 Azərbaycan növbəti əsgər qırğınının şokunu yaşayarkən
Dünən Azərbaycan növbəti əsgər qırğınının şokunu yaşayarkən ali baş komandan Ilham Əliyev hansısa mebel sexinin açılışında qırmızı lent kəsirdi. Vecinə deyilmi bu adamın?! Qırmızı lentləri kəsə-kəsə ölkənin sonu gəldi. O sexin lentini iqtisadiyyat naziri, ya ağsaqqal bir mədəniyyət adamı kəssə, dünyamı dağılacaqdı? Bəs bu əsgər analarının suallarına kim cavab versin? Ölkəyə kim izah edəcək baş verənləri?
Qatil bir rejim ölkəni talesiz bir günə gətirib. Ordudakı mühiti illərdir yazırıq. Ayrıca orduya yönəlməyə də lüzüm yoxdur, ölkənin hər yeri eynidir. Ilham Əliyev ona yaltaqlananların tərifləri fövqündə özünü və ölkəni problemsiz görür, ölkə isə idbarlıqlara sürünüb...
Əsgəri bu ölkədəki saxta seçkilər, korrupsiya, rüşvətxorluq, tərəfkeşlik, özbaşınalıq, yaltaqlıq, səriştəsizlik öldürür. Elə mühit yaranır ki, haqsızlıq haradasa çat verməli olur, haradasa əngəli aşa bilmir, haradasa insan insana qənim kəsilir. Ədalət itib, pul gözləri örtüb, qazanc dalınca düşən hər vəzifəli, hər rütbəli zəliyə dönüb. Hər yanda yırtıcı, ədalətsiz, boğucu, öldürücü mühit yaranıb. Absurd talelərə hakim kəsilib.
Pul bu ölkədə nəyə qadir deyil?...
Başdan-ayağa korrupsiyalaşmış sistemi düşünün. Yuxarılar təkcə aşağıların yığdıqlarından pay almır. Onlar daha ciddi işlərlə məşğuldur. Neft alveri, tank alveri, bank alveri, böyük tenderlər və s. Dövlət başdan-ayağa oğurluğun əlindədir. Nəzarət isə yoxdur, nəzarət oğurlanan pulların miqdarına və bölüşdürülməsinədir. Hər kəsin oğurlamaq haqqı yaranıb. Ölkədə bir qrup oğurlayırsa, başqaları niyə oğurlamasın? Mühitimiz budur - oğurluq və pul mühiti.
Pul hər yeri ağuşuna alıb, istənilən nəzarəti sındırır, istənilən qapını açır, istənilən möhürü vurdurur, istənilən tenderi alır, istənilən sertifikatı təsdiq edir. Pul heç bir sərhəd tanımır, sərhəddən tapança keçirir. Pul heç bir ölçü tanımır, sementsiz körpü, bina tikdirir, asfaltsız yol saldırır. Pul ordu, qayda, qanun, pusqu, qoruq da tanımır. O, vəzifədən, borcdan, anddan üstün olub. Pul ədalətsiz, özbaşına mühit yaradaraq, ordunu başsız qoyur, onu insanı boğan bir sistemə çevirir, əsgəri əsgər yoldaşını öldürməyə, intihara vadar edir...
Əsgərlər bu cür aydın səbəbdən bir-birini qırır. Bunu görəsən nə qədər yazmaq olar? Amma iş ondadır ki, həqiqi hərbçi Canmirzə Mirzəyevin ordudakı problemlər haqda yazdıqlarını dərc etdirə də bilmirik artıq. Məgər bunun da qabağını alıb pul?! Səfərbəylik yazılarını dərc edən Eynulla isə həbsdədir...
Ey yaltaqlar! Yal naminə Ilham Əliyevi müqəddəs elan edib, istədiyinizi edərkən siz həmin əsgərlərin ölümündə iştirak etmisiniz.
Ey mandatlılar! Mandat alıb bir ölkəni bir ailənin ixtiyarına verəndə, siz qətlə bulaşmısınız.
Ey vətəndaşlar! Siz haqsızlığa nə vaxtsa kömək etmisinizsə, daha 7 ananın oğlunun ölümünə yaşıl işıq yandırmısınız.
Növbə kimin oğlunadır görəsən?
Mübariz Ibrahimov üçün guya ağlayan iqtidar nökərləri, bu əsgərlər üçün niyə ağlamırsınız? Səsiniz niyə çıxmır? Onları doğan analara sözünüz varmı? Bəli, yuxarıdan tapşırıq gözləyirsiniz ağlamaq üçün. Sizin qəlbiniz tapşırıqla gələn vətənpərvərliklə doludur. Sizin alnınıza tapşırıqla ağlamaq yazılıb…
Şahvələd ÇOBANOĞLU,
Azadlıq qəzeti
|
