BMT Qəddafinin zülmünə göz yaşları ilə etiraz etdi
Ötən gün Liviyadakı vəziyyət BMT Təhlükəsizlik Şurasında da müzakirə olunub. Müzakirə zamanı məlum olub ki, Qəddafi ən qatı və güclü müdafiəçisini də ititb. Bu, Liviyanın BMT-dəki daimi nümayəndəsi, Qəddafinin uşaqlıq dostu Əbdürrəhman Məhəmməd Şalqamdır. Şalqam öz çıxışında BMT Təhlükəsizlik Şurasını Liviyadakı vəhşəti durdurmaq üçün fəaliyyətə çağırıb.
Şalqam deyib ki, Qəddafi əsgərlərinin dinc sakinləri güllələdiyi haqda xəbərlərə əvvəlcə inanmayıb, amma sonradan ölkədə bir vəhşətin baş verdiyinin fərqinə varıb. Diplomat bildirib kİ, Qəddafinin etirazçıları silah gücünə susdurmaq yönündəki çağırışından sonra o da Qəddafi rejiminə qarşı sanksiyaların tətbiq edilməli olduğuna inanıb.
"Buradan Qəddafi qardaşıma səslənirəm, liviyalılardan əl çək” deyən Şalqam BMT Təhlükəsizlik Şurasının üzvlərinə xahişlə müraciət edib: "Xahiş edirəm ölkəmi qurtarın. Tökülən qanı dayandırın. Günahsız insanların öldürülməsinə imkan verməyin”.
Vaxtilə Liviyanın xarici işlər naziri olmuş Şalqam BMT-də Qəddafini yox, Liviya xalqını təmsil etdiyini də sözlərinə əlavə edib.
Şalqam sözlərini bitirən kimi müavini İbrahim Dabbaşi göz yaşları içərisində onu qucaqlayıb. Daha sonra BMT-nin baş katibi Pan Gi Mun və bəzi başqa ölkələrin səfirləri Şalqamın ətrafına toplaşaraq onun əlini sıxıblar.
Liviya diktatoruna qarşı ilk etiraz bayrağı qaldıranlardan Dabbaşi Qəddafinin ünvanına "dəli” deyib və bildirib ki, o, öldürülənə, ya da intihar edənə qədər vəzifədən əl çəkməyəcək, kimsəyə təslim olmayacaq.
BMT baş katibi Pan Gi Mun çıxışında məlumat verib ki, Livanda etirazlar başlayandan bəri təxminən 1000 nəfər öldürülüb. İnsanlar öldürüləcəkləri qorxusu ilə evlərindən bayıra çıxmırlar. Bu şəraitdə zaman itkisi insan itkisi deməkdir. Pan Gi Mun Qəddafi rejiminə qarşı sanksiyalar paketini təcili şəkildə qəbul etməyin vacibliyini vurğulayıb. Daha sonra Təhlükəsizlik Şurası sanksiyalar paketini qəbul etmək üçün bu gün toplanmağa qərar verib.
