 Tolışə poeziyəku vıjniyəyon
İ tərəfış bande, i tərəf dıyoy,
Vəyşt ki votedən, əv ənə iyoy. ( Z. Əhmədzodə)
Az əğılım, tı çımı mo,
Be zındənim ıştıku co,
Bə kon məhol eğandom ro,
Bıpərom az, bışum çanə,
İyən tıniş çımı lonə! ( Səməd Vurğun)
Həsrət ome dıli sədə bino be,
Çokə rujon çəşi vədə kino be,
Vallah, nome çı rujqori qıno be,
Bə dast nome qıləy qədə qirəvə,
Xosə məhol, ome nıznəym bəştı və.
Ha sor əşim, bənem obən sıə vılon,
Qırdə əbi el-əsobə, əğılon,
Rujqoriku qəp əjənin di yolon,
Bərğ əjəni şıvə şəvdə astovə,
Xosə məhol, ome nıznəym bəştı və.
Avaqurə iyən əyo çəkedə,
Osmoni dim rizə-rizə təkedə,
Voə-voşiku ku- kəfşənon pokedə,
Bərəkətış varde ijən sio avə,
Xosə məhol, ome nıznəym bəştı və.
Umburə do çı Babəki kəşonin,
Xımbəlonə, Viləş iştı çəşonin,
İsqilon ov bənə arsi ruşinin.
Bə viriskin, Həşi bəvon dətıvə.
Xosə məhol, ome nıznəym bəştı və.
Xandəxonsə fərəğətin əlelon,
Soğnə kardə bə so yolə bəlelon,
Parçinədə huşəş kardə hındılon,
Beledəbe colnə mandə pəsəvə,
Xosə məhol, ome nıznəym bəştı və.
Yaşməğ qəvo so dərıtdə nuə vəyu,
Bəletiku əğlon kardən çəy-məyu,
Tomononsə oğandə bıə sı əyu,
Tolışə jen tumo kardə moy ləvə,
Xosə məhol, ome nıznəym bəştı və.
Niməyjə ro, jenon nıştən marzisə,
Oğandə bıə qədə sufrə darzisə,
Bə hes-bəsin, sıxan şedə bırzisə,
Eğətəşe tukon çəvon qəv-qəvə,
Xosə məhol, ome nıznəym bəştı və.
Əğlon kardən noxotədə sio xəmən,
Bıştə qılon peşinedən bə çimən,
Veye nemət, bole ruzi, ha Vətən,
Bə kam nıbu ıştı qıləy doy livə,
Xosə məhol, ome nıznəym bəştı və.
Kəfşəniku oqardedə mol-mələ,
Kavuə aləf kinon vardən de şələ.
Kumə vədə eqınedə vəlvələ,
Vitdə balə zandəqoysə şanqovə,
Xosə məhol, ome nıznəym bəştı və.
Haci* gıləy şəxse – həlim, nurani,
Nomıj votdə, maçə kardə Ğıroni,
Əv votdə ki bənəy tolışi vırə ni,
Fəğət dınyo ve vırondə əv nəvə,
Xosə məhol, ome nıznim bəştı və…
Moəm məzore, tıku əyo əmonət,
Dəçəy rufi hejo kardəm az sebət,
Moəm həni ni, sutdə mıni ın xıvət,
Çı dardiku dıli yarəm ve xəvə,
Xosə məhol, ome nıznəym bəştı və.
Xido ıştən şo bəkarde har kəsi,
Şo bılbılon rınə bəkan ğəfəsi.
Bəxtiyarim, jidəm deştı həvəsi,
Ğısmət bəbu, ijən bomeym idə və,
Xosə məhol, ome nıznəym bəştı və.
*oyo Tolış xəlği sipriş Hacı Cahanğir Suvarov nəzədə qətə bə
|
