 Adama bir manat düşür. Elə də böyük pul deyil, milli maraqlar üçün adama nəinki bir, lap yüz manat da verə bilərik, niyə də verməyək ki? Uzun sözün qısası, canımız çıxa-çıxa "yığıb verdiyimiz” manatların zibili çıxdı...
London 2012
Bütün dünyanın nəzəri Londondadır. Bütün dövlətlər bu olimpiadaya bacardıqları kimi hazırlaşıblar, ancaq Azərbaycanın hazırlığına söz ola bilməz. İdmançıları "narahat olmayın, medalları almışıq” deyərək arxayınlaşdıranlar elə bilirdilər ki, İngiltərə də Azərbaycandır, bunlar rüşvət verəcəklər və bunu heç kəs bilməyəcək. Ay-hay, əslində elə Azərbaycanda da kimin kimə nə qədər rüşvət verdiyini hamı bilir, sadəcə heç kəs qorxusundan səsini çıxartmır, səsini çıxardanları da "narkobaron” kimi basırlar içəri. Nə isə, çox hörmətli Kəmaləddin müəllim Azərbaycana hay çəkir ki, gəlin adama bir manat qoyaq, Londonda boksçularımız üçün iki ədəd qızıl medal alaq, bizim millətdə ki, "milli maraq” yolunda bir manatından keçməyə hazırdır axı, dərhal "soobrazim” edib, pulu verdik "1 N:li yanğınsöndürənə”, o da ki, sağ olsun, Bakının bu başdan o başa yanmasına baxmayaraq vaxt tapıb həmin pulu olduğu kimi beynəlxalq boks federasiyasındakı səlahiyyət sahiblərinə ötürüb, onlar da bunun müqabilində bizə iki ədəd qızıl medal vəd ediblər. Hər şey əla gedirdi, amma "hardansa” ingilis jurnalistləri bundan xəbər tutublar, aləm dəyib biri-birinə, İngiltərə Azərbaycan deyil axı, orda mətbuat bir şey yazdısa, "cavabdeh tərəf” hökmən onu ya təsdiq, ya da təkzib etməlidilər, naçar qalan AİBA, yəni ki, beynəlxalq boks federasiyası, bu faktı təsdiqləyib, ancaq "rüşvəti” "yardım” kimi qələmə verib, kimə deyirsən? A kişi, bunlar başa düşmürlər ki, ingilislər sadəlövf azərbaycanlılar deyil, onlar belə nağıllara inanmırlar, onlar üçün rüşvət elə rüşvətdir, nə don geyindirsən də adı dəyişməz! İndi AİBA öz hakimlərinə tapşırıq verib ki, necə olursa olsun, azərbaycanın iki qızılını verməliyik. İlk olaraq yapon boksçu "zibilə” düşüb, hər üç raundda bizim boksçu Məhəmməddən üstün olan yapon boksçunun zərbələrinə dözməyən boksçumuz 3-cü raundda nə az, nə çox, düz 6 dəfə yerə yıxılıb və sonda... qalib olub! Düzdür, ertəsi gün bu biabırçılıq öz həllini tapıb, bizim boksçu layiq olduğu məğlubiyyəti alıb, türkmənistanlı baş hakim və Ağacan Əbiyev İngiltərədən "qovuldular”, bu məsələ də düşdü gündəliyə. Yəni 4.5 milyon çezdi. İndi qalıb o birisi 4.5 milyon, onun da zibili çıxmasa yaxşıdır, hər necə olsa adama bir manat "tərləmişik” axı, bunu tərləməmişik ki, bizim bifər boksçularımız 6 dəfə yerə sərilib, bizi də, FHN-də biabır eləsinlər.
Gizli "mənbə”...
