 Noyabrın 27-də BMT-nin Cenevrədəki Baş Qərargahında İnsan Hüquqları Şürasının Azlıq məsələsi üzrə Forumunun 5-ci sessiyası keçirilmişdir. Tədbirdə Azərbaycan Dövləti adından Prezident Adminstrasiyasının İctimai-Siyasi əlaqələr şöbəsinin müdiri cənab Əli Həsənov çıxış etmişdir. O, Dövlətin milli azlıqlarla bağlı yürütdüyü siyasətə aydınlıq gətirərək qeyd etmişdir ki, postsovet məkanında ilk dəfə olaraq Azərbaycan Respublikasında milli azlıqlar və etnik qrupların hüquq azadlıqlarının qorunması, həmçinin dilinin və mədəniyyətinin inkişafına dövlət yardımı haqqında Prezident Fərmanı verilmişdir. Azərbaycan Respublikası Prezidentinin Fərmanı ilə təsdiq edilmiş «İnsan hüquqları fəaliyyəti üzrə Milli Fəaliyyət Planı»-nda milli azlıqların mədəni irsinin inkişafı Azərbaycan Hökümətinin əsas fəaliyyət istiqamətlərindən biri kimi nəzərdə tutulmuşdur.
Cənab Əli Həsənov qeyd etmişdir: "Azərbaycan Dövlətinin milli siyasətinin əsas istiqamətlərindən biri də ölkəmizdə yaşayan bütün azlıqların dili və mədəniyyətinə dövlət dəstəyi göstərilməsidir. Respublikada milli azlıqların məskunlaşdığı bir sıra rayonlarda ali təhsil müəssisələri və kolleclərin filalları açılmış, ölkənin radio və televiziya kanallarında milli azlıqların dillərində verilişlər yayımlanır. Həmin ərazilərdə yerli TV kanalları fəaliyyət göstərir. Milli azlıqların dilində qəzet və jurnallar nəşr olunur. Azərbaycan bütün dünyada multikulturalizm məkanı kimi tanınır.”
«Bakı Xəbər» qəzetinin 30 noyabr 2012-ci il tarixli sayında Məhəmmədəli Qəribli soyadlı yazarın «BMT-də milli siyasət barədə Azərbaycan dövlət məruzəsi ilə eyni vaxtda ölkədaxili separatizm cəhdləri...» məqaləsi dərc olunmuşdur. Ancaq təəssüf ki, yazıda hansı separatizm cəhdlərindən söhbət getdiyi anlaşılmır. «Azərbaycan Dövlətçiliyi Naminə Demokratik Talış Birliyi» demək olar ki, eyni ilə cənab Əli Həsənovun Cenevrədəki sessiyada qeyd etdiyi məsələlərin həqiqətən həyata keçirilməsi (gerçəkləşdirlməsi) üçün yaradılmışdır. Bu onun Nizamnamə və Məramnaməsində açıq-aşkar qeyd olunub və artıq onlar bu istiqamətdə müəyyən fəaliyyət də göstərirlər. Yaranmış Birlik Azərbaycan Milli Elmlər Akademiyasının milli azlıqların dili, mədəniyyəti, tarixi və etnoqrafiyasını öyrənən müvafiq şöbəsi ilə əməkdaşlıq etməyə israrlıdır: məhz bu istiqamətdə konkret və əməlli işlər görmək niyyətindədir. Belə məramları "separatçı cəhdlər” adlandıran müəllifin qeyri-obyektiv və qərəzli münasibəti göz qabağındadır. Bu sayaq münasibət demokratik dəyərlərə, elementar humanizm prinsiplərinə, ən əsası isə jurnalist etikasına zidd olan mövqedir.
Özünü tərəfsiz jurnalist kimi təqdim edən Qəribli daha sonra millət vəkili Aydın Mirzəzadənin yenicə yaranmış Birliyə münasibətini də işıqlandırmışdır. Təəssüf edirəm ki, cənab Aydın Mirzəzadə də başqaları kimi, Birliyin məram və məqsədlərini bilmədən (və ya bilmək istəmədən) bunu 1992-cü ildə yaradılmış «Qondarma Talış Müğan Respublikası» ilə eyniləşdirməyə cəhd göstərir. (Aydın Mirzəzadə heç yaxın tarixi də bilmirmiş ki? red.) Əslində, onun tərəfindən atılan belə böhtan və şər-şəbədəni təbii qəbul etmək olar, çunki yenidən deputat seçilmək (oxu: "təyin olunmaq”) üçün əllərinə yeni bir mövzu düşüb: - nə olursa olsun, təki hakimiyyətin xoşuna gəlim, təki başım hakimiyyət yetkililəri tərəfindən sığallansın və s. və i.a. kimi qeyri-səmimi, qeyri obyektiv, başlıcası isə ədalət anlayışına tərs mütənasib ənənəvi taktikadan bəhrələnib, divident qazanım.
Talış sözünü eşidən kimi bəzi deputatlar nədən söhbət getdiyini fərqinə-mahiyyətinə belə varmadan, yuxarıların yağlı "malades”i üçün dəridən-qabığdan çıxır, söyüş söymək, təhqir, təhdid etmək növbəsinə dururlar. Sədd heyf ki, belələri biz düşündüyümüzdən də çoxdurlar və yeri gəldi-gəlmədi sinələrini haqq-ədalət "amburazura”sının qabağına verirlər. Hadı Rəcəbli, Siyavuş Novruzov, Hacıbaba Əzimov, Eldar İbrahimov, Mübariz Qurbanlı, Cavanşir Paşayev...- hələ növbədə belələrindən neçəsi var?... «Allah xeyir versin!», deyəsən, Gülər Əhmədovanın, Ağababa Babayevin aqibəti bizim deputatları əməlli başlı titrəməyə salıb...
«Azərbaycan Dövlətçiliyi Naminə Demokratik Talış Birliyi» söz birləşməsindəki «talış» sözünü görən kimi, iqtidara "ayı xidməti” göstərən bəzi psevdo-patriotlar mahiyyətinə varmadan cin atına minirlər. Kaş bu zavallılar mütərəqqi qanunların qəbul olunub, həyata keçirilməsində, habelə cavabdeh olduqları işlərində belə canfəşanlıq göstərəydilər.
Heyif, səd heyf!
Ulduz Həşimov,
Tarixçi müəllim,
Tolışon Sədo qəzeti, №48 |
