Məhkəmədə vəkil Xalid Bağırov öz çıxışında hakimlərə xitabən 1937-ci ildə həbs edilmiş Mirsalayevin məhkəmə prossesindən sitat gətirdi, o, bildirdi ki, Mirsalayev 1957-ci ildə bəraət aldı, bununla da Xalid Bağırov demək istədi ki, tarix təkrar olunur, Mirsalayevlər bəraət aldılar, lakin onları tutduranlar, onlara şər atanlar, onlara hökm oxuyanlar tarixdə, bu məlun əməllərinə görə, heç vaxt bəraət almayacaqlar, daima nəhlətlə yad ediləcəklər…
….Tarixdə talışlara qarşı basqı həmişə olub, adımıza yasaq qoyulub, məktəblərimiz bağlanıb, zaman-zaman ziyalılarımız müxtəlif bəhanələrlə məhf edilib, mətbu orqanlarımızın adları və dilləri dəyişdirilib, dəyərli kitablarımız məhv edilib, tarixi yer adlarımız saxtalaşdırılaraq dəyişdirilib və s. Lakin bu basqı son on ildə daha da aqressiv xarakter alıb, həbs edilən ziyalılarımıza TALIŞ olduqları üçün həbs edildikləri açıqca söylənilir. Bunu sübut etmək üçün Pifoqor olmaq lazım deyil, sadəcə USTAD Novruzəli Məmmədovun, din xadimi Ruhulla Axundzadənin və nəhayət d-r Hilal Məmmədovun ittiham aktlarına baxmaq kifayət eyləyir. "Özünü talış dərk edirsənsə - demək cinayətkarsan” şüarı isə bizdən əl çəkmir ki, çəkmir!
D-r Hilal Məmmədovun ittiham aktından:
1. "Tolışi Sədo” qəzetində dövlət və hökumət nümayəndələri barədə tənqidi yazılar yazıb.
Burda milli diskriminasiya faktı aşkar görsənir. Bəyəm tənqidi yazılar yazmaq cinayətdirmi? Əgər cinayətdirsə bəs söz və fikir azadlığı hanı? Niyə gündəlik nəşr olunan və işi-gücü bu hakimiyyəti tənqid etmək olan qəzetlərin yazarlarını həbs etmirsiz? Hələ üstəlik həmən qəzetlərə ildə 180 min manat yardım edirsiz? Belə olan halda məlum olur ki, d-r Hilal Məmmədov TALIŞ olduğu üçün tənqidi yazılar yaza bilməz, buda sizin analoqsuz milli siyasətiniz.
2. 1992-ci ildən İran İslam Respublikasının xüsusi xidmət orqanları ilə əməkdaşlığı elman quliyev və digər şahidlərin ifadələri ilə təsdiq olunub.
elman quliyevlə hər şey aydındır, bu insan güc strukturlarının pusquda saxladıqları alətdir, sabah istənilən adam barədə ifadə verə bilər, bəs "digər şahidlər” kimlərdir? Bəs onları niyə həbs eləmirsiz? Axı onlar "dövlət cinayətini” 21 ildir ki, gizlədiblər. demək "digər şahidlər” deməklə iz azdırırsız.
3. İranda təşkil edilmiş konfranslarda milli ayrıseçkilik salan bəyanatlar səsləndirmişdir.
İranda keçirilmiş heç olmasa bir konfransın "adını” deyin ki, d-r Hilal Məmmədov orda iştirak etmiş olsun, olmayıb belə konfrans.
4. Talış dilinin təbliği ilə məşğul olub.
Bu maddə ümumiyyətlə biabırçılıqdır, hər kəs konstitusiyaya söykənərək öz ana dilini təbliğ edə bilər, yoxsa konstitusiya ancaq türkçülüyü təbliğ edənlər üçün yazılıb? Bu milli diskriminasiya deyilmi?
5. İran xüsusi xidmət orqanlarına məxfi məlumatlar ötürmüş, bir sıra vəzifəli şəxsləri həmən orqanlarla əməkdaşlığa cəlb etmişdir.
Bu yalanın zirvə nöqtəsidir, birincisi: d-r Hilal Məmmədovun heç bir məxfi məlumata əli çatmır, ikincisi: hansı məxfi məlumatı, neçənci ildə və kimə ötürüb? Üçüncüsü: hansı vəzifəli şəxsi (və ya şəxsləri) İran xüsusi xidmət orqanlarına cəlb edib? Həmən şəxslər neçə il İran xüsusi xidmət orqanları ilə əməkdaşlıq etmişlər? Adları və tutduqları vəzifələr barədə ictimaiyyətə niyə məlumat verilmir? Nə vaxt ifşa edilmişlər? İfşa edilərkən d-r Hilal Məmmədov barədə niyə danışmayıblar? Və sonda: bu günkü günəcən niyə həbs edilməyiblər?
6. Zindanda olan elman quliyev adlı zatın ərizəsini "etibarlı mənbə” kimi əsas gətirərək d-r Hilal Məmmədovu həbs edərkən, həmən elman quliyevin Astara rayonunun icra başçısının narkobaron olması barədə ərizəsini niyə "etibarlı mənbə” kimi əsas götürməmisiz? Yoxsa burda da "milliyət” önəm daşıyır?
7. Yazılarında, məqalələrində milli ədavəti qızışdırıb.
D-r Hilal Məmmədov heç bir məqaləsində heç bir millətin adını çəkmirsə, o milli ədavəti necə qızışdıra bilər?
8. Xarici beynəlxalq təşkilatlara Azərbaycanı ifşa edən məlumatlar ötürüb.
Zira, Azərbaycanda maliyyələşdirdiyiniz əksər QHT-lər beynəlxalq təşkilatlara Azərbaycanı ifşa edən məlumatlar ötürürlər, buna görə ziyalının cibinə narkotik qoyub, onu həbs etməkdənsə "beynəlxalq təşkilatlarda Azərbaycanı ifşa edən məlumatları”, rüşvəti, korrrupsiyanı, seçki saxtakarlığını aradan qaldırmaq lazımdır.
Bu siyahını uzatmaq da olar, ancaq çi fayda? Yəqin ki, vəkillər bu və digər faktları özlərində qeyd ediblər və Avropa Məhkəməsində bu suallara cavab axtaracaqlar.
Rafiq Cəlilov
Tolışon Sədo, №55