İndi hörmətli Kəmaləddin müəllim bu məlumatı ingilis mətbuatına ötürən şəxsin kimliyini araşdırır. Mən bilirəm bu adam kimdir, bu adam da öz federasiyası üçün qızıl medal almaq iddiasındadır, ancaq o bu 9 milyonu yığa bilməyib, bəlkəm də yığıb, sadəcə "lazımi” şəxslərə ötürə bilməyib və bunun acığını (tək bununmu?) hörmətli fövqəlnazirdən çıxıb! Mənə elə gəlir ki, hörmətli Kəmaləddin müəllim də bu "mənbənin” kimliyini bilir, sadəcə tutarlı sübutu yoxdur, bir şey edə bilmir. Sübut olsa bu məsələ yüksək səviyyədə həll olunacaq, həmən adam "bir də belə etmərəm” iltizamı verməli olacaq, zarafat deyil e, 5-6 gündür olimpiada gedir, qalmaqallarda ancaq Azərbaycanın adı hallanır, kimisi saxta bilet satır, (deyilənlərə görə bu saxta biletləri idman naziri ilə xarici işlər naziri müştərək hazırlayıblar və Kəmaləddin müəllimi baqaja qoyan şəxs onları da baqaja qoyub) kimisi qızıl medal almaq istəyir. Kim bilir hələm bizi qarşıda hansı sürprizlər gözləyir?
Vətənə xəyanət...
Vətənə xəyanət ittihamı Hilal Məmmədova qarşı sürülmüş çox absurd bir ittihamdır, Hilal Məmmədov vətənə necə xəyanət edə bilərdi ki? Belə bir yüksək dövlət vəzifəsində deyildi ki, deyim hansısa məxfi məlumatı "satıb”, özünə son model "Rols-Roys” alıb. Demək Hilal Məmmədovun "vətənə xəyanətini” başqa yerdə axtarmaq lazımdır. Məsələn Baş prokurorluğun bəyanatında. Hörmətli prokuror adı belə məlum olmayan "donosçunun” izahatını rəhbər tutaraq Hilal Məmmədovu İran İslam Respublikasının xeyrinə cəsusluq etməkdə suçlayıb. Kim bilir nədən ibarətdir onun cəsusluğu? Baş prokuror günahsızlıq prizumpsiyasını pozaraq bəyanat verir ki, "1992-ci ildən Hilal Məmmədov vəzifəli şəxsləri İrana cəsusluğa sövq etmişdir”, amma həmən vəzifəli şəxslərin adlarını yazmır, əgər adları hörmətli Zakir Qaralova məlumdursa, niyə onları da həbs etmir? Kimi və ya nəyi gözləyir? Bu 20 il ərzində niyə həmin vəzifəli şəxslərdən heç biri həbs edilməyib? Demək belə bir hal uydurmadır, cəfəngiyatdır və MTN-nin bu işə soyuq yanaşması bu işin uğursuz bir qurama olduğunu sübut edir. İndi hörmətli ittihamçılar başlarını itiriblər, bilmirlər irəli sürdükləri cəfəng ittihamları necə geri götürsünlər. Əsl "vətənə xəyanət edənlər” qalıblar bir qıraqda, bunlar günahsız insanları, hansıların ki, bu xəyanətə heç imkanları da çatmır, tutub basırlar içəri. Nədir vətənə xəyanət? Vətənə xəyanət ilk olaraq dövlət əmlakının vəhşicəsinə dağıdılmasıdır. Məsələn: "Bakı-Quba-RF sərhəddi” magistral yolunu tikəndə bu yola minimum 30 il qarantiya verdilər. Bir il keçməmiş Xırdalan dairəsindəki yeraltı tunelin divarına vurulmuş bahalı kafellər düşdü, asfalt qabar verdi, həmən tunel təmirə dayandı, heç 3 il keçməmiş Qubada körpü uçdu, indi də həmən yolun Saraydan Ceyranbatanacan olan beton hissəsini təzədən qazıb, yenidən betonlayırlar, budur vətənə, onun əmlakına xəyanət, ancaq bir nəfər də olsun məsuliyyətə cəlb edilməyib. Bəzi KİV-lər yazır ki, Azərbaycandan 48 milyard pul oğurlanıb, budur vətənə xəyanət, ancaq bir nəfər də olsun məsuliyyətə cəlb edilməyib. Olimpiadada Azərbaycan səlahiyyətliləri boyunlarında Azərbaycanın üç rəngli bayraqları saxta bilet alveri ilə məşğuldurlar, dövlətimizi, onun adını biabır edirlər, budur xəyanət, ancaq XİN susur, çünki öz zibilləridir, kimsəni heç olmasa etika xətrinə işdən də çıxartmırlar. Azərbaycan boks federasiyası 9 milyon rüşvət verir, bunun üstü açılır, sivil dövlətlərdə artıq cinayət işi açılmalıydı, rüşvət verən dərhal istefa verməliydi, olmadı, çünki bizdə sivillikdən əsər-əlamət yoxdur. Yazmaqnan qurtarmaz, ancaq mənimçün yenə də maraqlıdır, kimdir vətənə xəyanət edən, Hilal Məmmədov, yoxsa vətənin milyardlarını kül kimi göyə sovuranlar?
