Bu gün qəzetimizin ilk dərc günündən iki il keçir. Niyə bu qəzeti təsis elədim, buna nə səbəb oldu, bunları yazmaq istəmirəm, sadəcə onu deməklə kifayətlənirəm ki, həmən ərəfədə Talışın bu qəzetə ehtiyacı var idi.....
D-R HİLAL MƏMMƏDOVUN MƏHKƏMƏLƏRİ
Əslində qəzetin həftəlik dərcini bərpa etmək lazımdır ki, bu məhkəmə proseslərini vaxtında işıqlandıra bilək. Çox təəsüf ki, bizim "tolerant” hökumətimiz 31 adda qəzetə 2 milyon pul ayırsa da, həmən siyahıda Azərbaycanın "müsəlman” azlıqlarını təmsil edən xalqların qəzetlərinin adları olmadı. Heç ümüd də eləmirəm ki, bundan sonra da bu hökumət hansısa "müsəlman” azlıqın qəzetini maliyyələşdirsin. Necə can verə-verə çıxmışıq, elə can verə-verə də çıxacağıq. Sözüm bunda yox, yəni hər həftə dərc oluna bilmədiyimiz üçün məhkəmələrdən müfəssəl məlumat verib, oxucumuzu təmin edə bilmirik. D-r Hilal Məmmədovun məhkəmələri haqqında qısaca onu yazmaq istəyirəm ki, bu məhkəmələr artıq məni iyrəndirib. Nə qədər olar hakimin ittihamçı roluna baxmaq? Nə qədər olar simasız insanların şahid ifadələrinə qulaq asmaq? Bu şahid-insanlar anlamırlar ki, sifarişli məhkəmənin baş ifaçısı - hakimin "düz danışacağına and iç” kəlməsinə "and içirəm” deyib, hakimin köməkliyi ilə yalan ifadə vermək, elə Xıdoya asi olmaq deməkdir. Necə? Necəsini anladım da, müqəddəs kitabımız Qurani_Kərimdə Xıdo bizə dəfələrlə xatırladır: "And içəndə Mənə and iç”, "Yalan danışma”, "Başqasının haqqını yemə” və s. Demək bu andlılar istəməsələr də Xıdoya and içib, onun adına yalan danışırlar, baxmayaraq ki, hələ məhkəməyəcən Xıdonun tapşırıqlarını pozmuşdular, yəni d-r Hilal Məmmədovun cibunə narkotik atıb, onun azadlıq haqqını mənimsəmişdilər. İndi də bu absurd məhkəmədə hakim d-r Hilal Məmmədova deyir ki, sən sübut elə ki, narkotiklər sənin deyil. Dəhşəti görürsünüzmü? Dünyanın heç yerində belə şey yoxdur, kimsə öz günahsızlığını sübut etməməlidir, əgər o suçludursa, onun günahını dəlillərlə sübut edib, heç bir boşluq saxlamırlar. Şahid-əməliyyatçı deyir ki, biz bir ay idi ki, müttəhimin narkotik alveri ilə məşğul olduğu barədə məlumatlı idik və onu güdürdük. Bəs hanı bir ayın ərzində d-r Hilal Məmmədovun narkotik alan, satan yerdə çəkilmiş şəkilləri? Bəlkə elə siz böyük bir narkokartelin, hansı ki, sizin idarənin alverinə şərik çıxıb, izinə düşmüşdüz, niyə hamını ifşa etmədiz? Hətta d-r Hilal Məmmədovun bu narkotiki İrandan aldığını da qeyd edirlər, bəs niyə bu narkotiki İrandan Azərbaycana gətirənləri ifşa etmədiz? "Bəs niyə”lər çoxdur, çox təəsüf ki, hakimin dövlət ittihamçısı rolunda olduğu məhkəmələrdə ədalət yox, ətalət qalib gəlir və bu suallar elə havadan da asılı qalır. Burda dayanmaq istəyirəm, Xıdo özü hər kəsin əməlini bu dünyada qiymətləndirir, qisası qiyamətə saxlamır, Xıdonun qisası isə çox ağır olur. Məhkəmə isə d-r Hilal Məmmədovun bütün konstitusyon hüquqları pozulmaqla davam edir. Davam edir 37.....
ZİNDANDA BİR İL...
