Главная » 2011»Ноябрь»5 » Britaniya mediası Əliyevi “seçilməyən monarx” adlandırdı
03:02
Britaniya mediası Əliyevi “seçilməyən monarx” adlandırdı
Toni Bleyerin Bakı səfəri yada düşdü; hakim ailənin dəbdəbəli həyatı təsvir olundu
«Bleyer tikinti və digər sahələr üzrə Azərbaycanın seçilməyən monarxına məsləhətlər verir»
«Avtoritar liderlər çoxlu pul xərcləməklə Qərbin eks rəhbərlərini meymun kimi oynadırlar»
Böyük Britaniyanın keçmiş baş naziri Toni Bleyer Azərbaycan hakimiyyətilə yaxşı münasibətlərinə görə yenidən tənqid olunub. Bu dəfə onu tənqid atəşinə tutan isə "The Strange Telescopes” dərgisinin yazarı Daniel Kalderdir. Xatırlardaq ki, Toni Bleyer hələ ötən il Əliyevlərlə isti münasibət zəminində Bakıya səfər edəndə Qərbin ən nüfuzlu nəşrləri onu hədəfə almışdı. Daniel Kalderin yazısına səbəb isə Bleyerin bu dəfə Bakıya gəldiyi missiya ilə Qazaxıstanda peyda olmasıdır.
Kalder BBC media korporasiyasında dərc olunan məqaləsində Bleyerin Qazaxıstanın siyasi-iqtisadi cəhətdən inkişafı strategiyasında məsləhətçi qismində iştirakına etiraz edərək yazır ki, avtoritar rəhbərlərin öz "çirkli” imiclərini yaxşılaşdırmaq üçün PR kampaniyasına milyonlarla pul xərcləməsi liberal-demokratları "yumşaldıb”.
"Keçmiş sovet ölkəsi Qazaxıstanda uzun illərdir avtoritar rejim hökm sürür. Ölkədə keçirilən bütün seçkilər total şəkildə saxtalaşdırılıb. Nursultan Nazarbayevə qarşı müxalif qüvvələr susdurulur. Toni Bleyer isə Qazaxıstanın siyasi-iqtisadi inkişafına töhfə verəcək qrupa özünə yaxın iş adamlarını cəlb edib. Bu, Nazarbayev rejiminin dünyada formalaşmış vəhşi imicinin ”təmizlənməsinə” xidmət edir.
Bleyer keçən il də Bakıya səfəri zamanı metanol zavodunun təməlqoyma mərasimində iştirak etdi və 20 dəqiqəlik çıxışında Azərbaycan hakimiyyətinin ünvanına səsləndirdiyi xoş sözlərə görə 90 min avro qonorar aldı. Metanol zavodunun sahibi isə Azərbaycanın avtoritar rəhbəri Ilham Əliyevin özüdür", - deyə britaniyalı yazar qeyd edir.
Müəllif son illər avtoritar liderlərin külli miqdarda pul xərcləyərək Qərb siyasilərinin, şou-biznes nümayəndələrinin xidmətindən yararlanmasının geniş yayılmış hal olduğunu vurğulayıb, bu xüsusda Çeçenistan prezidenti Ramzan Kadırovun öz ad gününə Hollivud ulduzlarını dəvət etməsini də yada salıb.
"Keçmiş sovet ölkələrinin avtoritar liderləri çoxlu pul xərcləməklə Qərb dövlətlərinin eks rəhbərlərini, tanınmış simaları özlərinin və ətraflarının qarşısında meymun kimi oynamağa məcbur edirlər. Toni Bleyer artıq avtoritar rejimlərlə əməkdaşlıq edən eks hökumət başçısı olmuş liberal-demokratlardan ibarət qrupa daxil olub. O, tikinti və digər sahələr üzrə Azərbaycanın seçilməyən monarxına və məmur-oliqarxlarına məsləhətlər verir”, - deyə müəllif yazır.
Məqalədə ölkəmizin iqtisadi-siyasi durumu haqda qeydlər də yer alıb. Kalder xatırladır ki, Azərbaycan insan haqları və demokratiyanın vəziyyətinə görə beynəlxalq səviyyədə sərt tənqid olunur.
"Ölkədə bütün gəlirli sahələr hakim ailənin nəzarətindədir. Bakıda nəşr olunan ”Azərbaycan mədəniyyəti” jurnalının baş redaktoru prezidentin sevimli qızı Leyladır. Hakim ailənin üzvlərini tez-tez Parisdə keçirilən moda gecələrində görmək olar”, - deyə məqalədə yazılıb.
