 Ölkə əhalisinin 13,7 faizi şəriət qanunlarına üstünlük verir
ADAM Sosioloji Araşdırmalar və FAR mərkəzinin mülki cəmiyyətinin inkişafı üzrə araşdırmaları çərçivəsində Azərbaycan cəmiyyətinin sosial-siyasi məsələlərə və dini azadlıqlara yanaşmasına dair sosioloji sorğu keçirilib. Bu ilin 1 avqust-1 sentyabr tarixində Bakı, Şamaxı, Şəki, Gəncə, Lənkəran və Xaçmazda 18 yaşından yuxarı vətəndaşlar arasında aparılan sorğu iştirakçılarının sayı 1000 nəfər olub. Sorğu anketinə 23 sual daxil edilmişdi.
Bu barədə "Bizim Yol”a FAR mərkəzindən verilən məlumata görə, respondentlərin 6,9 faizi maddi vəziyyətlərindən məmnun; 52,4 faizi qismən məmnundur; 30 faizi maddi çətinliklər yaşadığını; 9,5 faizi böyük maddi çətinliklər yaşadığını deyib: "30 faizi çoxdandı ət xörəkləri yemədiyini və ya əti həftədə cəmi 1 dəfə yediyini bildirib. İştirakçıların 48,8 faizi su ilə tam təmin olunur, 42 faizinə su fasilələrlə, 9,2 faizinin evinə isə su ümumiyyətlə verilmir. Respondentlərin 62,1 faizi "ölkəni həmişəlik və ya müvəqqəti tərk etmək istərdim” qeyd edib”.
Sorğuda iştirak edənlərin 42,3 faizi hesab edir ki, neft bitəndə ciddi böhran baş verəcək, ona görə ki, postneft dövrünə hazırlıq getmir: "Amma 17,8 faiz böhranın olmayacağını, 25,9 faiz isə böhranın olub-olmaması barədə düşünmür və "neftin bitməsinə hələ çox var və onun ömrünə yetəcək” deyə düşünür. Respondentlərin 36,7 faizi son 3 ildə tez-tez, 31.1 faizi nadir hallarda rüşvət verdiyini, 26,6 faizi isə rüşvət vermədiyini bildirib”.
Nəhayət, respondentlərin 13,7 faizi idarəetmənin şəriət qanunları əsasında, 23,2 faizi qismən şəriət qanunları əsasında olmasını istəyib, 52,2 faizi isə bu cür idarəetməni istəmədiyini bildirib: "İştirakçıların 12,3 faizi hesab edir ki, qızlara, əgər onların valideynləri belə hesab edirsə, başları örtülü məktəbə getməyə icazə verilməlidir. 35,6 faizi hesab edir ki, əgər bu vətəndaşın şüurlu seçimidirsə, dövlət buna icazə verməlidir. 44,5 faizi isə əleyhinə olduğunu deyib. O cümlədən, respondentlərin 30,5 faizi dini fəalların həbslərini pisləyir və bu yöndə olan məhkəmə işlərini qurama hesab edir. Amma 18,1 faizi dini fəalları dünyəvi sistemə təhlükə görərək həbsləri alqışlayır”.
Azərbaycanın Avropa və ABŞ-la yaxınlığı hesabına inkişaf edəcəyini düşünənlər 41,9 faizdir, 26,7 faiz Rusiya və MDB ölkələri, 17,4 faiz isə İslam ölkələri ilə yaxın olacağımız təqdirdə inkişaf edəcəyimizi düşünür. İştirakçılar ən dost ölkələr sırasında Türkiyəni, Rusiyanı, ABŞ-ı görüblər, Fransanı isə yalnız 1 nəfər dost ölkələr sırasında görüb. Düşmən ölkələr arasında sıralama belədir: Ermənistan - 97,7, İran - 32,9; Fransa- 25,5, ABŞ - 20,5, Rusiya- 13,8, İsrail-7,0, Gürcüstan- 2,3, Böyük Britaniya -0,7, Vatikan-0,3, Türkiyə - 0,2 faiz.
İştirakçıların 60 faizi vətəndaş azadlıqları naminə keçirilən etirazları dəstəklədiyini, 10 faizi qınadığını bəyan edir, 25,4 faizi isə "bu mənim işim deyil” söyləyir.
Natiq CAVADLI
bizimyolinfo.com
|
