Mehdibəy SƏFƏROV
J. J. Russo: “Yoldan çıxmağın min yolu, HƏQİQƏTİN isə cəmi bir yolu var”
Hörmətli oxucu, çox istərdim ki, bu yazını ürək ağrılarım və bəzi riyakar insanlara qarşı dərin narahatçılıq hisslərimin ifadəsi kimi qəbul edəsiniz. Əslində, bir neçə kəlmə: “Bəsdirin yalana ayaq düzəltdiniz! Qurtarın bu simasızlığı!” – deyibən, susmaq da olardı. Amma səbrin, hövsələnin də bir əndazəsi var, axı...
Diqqət yetirin, Eynulla Fətullayev 21 mart 2014-cü il tarixdə təsisçisi və redaktoru olduğu “Haqqın.az” portalında bizləri, yəni Azərbaycan Respublikasının Talış kökənli vətəndaşlarını Novruz bayramı münasibəti ilə necə “təbrik etdi”?.. O, ölkəmizdə milli zəmində münaqişə yaratmağa hesablanmış “Talış tətikçilərini Azərbaycanın üstünə kim qaldırır?..”adlı “araşdırması” ilə Talış xalqını özünəməxsus tərzdə “sevindirdi”. Daha sonra, öz yazdıqlarına əlavə olaraq Facebook səhifəsində bəyan etdi ki, gərək Azərbaycan bu cür məsələlərdə İsrail dövlətinin konsepsiyasından yararlansın. Belə çağırış edən insanlar məhv etməlidir (?!) və s. və i.a. Həqiqətən, insan sinizminin həddi-hüdudu olmazmış!..
Yəqin ki, bütün bunlar E.Fətullayevin “məşəqqətli məhbəs günlərində” Hilal Məmmədovun, Ataxan Əbilovun, Elxan Əlibəylinin və digər cəsarətli insanların timsalında, Talış xalqının ona etdiyi yaxşılıqların əvəzinə qaytardığı “borcudur”!
Əslində, bu günkü reallıqlara proqmatik yanaşsaq, elə də ciddi bir hadisə olmayıb: adam, şəxs, insan ona edilən yaxşılıqların müqabilində, qarşı tərəfə yalan və pislikə cavab verib, - vəssəlam!.. Bəli, pislik etmək - narkotik qəbulu kimi, fəna bir vərdişdir, mübtəla olan, bu bəladan qurtula bilmir! İllah da ki, “ixtiyar” özgəsinin əlində ola!..
Eynulla da belə ağır bir mərəzə düçar olub. Sədd heyf... Onun üçün artıq, yaxşılıq və pislik anlamı arasında fərq mövcud deyil. Yəni, beləsinə istər yaxşılıq et, ya pislik, - fərq etməz! Mənəvi orientirini itirmiş adam, əlbəttə ki, yaxşılıq əvəzinə bədxahlıq edəcək! Çünki belələri sifarişlə işləyən killerlər kimi, hədəfin mahiyyətinə varmaz! Sifariş verildimi, təfavütü yoxdur, - yerinə yetirilməlidir! Bir xanə xərabə ola, ya bir ölkə viranə qala – nə dəxli?!
Eynulla da yeni bir sifariş alıb və əsas tələb də budur: “Nəyin bahasına olursa-olsun, Azərbaycanda milli-etnik zəmində münaqişə ocağı yaratmaq! Bununçünsə, ictimai-siyasi əqidələrinə baxmadan, siyasi-ictimai aktivlik göstərən bütün Talış fəallarını bir “qazana” doldurmaq, qapağını möhkəm-möhkəm örtüb altdan da od qalamaq! Yandırmaq, yaxmaq, - cızdağını çıxartmaq! Elə eləmək ki, nəticədə, qazan partlasın, qapaq parça-parça olsun! Qoy, Azərbaycan çalxalansın! Aləm dəysin bir-birinə. Belə lazımdır, belə yaxşıdır və s.!” - Budur, eynullakimi qığılcımları barıt çəlləyinə tərəf qolazlayan naqislərin məramı! Bunları bilməkçün alimmi olmaq lazımdır?.. Bu “kəndi” görməkçün bələdçimi gərəkdir? Kor kor, gör gör deyilmi?!
