 Zaman: 2003-cü il oktyabrın 17-si, məkan Beynəlxalq Mətbuat Mərkəzi. Avropa Şurasının seçkiləri müşahidə etməyə gəlmiş nümayəndəsi, fransalı senator Daniel Qule tələm-tələsik mətbuat konfransı keçirib seçkilərin çox da pis keçmədiyini demək istəyirdi.
Bəndəniz o zaman ona belə bir sual vermişdi ki, mətbuat konfransı keçirdiyi bu həndəvərdə baş verənləri danmaq və seçkilərin normal keçdiyini kommunistsayağı iddia etmək üçün hakimiyyətdən nə qədər pul alıb? Qule o zaman mətləbdən yayınmaq üçün kommunistə bənzədilməsindən forslanmışdı. Bunu bəhanə edib konfransını yekunlaşdırıb aradan çıxmışdı. Bu hadisəni çoxdandır unutmuşdum, sağ olsun Mövlud Çavuşoğlunu, onun bir neçə gün öncəki açıqlaması da eyzən kommunist bəyanatına oxşayırdı. Sitat: "Azərbaycanın Avropa Şurasına üzvlüyünün 10 illiyini salamlayıram. Bu 10 il ərzində, şübhə yoxdur ki, Avropa Şurası, Avropa Şurası Parlament Assambleyası Azərbaycanda demokratiyanın, təşkilatın təməl prinsiplərinin təşviqi və möhkəmlənməsinə böyük töhfə verib. Azərbaycanda keçirilmiş parlament seçkilərində də irəliləyişlər əldə olunub. Deyə bilərik ki, seçkilərdə bizim meyarlara tam əməl olunub. Bu fikirlər seçkiyə dair hazırlanan tarazlaşdırılmış hesabatda da əksini tapıb və bu hesabat AŞPA Bürosunun bu gün səhər keçirilən iclasında yekdilliklə qəbul edilib. Bir daha təkrar edirəm ki, Azərbaycanda seçki sahəsində irəliləyişlər əldə olunub”...
Ura! Gəlin Çavuşoğlunu ayaq üstə alqışlayaq. Bu adam AŞPA rəhbərliyinə gətiriləndə çoxları sevinmişdi ki, yekə bir Avropa qurumuna türk oğlu türk rəhbərlik edəcək. O zaman mən yazılarımdan birində qeyd etmişdim ki, cinayətkar üçün millət anlayışı olmadığı kimi, antidemokratik düşüncə, saxtakar, pulla danışan üçün də millət anlayışı olmamalıdır. Guya bu adam Azərbaycana bir köynək yaxındır, amma Ramiz Rövşənin təbirincə desək, dövlətçilyimizin ələ salınması olan son parlament seçkilərini Azərbaycan üçün irəliləyiş sayır. Bu, adamın ilk belə açıqlaması deyil. 2003-cü ildən bu yana saxtakarlığın baş dəstəkçisi kimi çıxış edir. Bu müddət ərzində çox adamlar belə yarınmalarda bulunub; lakin əksəri artıq susub. Fəqət Çavuşoğlu AŞPA-nın rəhbəri oldusa da Azərbaycan iqtidarının saxtakarlıqlarına beynəlxalq səviyyədə arxa çıxmaqdan əl çəkmir. "O olmasın, bu olsun” filmində deyildiyi kimi, Rüstəm bəy Məşədi İbadın nəyinə aşiq olub? Əlbəttə, qəzetçi Rza bəy dolayısı ilə demək istəmişdi ki, Rüstəm bəy Məşədi İbadın puluna susayıb ona qızını verir. İndi yəqin ki, Çavuşoğlu da hakimiyyətin qara qaşına, qara gözünə aşiq olmayıb. Məsələ ondadır ki, bu iqtidarın pulu çoxdur. Gör, Çavuşoğlu bunlardan nə qədər alıbsa, tərifin, yalanın dəstəsini 5 qəpiyə xırıd edir. Heç Azərbaycan nümayəndə heyətinin rəhbəri Səməd Seyidov belə danışmır. O, heç olmasa "yaxşıdır” deyənsə, yekunda bir "amma” da deyir. Çavuşoğlu isə "amma”sız, qeyd-şərtsiz, birbaşa püskürür. Sanki bu türk oğlu türk AŞPA-nın yox, YAP-ın Strasburq təşkilatının sədridir. Nöyüt pulunun qüdrətinə bax e. Adam özünü də biabır edir, Türkiyəni də, AŞPA-nı da.
Bazar olsun, abi!
Elşad MƏMMƏDLİ,
musavat.com
|
