 9 sentyabr 2013-cü il tarixdə Milli Şuranın Azərbaycan Respublikası Prezidentliyinə vahid namizədi, professor Cəmil Həsənli "EL” Hərəkatının Milli Məsələlər üzrə sədr müavini, MŞ-nın üzvü Mehdibəy Səfərovla görüşmüşdür. Ölkəmizdə demokratik vətəndaş cəmiyyəti quruculuğunda insan hüquq və azadlıqlarının qorunması barəsində fikir mübadiləsi edilmişdir. M. Səfərov ölkəmizdə insan hüquq və azadlıqlarının əsas tərkib hissələrindən biri olan vətəndaşlarımızın milli özünüifadə hüquqlarının hal-hazırkı durumu ilə bağlı onu narahat edən fikirlərini söyləmişdir. O, bu hüquq və azadlıqların addımbaşı pozulduğunu, eləcə də, ölkəmizdə bərabərhüquqlu vətəndaş cəmiyyətinin əsas atributlarından biri olan milli hüquqların özünüifadə sahəsində mövcud olan nöqsanlardan və çatışmazlıqlardan söhbət açmışdır.MŞ-nın AR Prezidentliyə vahid namizədi, professor Cəmil Həsənli bu fikirlərə münasibət bildirərək, qeyd etmişdir ki, Azərbaycanda dilindən, dinindən asılı olmayaraq, hər bir vətəndaşın hüquqları ölkə Konstitusiyasında təsbit olunmuş maddələr əsasında yüksək səviyyədə qorunmalıdır. Bizim ən böyük milli sərvətimiz olan Azərbaycan vətəndaşları ali həyat səviyyəsinə layiqdirlər! Ölkəmizin insanları hal-hazırda mövcud Hakimiyyətin apardığı reqionçuluq, yerliçilik, tayfabazlıq kimi bölücülük mərəzlərdən əziyyət çəkirlər və bundan xilas olunmalıdırlar.C.Həsənli ölkəmizdə min illər boyu qardaşlıq şəraitində yaşayan xalqlarımızın monolit birliyindən, tarixin ən ağır dönəmlərində bir-birinə arxa və dayaq olmalarından söhbət açmışdır. Ölkəmizi bir gül bağçasına bənzədən professor C.Həsənli bildirmişdir ki, bu bağçanın ətri və rəngarəngliyi onun xalqlarının sayının çoxluğundadır. Bu xalqların hər biri sahib olduqları ümumazərbaycan milli-mənəvi dəyərlərindən savayı özünəməxsus dilləri, mədəniyyətləri, adət-ənənələri, mətbəxləri, xalq sənətkarlığı nümunələri və s. zəngin mənəvi irsə malik xalqlardır. Azərbaycan Respublikası kimi, xalqların bu dərəcədə milli-mənəvi dəyərlərin inteqrasiya etdiyi, eləcə də bir-birlərinə ehtiramla yanaşıldığı, zəngin çoxmillətli ölkə azdır.  Amma, təəsüf ki insan hüquq və haqları ilə bağlı hər sahədə olduğu kimi burda da çoxlu nöqsanlar mövcuddur. Onların hər birinin dili, mədəniyyəti, adət-ənənəsi, folkloru və digər milli mənəvi irsləri dövlət tərəfindən ciddi qorunmalı və hifz olunmalıdır. Bütün bunlar milli brliyimizə, dövlətçiliyimizin qorunmasına, eləcə də insan haqları müstəvisində demokratik dəyərlərin inkişaf etməsinə xidmət edir. Bunun üçün əlimizdə Dövlət Konstitusiyası, Avropa demokratik institutlarının azsaylı xalqların müdafiəsi ilə bağlı qoşulduğumuz Beynəlxalq Konvensiyalar və Xartiyalar, BMT-nin bu barədə qəbul etdiyi Bəyannamə və ölkəmizin insan hüquqları ilə bağlı qoşulduğu digər proqressiv öhdəliklər mövcuddur.
Xatırladırıq ki, MŞ-nın 23 avqust sessiyasında AR prezidentliyinə vahid namizəd C.Həsənli ilə M.Səfərov arasında səsvermə prosesi zamanı müəyyən fikir anlaşılmazlığının yaranmasına baxmayaraq, görüş maraqlı, qarşılıqlı anlaşma, eləcə də demokratik və konstruktiv dialoq əsasında keçmiş və bütün məsələlər barədə ortaq məxrəcə nail olunmuşdur.
Seyran Rəfiyev "EL” Hərəkatının mətbuat xidmətinin rəhbəri
|
