Ərdoğan əski Türkiyəyə meydan oxuyur... Bir neçə gün öncə Türkiyənin baş naziri Rəcəb Tayyib Ərdoğan bir vaxtlar həbs cəzası almasına səbəb olan şeiri parlament tribunasından oxudu. Ziya Göyalpın "minarələr süngü, qübbələr dəbilqə; məscidlər qışlamız, möminlər əsgər” sətirləri olan şeir bir zamanlar ona 10 ay həbs cəzası gətirmişdi. Amma bu dəfə onu Türkiyə böyük Millət Məclisi üzvlərinin az qala yarısı ayaq üstə alqışladı...
Bu yazıda Türkiyə dövlətinin yaxın tarixini və qanunlar sistemini təftiş etmək niyyətim yoxdur. Amma bu da tarixdi, qoca Türkiyənin tarixinin bir parçasıdır, özü də xəfifə alınmayacaq bir parçası. Ərdoğan Türkiyədə bir zamanlar qadağan olunan, daha sonra açılan, amma üzərində güclü nəzarət olan "İmam Hatip” məktəbini oxuyub. Hansı ki, bu məktəbi (İmam Hatiplər orta məktəbin son illərinin təhsilini verir) bitirənlər hətta universitetdə siyasət fakültələrinə buraxılmırdılr.
Siyasətə gəlişi də İslam yarlığı ilə həyata keçib. 1983-cü ildə qurulan Rifah Partiyasına üzv olub. Bir il sonra Bəyoğlu qəsəbə təşkilatı sədri, daha bir il sonra isə vilayət təşkilatı sədri seçilib. 1994-cü ildə İstanbul Bələdiyyəsinin sədri seçilən Ərdoğan bu postda 3 il qala bilib. 1997-ci ildə həyat yoldaşının doğulduğu Siirt vilayətində, dəvət edildiyi mitinqdə Ziya Göyalpın qeyd olunan şeirini oxuyub. Məhz bu şeirə görə Diyarbəkr Dövlət Təhlükəsizliyi Məhkəməsi tərəfindən Türk Cəza Qanunun 312-ci maddəsi ilə "Xalqı din və irq ayrılığı məqsədilə kin və düşmənçiliyə təhrik etməkdə” günahlandırılaraq həbs cəzası alıb...
14 avqust 2001-ci ildə Ərdoğan Fəzilət Partiyasındakı ideya dostları ilə birlikdə yeni, mülayim İslam xəttini tutan Ədlət və İnkişaf Partiyasını yaradır. 2002-ci il noyabrın 3-də keçirilən parlament seçkilərində üzərində hələ də məhkumluq olan Ərdoğanın partiyası səslərin çoxunu qazanır. "Cəzalı” sədr isə yeni parlamentdəki tərəfdarlarının səsləri ilə təmizə çıxaraq Siirtdən (!) müstəqil namizəd kimi deputat seçilir və baş nazir olur. Sonrakı illərdə keçirilən bütün seçkilərdə Ərdoğan bir qayda olaraq seçkiləri qazanır... **** Türkiyə siyasətinə siyasi İslamı Ərdoğan gətirməsə də, islamçıların siyasətdəki uğurları, ardıcıl 3 ümumxalq seçkisində qələbə çalmaları onun adına yazıldı. Türkiyə iqtisadiyyatında baş verən dəyişiklikləri sadalamağa ehtiyac yoxdur; amma xarici siyasətdə yeni Türkiyənin memarı Ərdoğan oldu. Təbii ki, Türkiyənin baş nazirinin ünvanına hər gün onlarla tənqidi və bir o qədər də tərif dolu yazılar həsr olunur. Amma tənqid edənlərin də, tərif yazanların da bir ortaq nöqtəsi var: Ərdoğan Türkiyəni, onun dəngələrini, oyun qaydalarını dəyişdi. Sabah Ərdoğan olmaya bilər, amma Türkiyə artıq başqa Türkiyədir, heç bir şey əskisi kimi olmayacaq. **** Deyirlər siyasət kinli olmağı sevməsə də, inadkarlıq siyasətçi üçün mühüm göstəricidir. Bir zamanlar küçədə söylədiyi üçün siyasi fəaliyyətinə yasaq qoyulan, həbsə atılmasına səbəb olan şeiri bu həftə Ərdoğan Türkiyə Böyük Millət Məclisinin tribunasından söylədi.
Əslində bu, şeir oxumadan və ya sıradan bir baş nazir çıxışından daha çox meydanoxuma idi. Ərdoğan əski Türkiyəyə meydan oxuyurdu. Artıq Türkiyədə bir çox şeylərin dəyişdiyini deyirdi.
