Aşağıdakı şəkildə iki mübarək ANAnın cismən və mənən məruz qaldıqları əzab və iztirabları sözlə ifadə etmək olarmı?
Biri – bir il öncə qətlə yetirilmiş, bu gün -16 avqustda 32 yaşı tamam olacaq AZAD bir gənc jurnalist-reportyor Rasim Əliyevin anası...
Digəri isə -7 il öncə, 17 avgust 2009-cu il tarixində ərini - AZAD alim-pedaqoq-jurnalist Novruzəli Məmmədovu zindan xəstəxanasında və sonra da iki oğlunu faciəli şəkildə itirmiş Maryam Mammadova dır...
İkinci ananın faciəsi daha dəhşətlidir: ərinin qondarma ittihamlarla həbsindən 7 ay sonra, Almaniyadan atasına baş çəkməyə gəlmiş AZAD gənc mühəndis-şair-rəssam Kamran MTN-nin hədə-qorxu və təzyiqlərinə tablaşmayıb, qəfildən ürək çatışmamazlığından, 36 yaşında vəfat edir və bu faciə atasından (vəfatınacən) gizlədilir ki, “guya,vacib işi olduğundan qayıdıb Almaniyaya”... Çox keçmir, kiçik qardaşı, AZAD insan, istedadlı yazar Emil MTN-nin təzyiqlərinə məruz qalır, döyülür, atası həbsdə ikən özü də “narkotik istifadəçisi” kimi həbs edilir, 3 aylıq zindandan sonra şərti mühakimə olunur, müəmmalı şəkildə avtoqəzaya düşür və bir müddət sonra, 37 yaşında vəfat edir...Şəkildə ərinin məzar daşını qucaqlayan Məryəm xanım elə o anlarda ikinci oğlunun-Emilin dəfnindən (parça və güllərlə örtülmüş üçüncü məzardan) ayrılmış və bu acı-faciəli dərdini-taleyini rəhmətlik əriylə bölüşür...Və sonra...Ailəsini bütövlikdə itirən və unudulmaqda olan 70 yaşlı mübarək ANA - tanınmış bioloq-alim başını ğötürüb, bu dəhşətli dərd-sərləriylə birgə ölkəsini tərk etməyə məcbur olur...
Biz zindanda ikən, Rasimin qətli barədə eşidib xeyli sarsıldıq: axı, 2007-ci ildən, Novruzəli müəllimin haqsız həbsi və mühakiməsindən sonra, onun hüquqlarının müdafiəçisi kimi, keçirtdiyimiz elə bir tədbir, press-konfrans olmazdı ki, orada RATİnin, həm də Obyektiv TV-nin digər jurnalistləriylə yanaşı, Rasim Əliyevi də görməyək... O vaxtlar qondarma “vətənə xəyanət”lə həbs edilənlərin işlərinə əksər hüquq müdafiəçiləri və jurnalistlər çox ehtiyatla yanaşdıqları halda, Rasim kimi AZAD və cəsarətli gənclər bir kimsədən çəkinmədən, bütün məlumatlarımızı ictimaiyyətə çatdırırdılar... Emilin məhkəmə proseslərini də əsasən o əks etdirirdi...
Rasimi bu kimi digər “təhlükəli” proseslərdə də, bu və ya digər xarakterli mitinq-piket ya aksiyaların gərkin səhnələrinin lentə alınmasında da aktiv iştirakını görməmək olmazdı... O, dinməz-söyləməz, sakitcə və VİCDANLA öz peşə fəaliyyitəni davam etdirirdi... Əlbəttə ki, zülm yerdə qalmaz və inşallah, bu kimi haqsız həbs və qətllərin baiskarları gec-tez layiqli cəzalarını alacaqlar... Hər iki ANA kimi, bu kimi cəmi digər əzabkeş ANA və bacılarımıza və cəmi yaxınlarına Allahdan səbr diləyirik! Allah haqq-ədalət naminə şəhid olmuş qardaş-bacılarımızı rəhmət etsin, haqsız olaraq zindan məşəqqətlərini yaşayanları isə tezliklə qələbə sevincləriylə ailələrinə qovuşdursun, inşallah!
P.S. Bu kimi faciələrimizin, davam etməkdə olan haqsız həbslərin (o cümlədən, öz mümkün həbsimizin) mahiyyətini qismən də olsa, o vaxtlar (02.06.2008) Novruzəli müəllimin məhkəməsində (şəxsən öz tələbimizlə(!)) şahid qismində dindirililərkən ortaya qoymuşduq...
Maraqlananlar aşağıdakı linkdən http://www.penrussia.org/gs_gmamedov.htm
(Novruzəli müəllimin və sonra bizim qondarma məhkəmə istintaqı işinə vəkillərin tələbiylə əlavə edilmiş) həmin stenoqramma (rus variantı) ilə tanış ola və bu kimi milli faciələrimizin sirrini qismən də olsa anlaya bilər: “Nə vaxtacan ki, digərlərinin faciəsini də öz faciəmiz bilməyib, dərd-sərlərimizi birgə bölüşməyəcəyik, əfsus və min əfsuslar olsun ki, başımız hələm daha dəhşətli bəlalara mübtəla olacaqdır...” (həmin məhkəmə çıxışımızdan)
Hilal MƏMMƏDOV
