 Cəsusluq çətin peşədir, hər yerindən duran cəsus ola bilməz. Yox, söhbət Hilal Məmmədovdan getmir, onun cəsusluğu da ola bilər, narkobaronluğu da, hələm istəsə Amerika kimi nəhəng dövləti məhvi-mühvi eliyər, faşist Almaniyasını, Yuqoslaviyanı, SSRİ-ni bəyəm Hilal Məmmədov tək yerlə-yeksan eləmədi? Yəni ki, Hilal Məmmədov "dağıdıcılıq” qabiliyyətinə görə həbs edilib, yoxsa ay nə bilim "davay dosvidaniya”, "Dubay dosvidaniya”...
Bəşər elə bəşərdir, Allah ola bilməz
Dubay deyən kimi yadıma Suriya düşdü, daha doğrusu onun Allahlıq iddiasında olan prezidenti Bəşər Əsəd! Bu həmən Bəşər Əsəddir ki, öz xalqını qırmaqdan belə çəkinmədi, bu həmən Bəşər Əsəddir ki, Qəddafinin konalizasiya turbasından çıxan meydi onu ağıllandırmadı. Vallah deyim ki, Bəşər pis oğlan idi, yalan olar, Bəşər yaxşı oğlan idi, ətrafında olanlar yağ-bal içində üzürdülər. Düzdür, Suriya xalqı bu yağ-balı görmürdü, ancaq nə dəxli var ki? Əsas odur ətrafın yağ-bal içində üzsün, öz harın simalarını, harın toylarını YouTube-dən gözümüzə soxsunlar, ayda 50 manat təqaüd alan I qrup əlil də həmən toylarda ciblərdən paçka-paçka çıxıb, göyə sovrulub, yerə xalı kimi sərilən, harınların ayaqlarının altında qalan, üstündə Amerika Prezidenti Benjaminin "tapdalanan” şəkili olan, minlərlə 100 dollarlıq əskinaslara həsədlə baxsın. Bax, Bəşər Əsəd də Benjaminin zibilinə düşdü, Hilal Məmmədov ona çox dedi "ay Bəşər, gəl Benjamini ayaqlar altına sərmə, Qarabalanın xətrinə dəyərsən, səni ordan Əsdirər”, qulaq asmadı, dedi "burda mənəm, Bağdadda Səddam Hüseyn”, nə isə, deyəsən mövzudan yayındım, axır Hilal deyən oldu, Bəşəri bəşər övladları Əsdirdilər!
Pulsuz Narkobaron
Narkotiklə heç vaxt maraqlanmamışam, ancaq arada telequtuda narkotacirləri görürəm, maşallah-maşallah, bizim nazirlər kimi yaşayırlar. Heç bilmirəm hardan başlayım? Hilal məni elə məngənəyə salıb ki, ona torba tikənlərin idarələrinin adlarını yazmağa qorxuram, sabah mənə xaral tikərlər, zatən hamısı "torba tikən universiteti” qurtarıblar, ancaq deyəsən onu da pulnan. Niyə bu qənaətə gəlmişəm? İndi deyərəm. Demək Hilal Məmmədovun cibindən 5 qrqm heroin çıxır, olsun, niyə də çıxmasın ki? Sonra evindən 30 qram heroin çıxır, bu da olsun, əla, burda qeyri-adi heç nə yoxdur. Bu onu sübut edir ki, Hilal Məmmədov narkobaron imiş. Ancaq mənimçün bir şey maraqlıdır ki, necə ola bilər ki, evindən bir neçə min manatlıq heroin çıxan "narkobaronun” cibindən bir manat da olsa pul çıxmayıb? Vallah bizim bu operativ işçilər burda özlərini yandırıblar. Ola bilməz axı narkobaron olasan, evində də bir manat da olsa pul olmasın. Bax bu çox böyük "əməliyyat” səhfidir. İndi bütün Azərbaycan deyir ki, evində 35 qram heroin olan şəxsin heç olmasa "dar gün üçün” (yəni ilişəndə canını satın almaq üçün) bir 50-60 min nəğd pulu olmalı idi. İndi bu əməliyyatçılar o qədər tələm-tələsiyə düşüblər ki, mərkəzi bankdan bu xüsusat üçün ayrılmış pulu götürməyi unudublar. İndi ay başınıza dönüm, evində 50-60 min demirəm, maqazindəki "nisyəni” bağlamaq üçün 3 manat tapılmayan, ancaq əvəzində bir neçə min manatlıq heroin saxlayan narkobaron görən olubmu? İndi mən bizim hörmətli Baş Prokurorluqla DİN-in bu sabatsız məlumatı ilə camaatı necə inandırım ki, Hilal narkobaron idi?
Qəzetin dərdi var...
