Yaxud, saxta diplomla uzun illlər hakimiyyətin mühüm strukturunda özlərinə yuva quran Nağıyev qardaşları əhaliyə qan uddurmaqdan niyə usanmırlar?
Deyirəm ki, Allah təalah yaratdığı bütün canlılara qədərincə abır-həya deyilən bir anlayış bəxş etmişdir. Çox təəssüf ki, müasir sivil dünyamızda yaşasaq da "sapı" özümüzdən olan bəzi insanlarda bu anlayışdan əsər-əlamətin olmaması həqiqətən çox ağrılı və düşündürücüdür. Haqqında söhbət açdığımız tipik "qəhrəmanlar” barədə 2013-cü ilin fevral ayında TALİSH.ORG, eləcə də facebook sosial şəbəkədəki səhifəmdə "Hacırıza getdi, titulu qaldımı?" başlıqlı yazıda bəzi məqamlara aydınlıq gətirmişdim. Sözügedən "qəhrəmanları” xatırlatmaq məqsədi ilə həmin yazının linqini diqqətinizə çatdırmağı lazım bilirəm.
"71 saylı Masallı Kənd Seçki Dairəsinin sabiq sədri Nağıyev Hacırıza İbrahim oğlu, müqəddəs Məkkə ziyarətindən qayıdıb, cümə günü tutduğu vəzifəsindən vidalaşmasının səbəbi nə oldu?..."
Masallı rayonunun Dəmirçi kənd Əsas Təhsil məktəbinin ali təhsilli ibtidai sinif müəllimi Asif Abbasov qələminin "qəhrəman” obrazı olan Nağıyev qardaşlarının rayonda, həm də yaşadıqları Bədəlan kəndində uzun illər at oynadıb, meydan sulamaları hamını bezdirmişdi.
Qardaşlardan biri 71 saylı Masallı kənd seçki dairəsinin sədri Hacırıza Nağıyev və Mərdan Nağıyev Bədəlan kənd ərazi nümayəndəsi olmaqla uzun illər idi ki, kənd əhalisinə qan uddururdular. Böyük qalmaqaldan sonra Nağıyev qardaşları tutduqları vəzifəsində azad edilsələr də, rayon İHB-sı Rafil Hüseynovun qardaşlara olan "sevgisinindən” və həmin ərəfədə Masallı rayon Texniki Peşə Məktəbinin direktoru Reyhan Abuzərovanın pensiyaya görə tutduğu vəzifədən çıxmasından Nağıyev qardaşların bəxtinin yenidən açıldı. Çox keçmədi ki, Mərdan Nağıyev Bədəlan kənd Ərazi Nümayəndəsi vəzifəsindan azad edilib, Texniki Peşə Məktəbinə direktor təyin edildi. Gözünə döndüyüm Asif müəllim bu ədalətsizliyə dözməyib, yenidən qələmini "itiləyib”, dəqiqləşdirdiyi bir çox qanunsuzluqlar barədə aidiyyəti instansiyalara müraciət ünvanladı. Asif Abbasov iddia edir ki, peşə təhsili əsasnaməsinə əsasən, 04 aprel 1997-ci il (40) saylı Ədliyyə Nazirliyinin, 29 mart 1997 –ci il tarixli (16-4/3) saylı Əmək və Əhalinin Sosial Müdafiəsi Nazirliyinin Kollegiya Qərarına əsasən təhsil müəssisələrinin direktoru aşağıdakı əsas şərtlə təyin edilə bilər:
