"Bu ailə 40 ilə yaxındır hakimiyyətdədir və ölkənin reytinqi Pakistandan da aşağıdır"
"Azərbaycan hakimiyyəti Xədicə İsmayıldan reportajlarına görə acıqlı ola bilərdi"
Dünyanın ən nüfuzlu xəbər kanalı olan CNN "Azadlıq" radiosunun əməkdaşı Xədicə İsmayılla bağlı məlum olaydan və bu olayın timsalında Azərbaycan hakimiyyətinin siyasətindən bəhs edən geniş material yayıb. Bugünlərdə yayılan material belə başlayır ki, internetdə Azərbaycanda korrupsiyanı işıqlandıran jurnalist qadını nüfuzdan salan video peyda olub: "Video yataq otağında gizli kamera ilə çəkilib, sonradan anonim şəkildə internetdə Yeni Azərbaycan Partiyasının rəqibi olan Müsavat Partiyasının ev səhifəsini imitasiya edən internet saytında yayımlanıb. Radioda tok-şou aparan Xədicə İsmayıl narahatdır ki, bu təsvirlər mühafizəkar ölkədə ona qarşı dini zəmində hiddətə səbəb ola bilər. Müsəlman cəmiyyətində sosial əxlaq qonşu İrandakı kimi sərt deyil, deyə İsmayıl bildirir, amma onlar qonşu Türkiyənin kənd rayonlarındakına oxşayır. Şərəfin alçaldılması və ya əxlaq çərçivəsindən çıxmağa görə qətl Azərbaycanda reallıqdır".
CNN deyir ki, Azərbaycanın yüksək hakimiyyət eşelonlarındakı adamlar reportajlarına görə X.İsmayıldan acıqlı ola bilərdilər: "Onun məqalələrində İlham Əliyevin qızlarının "Azerfon" şirkətində məxfi paylarının olması barədə məlumat verilirdi. O həmçinin yazırdı ki, prezidentin ailəsinin bankı var və bundan gizli əqdlər üçün istifadə olunur. Azərbaycan Prezident Administrasiyası siyasi analiz və informasiya təminatı şöbəsinin müdiri Elnur Aslanov Xədicə İsmayılın reportajlarını şərh etməkdən imtina edib, amma video yayımlanandan bir gün sonra onu pisləyb, Azərbaycanda sabitlik istəməyən fitnəkar qüvvələri ittiham edib. Aslanov həmçinin bildirib ki, hakimiyyət "bu çirkli işlərin arxasında duran şəxslərin tapılıb ifşa olunması üçün səylərini əsirgəməyəcək". "Hökumətin reaksiyası qeyri-səmimi və hiddətləndiricidir"
Materialda qeyd olunur ki, X.İsmayıl Elnur Aslanovun bəyanatını son dərəcə qeyri-səmimi və hiddətləndirici adlandırıb: "O, hesab edir ki, hökumət onu reportajlarına görə cəzalandırır. Hakim partiya mətbuatda onun etnik mənşəyini Ermənistanla bağlayıb. Azərbaycanla Ermənistan arasında Dağlıq Qarabağla bağlı münaqişə var. Belə təəssürat yaranır ki, jurnalist Ermənistanla bağlıdır. Bu isə Azərbaycan ictimaiyyətində ona qarşı ehtirasları qızışdıra bilər. "Onlar məni düşmən ölkəyə işləməkdə ittiham edirlər", deyə o bildirib. Videonun yayımlanmasına bir gün qalmış hökumətyönlü xəbər saytında gedən bir məqalədə onun etnik mənşəyi məsələsi qaldırılıb. Məqalədə jurnalistin şəxsi həyatı hücumlara məruz qalıb: "Xədicə Bakıda daim bahalı barlara və klublara gedir. O, alkoqola və yüngül həyata bağlılığını gizləməyib. O, Azərbaycan qadınlarının tərbiyəsi və dəyərlərinə gülürdü". Başqa bir hökumətyönlü qəzet olan "İki sahil"də video yayılandan bir gün sonra gedən məqalədə yazılıb: "Xədicə məqalələrində deyirdi: "Mənə azadlıq verin" və deyəsən, indi yetərincə azadlıq alıb". Bundan sonra məqalədə videonun abırsız təfərrüatı verilmiş və onu internetdə tapmaq yolu göstərilmişdi. Xədicə İsmayıl hüquq müdafiəçiləri və başqa qruplardan dəstək alıb. Dini mühafizəkarlar onun müdafiəsinə qalxıb. Nardaran ağsaqqalları jurnalistlə çox vaxt razı olmadıqlarını desələr də, Xədicəyə qarşı şantajı pisləyiblər və bu işlərin dayandırılmasını tələb ediblər. Xədicə İsmayıl hesab edir ki, dini icma və başqa mühafizəkarların dəstəyi "onun həyatını xilas etməyə kömək edəcək". Bütün dünya müxtəlif hüquq müdafiəsi təşkilatları narazılıq ifadə edib". "Əliyevlər qırx ilə yaxındır hakimiyyətdədir"
CNN Jurnalistləri Müdafiə Komitəsinin, Sərhədsiz Reportyorlar Təşkilatının və digər qurumların da jurnalistlə bağlı etirazlarını yada salıb: "Azərbaycan jurnalsitə qarşı böhtan kampaniyasına başlayıb", deyə Jurnalsitləri Müdafiəsi Komitəsinin press-relizində bildirilir. Sərhədsiz reportyorlar öz bəyanatlarını "nifrət" sözü ilə başlayıblar. Onlar bildirir ki, belə şeylər əvvəl də olub. Amma hökumət jurnalistin təzyiqə məruz qalmasını inkar edir. "Azərbaycan müstəqil KİV-ləri olan açıq demokratik ölkədir", deyə Aslanov bildirib. Əliyevlərin ailəsi qırx ilə yaxındır hakimiyyətdədir. İndiki prezidentin atası Heydər Əliyev 30 il hakimiyyətdə olub. İndiki prezident İlham Əliyev müxalifətin boykot etdiyi seçkilərdə bu vəzifəyə gətirilib və ATƏT tərəfindən bu seçkilər standartlara uyğun sayılmayıb. Keçmiş sovet respublikası son vaxtlar beynəlxalq arenada imicini qaldırıb. O, BMT Təhlükəsizlik Şurasına seçilib və Olimpiada-2020-yə ərizə verib. "Transparency İnternational" Azərbaycanı korrupsiya səviyyəsinə görə Belarus və Nigeriya ilə bir sıraya qoyub. Onun reytinqi Pakistandan da aşağıdır. Mayda Azərbaycanda "Eurovision" müsabiqəsi keçiriləcək. Orada Avropa, Şimali Afrika və Yaxın Şərqdən iştirakçılar olacaq. 40 ölkədən jurnalsitlərin iştirakı gözlənilir. Bu, mətbuatın qlobal təsirinin artması deməkdir. Xədicə İsmayılın videosu Texasdakı "HostGator" şirkətinin veb-hostinqində yerləşdirilib. CNN şirkətlə əlaqə saxlayıb videonu saytda kimin yerləşdirdiyini öyrənməyə cəhd edib. Amma şirkətin təmsilçisi teleşirkəti mətbuat xidməti ilə birləşdirməyib və telefon nömrəsini verməyib. Elektron məktublar cavabsız qalıb".
