 Rədd ol(ma)sun rüşvət!!!
Hər kəsin, hər yazarın yaza bilmədiyi, yazmaq istəmədiyi bir mövzu olur. Mənim də yazmaq istəmədiyim bir mövzu var, "biganəlik” mövzusu! Yox, mən Azərbaycan iqtidarının xalqa biganəliyindən yazmayacam, mən heç korrupsiyaya qurşananların "korrupsiya ilə mübarizələri”ndən də yazmayacam, baxmayaraq ki, həmişə bu mövzu ilə bağlı dövrü mətbuatda çıxış eləmişəm. Mən heç vətəndaşımızın dünya düzənindəki dəyişiklərə, özünün və övladlarının gələcəyinə biganəliyindən də yazmayacam, Stalinin sözü olmasın, biz düzələn deyilik. Amma mən rüşvət ilə ailə saxlayanların rüşvətlə məcburi mübarizəsindən yazacam. Yazıma başlamamışdan əvvəl bir özbək lətifəsini sizlərə "nəql” eləmək istəyirəm.
Lətifə: Uzaq otuzuncu illərdə, dostunun təkidi ilə, bir özbək kommunist partiyasına daxil olmaq üçün ərizə verir. Ərizə partiya rayon təşkilatının müzakirəsinə çıxarılır, hərə bu özbəyə bir sual verir, növbə çatır "partkoma”, partkom bu özbəkdən soruşur:
- Basmaçların (orta Asiyada Sovet hökumətinə qarşı vuruşanlara "basmaç” deyirdilər) dəstəsində vuruşmusan?
Özbək "hə” cavabını verir, partkom növbəti sualını verir:
- Şura hökumətinin düşməni, "Xan” ləqəbli basmaçbaşını tanıyırsan?
Özbək, sevincək "əlbətdə tanıyıram” cavabını verir, partkom özbəyə "səndən kommunist olmaz, sən Xanın silahdaşı olmusan” deyərək, ərizəsini rədd edir. Özbək çölə çıxan kimi dostu ona iradını bildirir; "deyərdin ki, Xanı tanımıram, çətin idi?” Dostunun iradına özbək belə cavab verir:
- Mən kimə, Xana deyəydim ki, səni tanımıram?...
…İndi bu korrupsiya adlı "elmi işin dosentləri”, analoqsuz rüşvət modelini kəşf edənlər: basmaçlar: yığılıblar bir yerə və korrupsiya ilə "mübarizəyə” start veriblər. Telequtular da abırsız-abırsız bu "mübarizə otağından” reportajlar hazırlayıb, bizi "məəə” yerinə qoyurlar. Əslində biz çoxdan, hələ heç Jirinovski bizim "məəə” diaqnozumuzu qoymamışdan çox-çox əvvəl "məəə” yerindəydik və görünən də odur ki, biz bu yerdə "möhkəmlənmişik”. İndi bu "basmaçlar” bizdən "Xan”ın yerini soruşurlar, gözümüzə kül üfürmək üçün bir-iki "xırdabuynuzlunu” işdən çıxarırlar, (daha doğrusu başqa işə keçirirlər) bir-ikisinə töhmət verirlər, bu da olur "korrupsiya ilə mübarizə” Amma bir nəfəri də olsa belə həbs etməyiblər və etməyəcəklərdə! Çünki rüşvət almaq üstə Azərbaycanda tut-ha-tut başlasa, zindandakı kameraları tam boşaltsalar da, bütün "rüşvətxorlara” yer çatmayacaq, ona görə də "iribuynuzlu basmaçlar” "aşağılara” "rüşvəti hələlik (manatla) almayın, qoy "məəə”lər bir az sakitləşsinlər. Azərbaycanı naMübarəkin Misirinə çevirməyin” tarixi tapşırığını veriblər. Vallah, mən bu basmaçları başa düşmürəm, axı rüşvətxorları kim tutacaq, işləri rüşvət almaq olan hüquq-mühafizə orqanları? Yox əşi, onlar tutduqları vəzifənin "aylığını” belə gecikdirmək cəsarətində deyillər, o ki qaldı hansısa "Xan”ı tutmaq. Mən həmdə bu "ixtidarı” başa düşmürəm, onlar bizim hüquq və azadlıqlarımızı əllərimizdən ala-ala gedirlər, indi də bizim rüşvət vermək "hüququmuzu” əlimizdən alırlar, fərz edirsiz ki, əllərdə "artıq”, daha doğrusu rüşvət üçün ayırdığımız neçə milyon pul qalacaq? Rüşvət üçün "ayırdığımız” pulları neyləyək? Bəs rüşvətlə dolananlar nə yesinlər? Rüşvət olmasa "ayliqlar” "rüblüklər” "illiklər” haradan maliyyəşəcək? Bax bu suallar tək məni yox, əksər Azərbaycan vətəndaşlarını düşündürür...
O ki qaldı iqtidarın rüşvətə qarşı müvəqqəti, analoqsuz ("anlaqsızda” oxumaq olar) mübarizəsinə, bu mübarizə adamın özünün-özünə sillə vurmasına oxşayır, "əl” nə qədər sürətli gəlsədə, üzə yavaş toxunur! Bizə təzə "əl” lazımdır, köhnə sifət dəyişməsə də, olar!.
Rafiq Cəlilov,
Celilovrafiq@mail.ru
|