Bəxtiyar Sadıqov...
Bəxtiyar Sadıqov danışdı, onun danışığı mənə 1937-də Azərbaycanın aydınlarının üzlərinə duran "ziyalıların” danışığını xatırlatdı. Həmən aydınların adları bu gün də tariximizə qızıl hərflərlə yazılıb, ancaq onların üzlərinə duranlar elə "üzə duran” kimi də tanınırlar. Sözüm bunda yox, sözüm ondadır ki, bunlar biri-birilərini təkzib etməkdən belə çəkinmirlər. Zakir Qaralov deyir ki, Hilal Məmmədov uzun müddət qəzetin baş redaktorluğundan sui-istifadə edib, Bəxtiyar Sadıqov deyir ki, "biz araşdırdıq, Hilal Məmmədov baş redaktor olmayıb və qəzet ümumiyyətlə çıxmayıb”. Bəxtiyar Sadıqova inansaq, demək Zakir Qaralov heç bir araşdırma aparmadan Hilal Məmmədova qarşı ittiham irəli sürüb. Bunlarla da işim yox, onsuz da kimin ağlına nə gəldi, danışır, mənimçün maraqlıdır, görəsən Bəxtiyar Sadıqovdan kim xahiş edib ki, belə bir bəyanat versin? Axı Azərbaycan Avropa konvensiyasına imza atıb, heç kəsin günahı sübuta yetirilmədən onu ittiham etmək olmaz. Görəsən hörmətli deputatın bundan xəbəri varmı? Varsa, niyə səlahiyyətini aşır, yoxdursa, onda o boyda qəzeti və milli məclisdəki kürsünü ona necə və ya neçəyə etibar ediblər? Bəxtiyar Sadıqov kimilər kimə xidmət edirlər, xalqa, yoxsa bu xalqı şərləyib tutan qüvvələrə? Bəxtiyar Sadıqova bir sualım var, bilirəm, onsuz da cavab verməz, hər halda mən sualımı verirəm:Necə ola bilər ki, kimi isə qətlə yetirib, polisə təslim olan şəxs məhkəməyəcən "təqsirləndirilən şəxs” olur, heç bir ittihamı sübut olunmayan Hilal Məmmədov "vətən xaini?”
Moskvada növbəti piket...
2 avqustda Moskvadakı Azərbaycan səfirliyi qarşısında növbəti piket olub. Piket iştirakçılarının tələbi yenə də Hilal Məmmədovun azadlığa buraxılması olub. Maraqlısı isə odur ki, səfirlik sözçüsü piketçilərə yaxınlaşaraq "Azərbaycanı biabır etməyin, bu biabırçılığa son qoyun” deyib. İndi bu binəva piketçilər bilmirlər ki, Azərbaycanı onlar biabır edirlər, yoxsa alimin cibinə narkotika atdıranlar. Deyilənlərə görə bu sualın cavabını heç tarixi-Nadiri oxuyanlar da bilmirlər.
Talış dilinə yasaq...
Həmişə demişəm: Hilaldan talışlara bir xeyir gəlməz. A kişi, bu Hilal Astarada "Talış Folklor Gecəsi” keçirdəndən sonra özünü də salıb zibilə, o gecədə iştirak edənləri də. Gözünə döndüyüm Astara "səlahiyyətliləri”, həmən gecədə kim talışca bir kəlmə söz danışıb, çağırıblar məhşər ayağına və "bir daha ictimai tədbirlərdə nə talışca danışın, nə də oxuyun” hədə-qorxusunu gəliblər. İndi həmən "talış folklorunun qəhramanları” nəinki "ictimai tədbirlərdə”, heç ictimaiyyət arasında belə talışca danışmırlar. Budur "tolerant Azərbaycanın” milli siyasəti. Varam bu siyasətlə, ya bu siyasət kökündən dəyişəcək, ya da kı......
Rafiq CƏLİLOV,
celilovrafiq@mail.ru,
"Tolışon Sədo” qəzeti, nöm: 26 (38), 04 avqust 2012-ci il
|
