Azərbaycanlı məmurlara sanksiya tətbiq oluna bilər
ABŞ dövlət katibinin müavini bunun üçün konkret fakt istəyib
Mirvari Qəhrəmanlı: «Azərbaycanla bağlı üç siyahı hazırlanmalıdır»
Leyla Yunus: «Novruzəli Məmmədovun qətli ilə bağlı siyahı hazırlanır»
ABŞ-da Rusiya prezidenti Vladimir Putinin və Dumanın deputatlarının "Maqnitski siyahısı”na salınması tələbləri ilə imza kampaniyası aparılır. Bazar günü Ağ evin veb səhifəsində yerləşdirilmiş petisiyaya imza atanların sayı 53 mindən artıq olub. Petisiyanın ABŞ hökuməti tərəfindən nəzərdən keçirilməsi üçün isə 25 min adamın imza atması kifayətdir.
Petisiyanın müəllifləri Obama administrasiyasından "Dima Yakovlev” qanununa imza atacağı təqdirdə prezident Putinə qarşı sanksiyalar tətbiq olunmasını tələb edir.
Azərbaycanda da ara-sıra insan haqlarının pozulmasında adı hallanan məmurlara qarşı sanksiyaların tətbiq olunması tələbi səslənib. Şübhəsiz ki, bunun üçün Avropa ölkələri və ABŞ-da da müəyyən fəaliyyətin aparılmasına ehtiyac var. Azərbaycanlı məmurların "Maqnitski siyahısı”na salınması üçün hansı addımlar atılması vacib hesab olunur?
Hüquq müdafiəçisi Mirvari Qəhrəmanlı Azərbaycanla bağlı da siyahının hazırlanmasını mümkün hesab edir. Lakin bu siyahıya təkcə hakimlər və hüquq-mühafizə orqanları əməkdaşlarının adı salınmamalıdır.
Hüquq müdafiəçisi üç siyahının hazırlanmasının tərəfdarıdır. Bunlardan birinə hakimləri, digərinə seçki zamanı qanunları pozan MSK və DSK üzvlərinin, digərinə isə korrupsioner məmurların adı salınmalıdır. Bu şəxslərin heç biri cəzasız qalmamalıdır. Onların Avropaya və ABŞ-a buraxılmaması istiqamətində iş aparılmalıdır. Həmçinin məmurların oğurladığı pulların ölkəyə qaytarılması üçün də çalışmaq lazımdır.
Hüquq müdafiəçisinin sözlərinə görə, Avropa Məhkəməsinin çıxardığı cərimələr də məmurları narahat etmir. Çünki bu ödəniş büdcədən edilir və onlara ziyan vurmur.
Sülh və Demokratiya Institutunun direktoru Leyla Yunus isə məmurların və hakimlərin "Maqnitski siyahısı”na salınması istiqamətində Avropa və ABŞ-da fəaliyyət göstərən azərbaycanlıların təşəbbüslə çıxış etməsini mümkün sayır. Azərbaycandakı vətəndaş cəmiyyəti nümayəndələri isə konkret sübutlar və adlar təqdim etməlidir.
L.Yunus dekabrın 10-da Bakıda səfərdə olan ABŞ ABŞ dövlət katibinin demokratiya, əmək və insan haqları üzrə köməkçisinin müavini Tomas Melia ilə görüş zamanı bu mövzuda söhbət etdiyini də bildirdi: "Qanunun qəbulunu alqışladığımı və onun Azərbaycan üçün də böyük əhəmiyyətinin olduğunu dedim. O isə bildirdi ki, söhbət qan, əzab, ölüm olan konkret işdən getsə, effekt verə bilər. Novruzəli Məmmədov nümunəsini gətirdim. Çünki bu, həqiqətən də misli görünməmiş faciəvi hadisədir. Bütün ailə, Novruzəli Məmmədov özü, istintaq zamanı onun böyük oğlu, istintaqdan sonra kiçik oğlu ölüb. Yaşlı kişiyə, professora MTN-də işgəncə veriblər. Sonra böyük oğlunu döyüblər, ölüb. Sonra kiçik oğlunu incidiblər, o da ölüb. Bu işdə kifayət qədər müstəntiq və hakimlərin adı var. Qanunsuz olaraq günahsız insan barədə hökm çıxarıblar”.
Hüquq müdafiəçisi Novruzəli Məmmədovun məsələsi ilə bağlı Sülh və Demokratiya Institutunun artıq siyahı hazırladığını da qeyd etdi. Həmin siyahıya yüzlərlə adamın adının salınmasına da ehtiyac yoxdur. 12-13 nəfər insanlara işgəncə verən MTN, həbsxanada incidən Ədliyyə Nazirliyi, qanunsuz hökm çıxaran hakimlərin adı salınsa, bu məsələyə ABŞ Konqresi və Senatı baxa bilər. Bunun üçün isə beynəlxalq hüquq müdafiə təşkilatlarının dəstəyi ilə kampaniyaya başlamaq lazımdır.