Mən bu sözləri bütün məsuliyyətimlə, özü də təkcə öz adımdan yox, talışların tam əksəriyyətinin, habelə rəhbərlik etdiyim Azəri – Talış Birliyi adından deyirəm: Bizlər ana vətənimiz Azərbaycanı ürəkdən sevirik və bu cənnətməkanda yaşayan bütün xalqları özümüzə doğma, əziz bilirik! Qardaş, bacı bilirik! Və qədim, çox qədim tarixi kökləri olan bu səmimi ünsiyyətin, qardaşlığın möhkəmliyinə, əbədiliyinə zərbə vurmaq istəyən siyasi (yaxud qeyri-siyasi) dəllaların məkrli pravokasiyalarını qətiyyətlə rədd edirik! Bizlər ta əzəldən yaxşılıq, dostluq, xeyirxahlıq, “duz-çörək” anlayışlarını sözün əsl mənasında müqəddəs dəyərlər kimi qəbul etmişik. Odur ki, bədxahlar, riyakarlar öz pis əməllərindən əl çəkmək istəmirlərsə, bizlər də öz yaxşı əməllərimizdən əl çəkən deyilik! Bunu gərək birdəfəlik anlasınlar, sırğa edib qulaqlarından assınlar!..
Yeri gəlmişkən, Azəri – Talış İctimai Birliyi həmişə ana vətən saydığımız Azərbaycanda xoşbəxt, azad, demokratik və bərabərhüquqlu vətəndaş cəmiyyəti quruculuğu naminə, ölkəmizin dilindən, dinindən və milli mənsubiyyətindən asılı olmayaraq, bütün vətəndaşlarını ayıq-sayıq olmağa, qarşılıqlı hörmətə və bu amallar uğrunda sarsılmaz birliyinə çağırıb! Əminik ki, eynullakimi, hacıbabakimi, hafizmirzəkimi soy-kökünü bilməyən mənəviyyat əlilləri bu gün əsrlərin sınağından keçib doğmalaşmış birliyimizə xələl gətirə bilməyəcəklər. Mən, bütün məsuliyyət və səmimiyyətimlə hər bir Talış kökənli vətənsevər insanımızı Azərbaycanımızın monolitliyinə, xalqlarımızın həmrəyliyinə yönəlmiş hər hansı məkrli pravokasiyalara uymamağa çağırıram!
Doğma vətənimizdə hamılıqla dostluq-qardaşlıq ünsiyyəti qurmaq əvəzinə, ölkənin köklü xalqlarından olan talışların ictimai birliklərini, fəallarını, ziyalılarını, bir sözlə, milli-mental dəyərlər daşıyıcılarını qərəzli və təhqiredici ifadələrlə aşağılamaq heç kəsə baş ucalığı gətirməz. Məmləkətimizdə milli-irqi zəmində bölücülük aparmaq istəyən xıltlı və bədməramlı qüvvələrin fəallaşmasına rəğmən, bizlər ənənəvi doğmalıq ünsiyyətimizi göz bəbəyimiz kimi qoruyacağıq!
Bu gün mütərəqqi düşüncəli hər bir Azərbaycan vətəndaşı açıq-aşkar görür ki, bəzi nadanlar özləri əsl separatçılıqla məşğul olduqları halda, ciddi-cəhdlə xalqının dilinə, mədəniyyətinə, folkloruna və başqa milli-mənəvi dəyərlərinin inkişafına xidmət edən ləyaqətli insanları ləkələməyə cəhd göstərir, böhtan atır, onlara öz adlarını qoymaqdan çəkinmirlər!
Bu sayaq yaramazlıqlar, ana vətənimiz Azərbaycana, onun dövlətçiliyinə, ərazi bütövlüyünə, milli-mənəvi dəyərlər sisteminə bəslədiyimiz sonsuz məhəbbətimizə zərrə qədər də xələl gətirməməlidir. Əksinə, bu dəyərləri müqəddəs bilərək, qorunması və hifz olunması naminə, bütün varlığımızla dirəniş göstərməli, lazım olduğu təqdirdə hətta canımızdan belə keçməyə hazır olmalıyıq! Bax, Talışın vətənə, xalqa, nəhayət, Azərbaycan dövlətçiliyinə əsl münasibəti budur!
Vətənimizə nifrət edən, xalqlar arasında nifaq salmaq istəyən bədniyyətli qüvvələrin acığına, bizlər ONU həmişə sidq-ürəklə sevmişik, sevirik və sevəcəyik də!
Çünki nifrət - müvəqqəti, SEVGİ isə, əlbəttə ki, əbədidir.
Mehdibəy Səfərov
Azəri – Talış İctimai Birliyinin sədri
http://moderator.az/