1. Ali pedaqoji təhsilli;
2. Peşə profilinə uyğun ixtisaslı, idarəetmə sahəsi üzrə ali təhsilli;
3. Hər iki ixtisas təhsili üzrə 5 il stajı olan;
4. Təhsilin təşkili və idarə olunması ixtisası üzrə diplomu olan şəxs.
Təəssüf olsun ki, sözügedən "qəhrəman” Mərdan Nağıyev sadalanan hüquqi sənədlərin heç birinə sahib olmadığından onun belə bir təhsil müəssisəsinə rəhbər təyin edilməsi məktəb kollektivin, o cümlədən böyük stajı olan müəllimlərin haqlı hiddətinə səbəb olmuşdur. Bədəlanın ikinci "qəhrəmanı” olan "HACI” titullu Hacırıza Nağıyev isə dəridən-qabığdan çıxır ki, qardaşı Mərdanın əvvəlki kənd İcra Nümayəndəsi vəzifəsini qamarlayıb, yeni "üslublu iş metodları” ilə əhalinin anadan əmdiyi südü damcı-damcı bürünlarından gətirsin. Asif müəllim Hacırıza Nağıyevin uzun müddət hakimiyyət orqanlarını aldadaraq saxta diplomla işləməsi barədə yuxarı hakimiyyət təşkilatlarına nə qədər şikayətlər etsə də, onların hamısı nəticəsiz qalmış və nəticədə o, KİV-nə müraciət edib bu qanunsuzluqlaı ictimailəşdirmək qərarına gəlmişdir.
"Qəhrəman” qardaşların qanunsuz hərəkətləri barədə yazılan birinci "Hacırza getdi, titulu qaldımı?” başlıqlı yazı "Qanun naminə” qəzetinin səhifəsində də yer alandan sonra sanki qardaşların "gəmisi dəryada qərq olmuşdur”. Çoxsaylı şikayətlər, ara vermək bilməyən narazılıqlar fonunda yaxın günlərdə Bədəlan kənd Ərazi Nümayəndəliyinin inzibati idarəsinin qabağında yeni salınmış istirahət parkından günün günorta çağı Mərdan Nağıyev dəmirdən basdırılmış oturacaqları kəsib evinə aparması kənd camaatını daha da qəzəbləndirmişdi. Bu oğurluq işi də İHB-sı Rafil müəllimə çatdırılandan sonra işlər bir qədər qəlizləşdi.
Ötən həftə Rafil müəllim səhər tezdən heç kimi xəbərdar etmədən yazılan şikayəti yerində yoxlamaq məqsədi ilə Bədəlan kəndinə gəlir və yazılan faktlar doğruluğunu öz gözləriylə görür. Ərazi Nümayəndəliyində işləyənlərin hamısını idarəyə çağırandan sonra isə "zibil" boğaza çıxır...
Rafil müəllim Ərazi nümayəndəsinin müavini Alışov Barat Alış oğlundan və bələdiyyə sədri Həmdulla Bəşirovdan M.Nağıyevin oğurladığı dəmir borular və digər məsələlər barədə izahat yazmağı tələb edir. Rəsmilərin hər ikisi "qəhrəman” qardaşların qorxusundan izahat yazmaqdan imtina edirlər. Asif müəllimin dediyinə görə İHB-sı Rafil müəllim Alışov Baratın işdən çıxması barədə ərizəsin alsa da, bir neçə gündən sonra yenidən onu işinə qaytarır (?). Bu qalmaqallı söhbətdən Rafil müəllimə bu da bəlli olur ki, Bələdiyyə sədrinin möhür və ştampeli də Hacırıza Nağıyevdə olurmuş. Yəni Ərazinin "Xanı” missiyasını da "qəhrəman” qardaşlar ifa edirmişlər.
Əsas məsələ budur ki, Bədəlan kənd ƏN-nin sədri olmaq üçün çox gərgin "hərrac” gedir, yəni kim aşağı, kim yuxarı. "HACI” Hacırza Nağıyevin də bütün mülkündən əl çəkib, nəyin bahasına olursa-olsun, ərazinin iki möhür və ştampelini əlindən çıxartmaq fikri yoxdur.
Bu olaylara siz necə baxırsınız hörmətli həmvətənlər, qarşıda Bədəlan əhalisini xoş, yaxud bəd günlər gözləyir?
Mətləb PERO
Asif Abbasov
15 may 2013-cü il
Xüsusi olaraq TALISH.ORG üçün
