Talışa yağan intensiv yağıntı çaylarda sululuğun səviyyəsinin 60 sm qalxmasına səbəb olub. Suötürücü kollektorların daşması nəticəsində Lankon şəhərinin bir sıra küçələrində həyətləri sel suları basıb, evlərə, köməkçi tikililərə ciddi ziyan dəyib.
Seldən zərər çəkən Lankonun Girdəni kənd sakini Əbülfəz Məmmədovun musavat.com-a verdiyi məlumata görə, su basmış həyətlərdən suyun çəkilməsi üçün aidiyyəti qurumlara müraciət etsələr də, tədbir görən olmayıb. Lankonda əsən güclü külək bir neçə iri gövdəli ağacı yıxmaqla elektrik dirəklərinin aşmasına, elektrik naqillərinin qırılmasına və transformatorların sıradan çıxmasına səbəb olub. Bunun da nəticəsində günorta saatlarına kimi əksər yaşayış məntəqələrinə elektrik enerjisinin verilişində fasilələr yaranıb. Sel Rvo, Şovu, Təngivan, Siobili, Əşlə, Veravul, Vilvan, Osakücə, Günəhir, Bəliton, Horavenc, Gəgiran, Biləsər və Daşdatük kəndləri ərazisində ciddi problemlər yaradaraq yolların və körpülərin sıradan çıxması, ev heyvanlarının tələf olmasına səbəb olub.
Yağışlar 300-dən çox fərdi evə ciddi ziyan vurub, enerji təsərrüfatının və telefon rabitəsinin işində fasilələr yaradıb. Rayon mərkəzi ilə kəndləri birləşdirən və sel zamanı dağılmış 15 körpünün bərpası istiqamətində tədbirlər görülsə də, bu iş tam başa çatdırılmadığı üçün Horavenc, Günəhir, Bəliton və digər yaşayış məntəqələrinin sakinlərinin həyat şəraiti iflic vəziyyətə düşüb. Onlar 25-30 km-lik məsafəni 5-6 saata qət etməklə rayon mərkəzinə piyada gəlməyə məhkum olunublar.
Lik rayonunun Jinə Haran kənd sakinlərinin işi də müşkülə düşüb. Sentyabrın 27-də yağan leysan zamanı onların hərəkət etdikləri piyada körpünü sel dağıdıb. Sakinlərin yarısı çayın o biri tərəfində qalıb. Onlar mövcud vəziyyət barədə müvafiq qurumlara müraciət etdiklərini, lakin problemin həlli üçün indiyədək heç bir əməli tədbirin görülmədiyini bildiriblər.
İntensiv yağıntı nəticəsində Lankon-Lik şosesinin 18-ci km-də yenidən torpaq sürüşməsi baş verib və nəqliyyatın hərəkəti dayandırılıb. Bu isə yolda uzun tıxacın yaranmasına səbəb olub. Lik rayonunun Sori kəndində torpaq sürüşməsi baş verib. Nəticədə kənd sakini Xanlar Ağalar oğlu Mürşüdova məxsus fərdi yaşayış evi üçün ciddi təhlükə yaranıb. Həmçinin leysan yağışlar rayonun Kürdəsər kənd sakini Sulduz Şammədova məxsus fərdi yaşayış evini qəza vəziyyətinə salıb. Ev sahibinin sözlərinə görə, yağıntılar uzunmüddətli olarsa, ev tamamilə dağıla bilər.
