Mən şuranın üzvüyəm və Azərbaycanda demokratik dəyişikliklər istədiyimizdən əminəm., ona görə də bura qoşulmuşam. Cəmil Həsənli də bir insandır, ola bilsin öz fikirlərində prinsipiallıq etsin, qalsın. Desin ki, bu fərman köhnəlib. Onsuz da partiya rəhbərləri ilə dərdləşib bir qərara gələcəyik. Burda xalqın mənafeyinə görə hətta geri addım da ata bilərik. Xalqla belə şeylərlə prinsipiallıq aparmaq olmaz”-deyə o qeyd edib.
Qeyd edək ki, 23 avqust sessiyasında M.Səfərovun sualı və onu ikinci dəfə təkrara etməsi narazılıq yaratmışdı. Yerdən on "iclası tərk et, çıx bayıra” replikası da atılmışdı. Hətta bu fikirlərinə görə, "təxribatçıdır” ittihamı da səslənmişdi. Bununla bağlı danışan M.Səfərov buna təəssüf etdiyini deyib: "Biz demokratiyadan, söz azadlığından orda-burda, mətbuatda ürək dolusu danışırıq. Amma hər kəs öz prizmasında özünün nə dərəcədə demokratik olduğunu, səmimi olduğuna fikir versin. Mən fikirləşməmişəm ki, kimsə mənə nə dərəcədə dəstəkləyəcək, məhəbbət bəsləyəcək. Bəzi məsələlərə şəxsi münasibətlər səviyyəsində baxmaq olmaz. Azərbaycan hamımızın vətənidir. Konstitusiyamız, beynəlxalq sazişlər var”.
Onu "təxribatçı” adlandıranları ittiham edən M.Səfərov qeyd edib ki, demokratik sayılan şurada əyləşiblər, amma tam demokrat deyillər. Onun sözlərinə görə, çıxışı zamanı onu dinləməli, söz verməli idilər: "Çünki mən də bu Azərbaycanın bir hüceyrəsiyəm, özümü ziyalı sayıram və Azərbaycan, dövlətçilik, ərazi bütövlüyümüz uğrunda canımı verməyə hazır bir insanam. Mən yenə də onların fikirlərinə hörmətlə yanaşıram. Dözümlü olmağa çalışıram”.
"Xəbərim də yox idi ki, Hilal belə bir bəyanat verəcək”
H.Məmmədov məsələsinə də münasibət bildirən M.Səfərov bunun ona aidiyyəti olmadığını, yayılan bəyanatdan da xəbərsiz olduğunu bildirib: "Xəbərim də yox idi ki, Hilal belə bir bəyanat verəcək. Amma o zindanda olan bir şəxsidir. Qapalı mühitdədir, insanlarla əlaqəsi yoxdur. Bəlkə də ona konkret mesaj veriblər ki, siz belə bir bəyanat verin bütün siyasi məhbusları buraxılacaq. O ümumiyyətlə şəxsi mənafeyini düşünməyən insandır. Azərbaycanı dəstəkləyən, hətta karyerasını buna qurban verməyə qadir olan insandır. O seçkilərdə hakimiyyəti dəstəkləməyi ilə bağlı Prezidentin müsbət işləri haqqında danışıb. Amma ikinci bəyanatında Cəmil Həsənliyə də münasibətinin normal olduğunu deyib, onu tərifləyib. Hilal məsələsinə bir qədər ehtiyatla yanaşmaq azımdır. O, azərbaycançıdır, dövlətçiliyi canından çox istəyən bir adamdır. Mənim fikirlərimlə heç bir əlaqəsi yoxdur. Mənim də, Mili Şuraya münasibətim necə var eləcə də qalır. Bu yolla gedəcəm”.
Asif Nərimanlı
publika.az
