 AZ BOVOTOM, XUN RU BƏBE
Yolon vədə bışu uloğ,
Milləti ğıryət bəbe lox;
Harki pebəkue bəmə şox,
Az bovotom, xun ru bəbe.
Nəsıl omedə besəvod,
Ğıryətiku məvot, məvot,
Edə bə sə jenə kəpot,
Az bovotom, xun ru bəbe.
Bo havate hozie har kəs,
Merd beşdəni elo da kəs,
Əmandəni dumlışt, myonqəz,
Az bovotom, xun ru bəbe.
Ğıryətımon şodoə bə peşt,
Bə qəvımon qətə kuə pışt,
Ru kardəmon çəşo mışt-mışt;
Az bovotom, xun ru bəbe.
Jimon qardə puli səpe,
Dast təyli be, umur sə be;
Həsrətimon iyən bə pe...
Az bovotom, xun ru bəbe.
Tırki boəmə şəkə vardə,
Nuperəson ğiblə qardə,
Çəmə ğıryət sıpə hardə?
Az bovotom, xun ru bəbe.
Vardən tırkə vəyu bə kə,
Dədon-nənon bedən nokə,
Tolış jəydə bəştə ləkə...
Az bovotom, xun ru bəbe.
Bə ov doə be, nəcobət şe,
Rujqomon syo, zəlolət ve;
Milləti nom xəcolət be,
Az bovotom, xun ru bəbe.
Pul volo be bəsə kinə,
Conomoj be ojə sinə,
Yurdış həmuş be çe inə,
Az bovotom, xun ru bəbe.
Tolışi nom qıləy bərğe,
Bəbol deştə dardi ğərğe;
Zonış vətəndə dustəğe...
Az bovotom, xun ru bəbe.
03.10.11
FƏRĞIŞ ÇİÇE, DIROZ BIBU, KIRT BIBU
Ki pidəni ımruj nıbu sasornə,
Bənə doon bəhrin bıbu hasornə,
Merd bəvoten bə canq dəşi bı qornə...
Fərğış çiçe, dıroz bıbu, kırt bıbu,
Əsas əve, bo milləti xırd bıbu.
Həzo-həzo bonom vitə bə Rusyə,
Əyo nokəy bo İvani, Marusyə,
Yolə bandon çımı çəşdə erizyə,
Fərğış çiçe, dıroz bıbu, kırt bıbu,
Əsas əve, bo milləti xırd bıbu.
Vəzifədə nışdə zoon kam ni ha!
Bə milləti koməq bəkan? Xom ni ha!
"ÇİP”, "Prado” boəvon orzu, kom ni ha!
Fərğış çiçe, dıroz bıbu, kırt bıbu,
Əsas əve, bo milləti xırd bıbu.
Fırsət beədə harki dutdə "Domsəvet”,
Heyron mandə, dınyo kardə bəy balet,
Divo xolçə, jiton- jipo "kavralit”;
Fərğış çiçe, dıroz bıbu, kırt bıbu,
Əsas əve, bo milləti xırd bıbu.
Şedə nati, ğazi lulon bə xaric,
Bəmə çoko çəy mədaxil, məxaric,
Lulon jəydən Xıdo bəzne çiç xaric.
Fərğış çiçe, dıroz bıbu, kırt bıbu,
Əsas əve, bo milləti xırd bıbu.
Şeri ğıymət bıəni hiç vaxt həcmədə,
Navko xonçə dərostonin məcmədə.
Esə qıləy roman şedə məcmuədə;
Fərğış çiçe, dıroz bıbu, kırt bıbu,
Əsas əve, bo milləti xırd bıbu.
Tarif, tənğıd əndozədə reçine,
Bə kəçəli məvotənən xaçine.
Bə əcinnə məvotənən loçine;
Fərğış çiçe, dıroz bıbu, kırt bıbu,
Əsas əve, bo milləti xırd bıbu.
Çap kardedə ha sor Camal kitobçə,
Ğəzəl-məzəl, şeir-meir, diboçə.
Bo dastoni bedə esə daspoçə;
Fərğış çiçe, dıroz bıbu, kırt bıbu,
Əsas əve, bo milləti xırd bıbu.
19.10.11
Masali, Ğızlıvo
|
