 Sıxan dıroz, sıxan kırt
Şairəti kef-dəmox ni, darde dard!
Dılbahandon dılon arə parde pard!
Purə dilon təyli nıbon, zarde zard!
Sıxanvəron nıbo, ım xəlğ marde mard!
Şairişbu, tı bo xəlği ro bınə,
Zulfuğari rizi səpe po bınə.
Çəşəvədə həmuş bedə dədon çon,
Təvə jəydən bə rəğ- rişə cəllodon.
Korə quşon məsdənin ım fəryodon?
Xain beşdən bəmə çəmə avlodon.
Şairişbu, tı bo xəlği ro bınə,
Zulfuğari rizi səpe po bınə.
Xəclət məkəş tı çə merdon zuryətiş,
Çə "Avestə” mandə nışon, şohrətiş.
Çə Boboki, çə Xətayi ğıryətiş.
Bə çand era şohid mandə millətiş.
Şairişbu, tı bo xəlği ro bınə,
Zulfuğari rizi səpe po bınə.
Məqər merdən kıçolondə bəqarde?
Jene ə merd bəştə roy tu bəkarde.
Nıvıştəyon ki bə dast ebəkarde?
Aybəjori vindəkəsi pevarde!
Şairişbu, tı bo xəlği ro bınə,
Zulfuğari rizi səpe po bınə.
Iştə dıli votəy bıvot, məğbule,
Dədə- nənə votəy bıboft, məğbule.
Eli rufi boy eməpot, məğbule.
Dımjonışən bəbe dəvot, məğbule.
Şairişbu, tı bo xəlği ro bınə,
Zulfuğari rizi səpe po bınə.
Bo milləti şoyvo kardəm, nokəm az,
Bəpe bəştə xəlği dıli okəm az,
Həzo fikri ənəarşiə lokəm az,
Bədə bandon bəpe rə volokəm az,
Şairişbu, tı bo xəlği ro bınə,
Zulfuğari rizi səpe po bınə.
Ha milləti ruşinfikon, bəyzodon!
Milləti ruj bə fot şedə, bəy şedon?
Çe zəmonə dast yəxədəy, mey jəydon?
De deşmonon ibon, xəlği bəy jəydon?
Şairişbu, tı bo xəlği ro bınə,
Zulfuğari rizi səpe po bınə.
Fələki ro fiğon kardə, ni əmon,
Tıniş, mınim, əve dardimon dəmon
Çe xəlği ki, şair hıte, ləs be con,
Çəy "Fatihə” bahande mor- şəğolon.
Şairişbu, tı bo xəlği ro bınə,
Zulfuğari rizi səpe po bınə.
Masali, Ğızlıvo
|