Bu ayın 21-i d-r Hilal Məmmədovun saxta ittihamlarla həbsindən bir il ötdü. Bu bir ildə biz onun AZADLIQa qovuşması üçün heç nə edə bilmədik, haqq səsimizi də "ikra yeyən diplomatlar” eşitmək istəmirlər, görmədikləri ikradan nahara yeyib, neft dollarları ilə ciblərini doldurub "Bakıda siyasi məhbus yoxdur” bəyanatlarını verirlər. Biz bu zavallılara başa sala bilmirik ki, bu "tolerant” ölkədə talış ziyalılarına qarşı xüsusi və amansız bir kompaniya aparılır, biz bu zavallılara başa sala bilmirik ki, bu gün bu kompaniyaya "dur” deyən tapılmasa, bunun çox acı nəticələri ola bilər. Biz bu zavallılara həqiqətləri anlada bilmədikcə, d-r Hilal Məmmədov zindanda qalmaqdadır. Alimi isə zindana salanların aqibətləri heç vaxt yaxşı olmur....
MƏDƏNİYYƏT MƏRKƏZİ
Mən, Respublika Talış Mədəniyyət Mərkəzinə sədr seçilən kimi bütün tanışlara bildirdim ki, artıq siyasi motivli yazılarımı durduracam, siyasi təşkilatların tədbirlərinə qatılmayacam, çünki artıq statusum ancaq mədəniyyətimizin inkişafı üçün çalışmamı zəruri edirdi. Fikirləşdim ki, dövlət də bu işdə maraqlı olar, mənə maddi və mənəvi dəstək verər, çətinliklərimizin aradan qaldırılmasında yardımçı olar və sairə və ilaxır. Ancaq sən demə mənim saydığım ilə "tolerant” yapçıların saydığı əks-mütənasib imiş. Keçid alım "mustafa”ya.
Demək, Respublika Talış Mədəniyyət Mərkəzinin əlimizdə heç bir sənədi yoxdur, nə Nizamnamə, nə Məramnamə, nə üzvlərin siyahısı, nə o, nə bu.... Sənədsiz isə fəaliyyət göstərmək, həmən fəaliyyəti əsaslandırmaq çox çətin görünür, yəni istədikləri vaxt adama "qeyri-qanuni fəaliyyət” damğasını vurub, cinayət işi aça bilərlər. Bütün bunları nəzərə alıb, Respublika Talış Mədəniyyət Mərkəzi olaraq Ədliyyə Nazirliyinə müraciət etdik ki, bizi lazım olan sənədlərlə təmin etsinlər. Biz də həmən sənədlər əsasında öz fəaliyyətimizi yenidən bərpa edə bilək. Məni Ədliyyə Nazirliyinin müvafiq qurumuna dəvət edib "tanışlıq söhbəti” apardılar. Həmən söhbətdə konkret olaraq işləmək əzmində olduğumu, dövlətə qrand layihələri vermək istədiyimi, Mərkəz üçün ofis tələb edəcəyimi və bütün bunları edəndən sonra Mərkəzi gənclərin ixtiyarına buraxacağımı bildirdim. Görünür "tolerant” məmləkətimizdə Talış Mədəniyyət Mərkəzinin yenidən, yeni güclə fıaliyyətə başlamasını, həmən Mərkəzdə gənclərin bir araya toplaşmasını istəmirlər. İstəsəydilər fəaliyyətləri seçkidən-seçkiyə "sezilən” öz cib partiyalarına, fəaliyyəti ancaq qrand alıb yemək olan "şəxsi” QHT-lərinə "hədiyyə” etdikləri bir neçə otaqdan ibarət "ofislərdən” bizə də verərdilər. Həmən qranddan bizə də cibxərcliyi ayırardılar. Ancaq etmirlər, belə görürəm heç etmək fikirləri də yoxdur. Bir şeyi isə unudurlar: mən, RTMM-nin sədri olaraq artıq fəaliyyətdəyəm, artıq üzvlük biletləri, üzvlərin şəxsi kartoçkaları hazırdır, tezliklə RTMM öz fəaliyyətini tam bərpa edəcək, pislik isə yenə də sənə qalacaq, mənim "tolerant” hökumətim...
P.S. Məni isə "qeyri-qanuni fəaliyyətdə” suçlaya bilməzsiniz, yeni sədr olaraq boynuma düşən ilk vəzifəmi yerinə yetirmişəm: Respublika Talış Mədəniyyət Mərkəzinin son konfransının protokolunu sizə təqdim etmişəm, məni qəbul edib-etməməyinizdən asılı olmayaraq mən özümü QANUNİ sədr sayıram və mənə etimad göstərənlərin, elə göstərməyənlərin də ümüdüni doğruldub, yaxın müddətdə Mərkəzin fəaliyyətini tam bərpa edib, gənclərin ixtiyarına verəcəm.
P.S.S. Bəzi "dostların” nəzərinə: Mənim əleyhimə kimləri isə hürdürtməyin, mən bir amalla yaşayıram: dalımca danışan varsa, demək mən ondan ən azı bir addım irəlidəyəm!
Rafiq CƏLİLOV
"Tolışon Sədo” qəzeti N:53
26 iyun 2013-cü il
