 "Nəynənsə əylənmək dövlət orqanın formalaşması prosesində korrupsiya faktında adı hallanmaqdan elə də pis deyil”
"Biz bütün elmi və yaradıcı titulları öz zəhmətimiz nəticəsində əldə etmişik, onun-bunun yazdıqları ilə akademik titullara sahiblənməmişik”
Preziden Adminstrasiyasının rəhbəri Ramiz Mehdiyevin dünən Ziyalılar Forumu ilə bağlı dediyi fikirlərə münasibət bildirmək üçün forumun üzvü professor Cəmil Həsənliyə müraciət etdik. C.Həsənlinin dediklərini təqdim edirik:
- Hakimiyyət yetkilisinin dövlət həyatının aktual məsələləri ilə bağlı açıqlamalar verməsi müsbət haldır. Lakin son vaxtlar baş verən hadisələrlə bağlı cəmiyyət həmin hadisələrdə adı hallanan Prezident adminstrasiyasının rəhbəri cənab Ramiz Mehdiyevdən daha ciddi açıqlamalar gözləyirdi. Məsələn, mandat alveri ilə bağlı məlum video qalmaqalında dəfələrlə onun adı cəkilir. Parlamentin formalaşdırılması prosesinə rəhbərlik edən yüksək vəzifəli dövlət yetkilisi kimi bu məsələlərə aydınlıq gətirmək bilavasitə onun üzərinə düşürdü. Bu yaxınlarda açıqlanan digər bir video materialda isə Zülfüqarlı qardaşların 5 milyon manata həbsdən azad olunmasından bəhs edilir ki, bu iş üzrə tanınmış vəkilin mətbuata verdiyi məlumatlarına görə onlara məxsus zavodların "müsadirə” prosesində bilavasitə adminstrasiya rəhbərinin də biznes maraqları olmuşdur. Əlbəttə, normal ölkələrdə belə arzuolunmaz vəziyyətlə qarşılaşan yüksək vəzifəli məmurlar istefa verməyə özlərində güc tapırlar, təəssüf ki, bizim ölkəmizdə hələ bu ənənə formalaşmayıb.
Adamların keçmişini təhlil etmək ənənəsi 37-ci ildən qalma bir dəyərdir ki, həmin dəyər ölkəmizdə hazırkı kommunist əxlaqının başlıca təzahür formalarından biridir. Ziyalı forumunda təmsil olunan şəxslərin keçmişində kriminal axtarn Mehdiyev cənəbları yaxşı olar ki, hərdən bir öz keçmişinə də nəzər salsın və Vəzirov dövründə keçirilən bir tədbirdə Heydər Əliyevin adamı olmadığını sübut etmək üçün hansı gülməli dəlilləri gətirdiyini yada salsın. Axı bu məsələlər elə də uzaq keçmişin haisəsi deyildir. Cənab Mehdiyev deyir ki, bu ziyalılar özləri üçün əylənirlər. Hər halda nəynənsə əylənmək mandat alverində dövləti əyləncəyə çevirməkdən, dövlət orqanın formalaşması prosesində adı korrupsiya faktında hallanmaqdan elə də pis deyil.
Ramiz Mehdiyev bu narazılığı kiminsə deputat seçilməməsi, kiminsə biznesinin baş tutmaması, kminsə hansısa marağının təmin edilməməsi ilə izah edir. Əlbəttə, azad və demokratik seçkilərdə məğlub olmaq tamailə normal bir hadisədir. Lakin noyabrda keçiriləcək bir seçkidə deputat seçiləcək şəxslərin siyahısı sentyabr ayında Milli Məclisə göndərilirsə, burada hansı seçilib-seçilməməkdən söhbət gedə bilər və ya cənab Mehdiyevin mandat vasitəçilərindən birinin seçkidən qabaq tərtib edilmiş deputat siyahısını dəyşməklə bağlı apardığı əməliyyat, vaxt daraldıqca mandatın preiskurantının dəyişməsi ilə bağlı mülahizələr Adminstrasiya rəhbərinin məsul olduğu seçkilərdə "qaliblərin” və "məğlubların” tam mənzərəsini ortaya qoymurmu?
Forumda təmsil olunan ziyalılar yaradıcı insanlardır və nə yazırlarsa bilavasitə öz intellektlərinin məhsuludur, Prezident Aparatında outran bəzi yüksək vəzifəli məmurlar kimi intellektual korrupsiya ilə məşğul olmurlar, başqaları tərəfindən yazılmış kitab və məqalələri öz adlarından çap etdirmirlər. Forumda təmsil olunan ziyalılar bütün elmi və yaradıcı titulları öz zəhmətlərinin nəticəsində əldə etmişlər. Onun-bunun yazdıqları ilə akademik titullara sahiblənməmişlər.
Biz Ziyalı Forumu olaraq "əyləncədən” vaxt tapanda hərdəm gənclərlə işləməyə üstünlük veririk, XXI əsrdə milli inkvizisiya şəbəkəsi yaradıb azad fikirli gəncələri, sosial cəhətdən fəal vətəndaşları təqib etmək bizim düşüncə tərzimizə yaddır. Biz heç vaxt yerliçilik kimi feodal düşüncə tərzinin nəzəri əsalarını yaradıb, praktik baxımdan bu eybəcər sistemin əsirinə çevrilməmişik. Qoy XXI əsrdə Azərbaycanda yerlçilik, korruosiya və rüşvət şəbəkəsi yaradanlar, bu arxaik bəlaya göz yumanlar öz əməllərinin fərqində olsunlar.
Görünür, bir sıra rəhbər vəzifələrdə oturan idarəçilər yaratıqları korrupsiya mühitinə elə adaptasiya olub ki, təkcə keçmişini deyil, gələcəyini də yaddan çıxarıblar. Adminstrasiya rəhbərinin bir sözündə həqiqət var ki, biz heç vaxt onun 100 minlik ziyalı ordusunun adından danışmamışıq və bütün Azərbaycan ziyalılarını təmsil etmək iddiasında da olmamışıq.
Yüz minlik bir ziyalı ordusu olan cəmiyyətdə Ramiz Mehdiyevin də məsuliyyət daşıdığı bir dövlətin yüksək vəzifəli şəxsləri "möhtərəm hakimin” etiraf etdiyi kimi, adam oğurluğuna biznes fəaliyyəti kimi baxırlarsa, biz o yüz minlərdən deyilik və heç olmaq da istəmirik. Ona görə də, cənab Mehdiyev narahat olmasın, biz öz adımızdan, öz vicdanımızın səsi ilə danışır və hərəkət edirik, elə bu özü də kifayətdir. |