Yox, maliyyə çatışmamazlığından yazmayacam, görünən kəndə nə bələdçi? Mən dövlətimizin qoçubalalarından yazacam. Bu həmən qoçubalalardılar ki, Azərbaycan Qanunlarını saya salmırlar, öz məntiqsiz qanunlarına söykənirlər. Məsələn: Hilal Məmmədovun həbsindən sonra mətbuatyayımı şirkətlərinə, daha doğrusu köşklərə qəzeti satmamaq əmr olunub. Fakt? Bu da fakt: Demək iyun ayında siqnal aldım ki, Masallıdakı köşkdə qəzet yoxdur. "Ola bilməz” dedim, ancaq hər ehtimala qarşı həmən köşkün Bakıdakı baş ofisinə getdim və bildirdim ki, Masallıda iki həftədir ki, qəzet satılmır. Baş ofisdə də mənə "ola bilməz” deyib, hər ehtimala qarşı kompyuteri açdılar və ... məlum oldu ki, Masallıda qəzet satan konkret olaraq bu qəzetin satışından imtina edib. Səbəbini soruşdum. Mənim yanımdaca ona zəng edib bunun səbəbini soruşdular. Məlum oldu ki, sahə müvəkkili gəlib köşkdəki qəzetləri müsadirə edib və satıcıdan "bir daha bu qəzeti satmaram” iltizamı alıb. Səbəb kimi isə onu göstəriblər ki, biz qəzeti həm də əl ilə yayırıq və bu "dövlətçiliyin laxlamasına gətirib çıxarda bilər”. Əhsən belə təfəkkürə. Təbii ki, mən öz iradlarımı bildirdim, həmən iradlar Masallıdakı köşk satıcısına da bildirildi və sahə müvəkkilinin bu işdə heç bir səlahiyyəti olmadığı vurğulandı. Sağollaşıb çıxdım, yox, bu sahə müvəkkilinin işi deyil, suyu üfürə-üfürə içən sahə müvəkkillərində bu cəsarət ola bilməz. Demək göstəriş daha yuxarıdan verilib. Buna mən "Metro Servis” mətbuat yayımı şirkətində olarkən əmin oldum. Oxucularımızın, "müəllim metrolarda qəzet yoxdur” siqnalı məni vadar etdi ki, metro stansiyalarına baş çəkim. Əksər satıcılar "bidənə gəlmişdi, satılıb” desələr də, bəziləri ümumiyyətlə belə qəzet almadıqlarını vurğuladılar. Üz tutdum şirkətin baş ofisinə, Hilal Məmmədovun həbsinədək şirkətə verdiyim qəzetlərin 30 faizi "qayıtmışdısa”, həbsdən sonra verdiyim qəzetlərin 90 faizi "qayıtmışdı”, demək qəzet gizlədilir! Şirkət əməkdaşına "qəzetləri niyə gizlədirlər?” sualını versəm də, yerə dikilmiş baxışlardan başqa bir şey görmədim. Demək qəzetə rəsmən yasaq qoyublar. İndi mən əmin oldum ki, bu dövləti bizim qəzetimiz yox, onun harın və özünütanımaz sahə müvəkkilləri, həmən sahə müvəkkillərinə bu tapşırığı verən və onlardan da dəfələrlə harın olan səlahiyyət sahibləri, mətbuata təzyiq edən, alimin cibinə narkotik at(dır)an kəsimlər "laxladacaq”, bu dövləti onun səhf milli siyasəti "laxladacaq”, nə qədər gec deyil bu siyasət dəyişilməlidir, yoxsa zindanları alimlərlə doldurmaq çıxış yolu deyil.
Alim hər yerdə alimdir
Hilall Məmmədovun "Azadlıq” qəzetinə göndərdiyi yazıları oxudum, çox səmimi yazıb, məni bir şey düşündürdü: Hilal müəllim yazır ki, məni bütün kolon alim kimi qarşıladı. Digər yazdıqlarına şərh vermək fikrim yoxdur, ancaq bu cümlə məni çox düşündürdü: Demək həqiqət hələm ölməyib, demək həqiqət öz yerini tutmaq üçün çarpışır, demək yaxşılıqlara doğru inkişaf var, demək bədbin olmağa dəyməz – xalq əsl alim övladlarını tanıyır! Bu isə balaca iş deyil ha....
Müdafiə komitəsi
Biz müdafiə komitəsi olaraq Prezidentə Hilal müəllimin həbsi ilə bağlı müraciət etdik, indi Ramazan ayıdır, bu ayda Allahın hökmü ilə şeytan zəncirlənir və bu ayda edilən savab işlər Yaradan tərəfindən bir neçə qatı ilə mükafatlandırılır. Ümüdvarıq Prezident bizim səsimizi eşidəcək və tezliklə Hilal Məmmədov evində olacaq!
Etiraz aksiyaları
Bu aksiyalar gündən-günə böyüməkdədir. İlk olaraq bizim Azərbaycanda YAP-dan və onun "peyk”lərindən başqa bütün siyasi və ictimai qurumlar Hilal müəllimin həbsinə etiraz etdilər, sonra bütün beynalxalq qurumlar öz etirazlarını bildirdilər, daha sonra iki piket Moskvadakı Azərbaycan səfirliyi qarşısında, bir piket isə Kişinyovdakı Azərbaycan səfirliyi qarşısında keçirildi. Avropa Birliyinin sədri Azərbaycanın Strasburdakı səfirinə Hilal Məmmədovun həbsindən narahat olduğunu çatdırıb. Bütün tələblər eynidir: Hilal Məmmədova Azadlıq! Ola bilməz ki, bir nəfər adı belə məlum olmayan "donos” yazanı eşidib Hilalı tutan bu hökumət yüzlərlə tanınmış insanın "Hilala Azadlıq” çağırışını eşitməsin, eşitməzsə demək eşidilənəcən bu çağırışlar ediləcək, demək Azərbaycanın "bəh-bəhli” imicinə özləri balta çalacaqlar, baltalarınızı iti saxlayın həzarat.....
İ.S. "Azərbaycan” qəzetinin baş redaktoru Bəxtiyar Sadıqovda "danışdı”, kişi Hilal Məmmədovu "dövlətə xəyanətdə” suçladı, bu bir daha sübut edir ki, bu iş sifarişlidir. Bu barədə daha ətraflı gələn nömrəmizdə
Rafiq CƏLİLOV,
celilovrafiq@mail.ru,
"Tolışon Sədo” qəzeti, nöm: 25 (37), 27 iyun 2012-ci il
|
