 Hörmətli prezident! Bu vəzifəyə seçıldiyinizdə Azərbaycan Pespublikasının Konstitusiyasına və müqəddəs kitabımız "Qurani-Kərimə” and içərək ölkə vətəndaşlarının mənafelərini, hüquq və azadlıqlarını qorumağa and içmisiniz. Eyni zamanda Ölkə Konstitusiyası da sizdən bunları tələb edir. Lakin, təəssüflər olsun ki, vətəndaşlarımız hər gün irili-xırdalı dövlət məmurlarının zülm və təhdidlərindən normal yaşayışamaq imkanlarını belə itirirlər. Belə hallar gömrük orqanlarında daha qabarıq şəkildə özünü göstərir. Sizə edilmiş müraciətlərə isə nə özünüz tərəfindən, nə də hüquq mühafizə orqanları tərəfindən əhəmiyyət belə verilmir. Ölkəmizin hər bir naziri bir qanunverici orqan, bir prezident rolunda çıxış edir.
Iran İslam Respublikasına həkim müayinəsinə getmişdim. Qayıdarkən evimdə istifadə etmək üçün bir ədəd İSO-9001, İSO-14001, ONSAS-18001 sertifikat tələblərinə cavab verən, təhlükəsizliyə tam təminatlı qızdırıcı soba aldım. Lakin Astara Dövlət Gömrük məntəqəsində "Fövqəladə hallar Naziri bu məhsulların gətirilməsinə icazə vermir” deyə əlimdən aldılar, "Get kimə istəyirsəm şikayət et” -deyərək, hələ bir məni təhqir də etdilər. "Mən Prezidentə şikayət edəcəyəm”- deyə bildirdikdə "Biz Prezident tanımırıq, bizim tabe olduğumuz şəxs Kəmaləddin Heydərovdur” deyib həm məni, həm də təbii ki, Sizi ələ də saldılar. Həmçinin 4 ədəd "Ziyad” balığı da almışdım, bizdəkindən 4-5 dəfə ucuz olduğuna görə. Onu da əlimdən aldılar. Hətta, İranda aldığım qiymətlə pulunu cibimə salıb məni zorla məntəqədən qovdular. Sanki mən bulara nökər imişəm. Yəqin ki, aparıb öz ailələrinə yedizdirirlər. Belə haqsızlıq, belə ədalətsizlikmi olar. Son anda insani və vətəndəş haqlarımız Sizin tərəfinizdən qorunmalıdır. Nə səbəbdən qorunmur. Bu məntəqədə vətəndaşlarına elə zülmlər edilir ki, adamın lap tükü ürpəşir. İndi mən təhqir olunmuş vətəndaş kimi bilmək istəyirəm”Siz həqiqətənmi şəlahiyyətlərinizin müəyyən hissəsini FH Nazirinə vermisiniz?. Vermisinizsə bu qanunlarımızda öz əksini niyə tapmayıb. Verməmisinizsə Dövlət Gömrük məntəqələrinin işçiləri nədən Sizi bu qədər alçaldıb özbaşınalıqla məşğuldurlar. Burada hər addım başı MONOPOLİST şirkətlərin nümayəndələri ilə üzləşməkdəyik. Onlar hətta, gömrük işçilərinə belə ƏMR vermək hüququna malikdilər. Belə hakimiyyətmi, belə ədalətmi olar. Haqq səsini qaldırıb etiraz edənləri ciblərinə narkotik atmaqla hədələyirlər.
Qaz sobalarının çeşidli markaları İİR-dan hansısa "naməlum” şirkətlər tərəfindən yüz minlərlə gətirilərək bütün ticarət şəbəkələrimizdə 4-5 dəfə baha qiymətlərə satılır. Balıq isə elə Xəzər dənizində tutulan balıqdır, ekoloji təmizliyi bizdəkindən fərqli ola bilməz, sadəcə qiyməti ucuzdur ki, bu da təqaüdlə dolanan vətəndaşların ciblərinə uyğun gəlir. Vətəndaşların ehtiyaclarını nisbətən ucuz qiymətlərlə təmin etməyə cəhd etməsi məmurlarınızı nədən bu qədər narahat edir, qadağalar, təhdidlər, təhqirlər ortaya çıxır. Hamımız yaxşı bilirik ki, belə məhsullar iki halda idxal edilə bilməz. 1. Həmin məhsul istifadəyə yararsız olduqda. 2. Həmin məhsul ölkədə əhalinin tələbatı səviyyəsində istehsal olunduqda. Gətirdiyim məhsul istifadəyə yararlı və təhlükəsizdir, beynəlxalq normalara uyğundur, ölkədə də istehsal olunmur. Belə olan təqdirdə FHN-yi onun vətəndaşlar tərəfindən məhdud sayda gətirilməsinə nəyə görə qadağalar qoyub və ya FHN-nin buna səlahiyyəti çatırmı? FHN monopolislər tərəfindən gətirilib ticarət şəbəkələrinə doldurulmuş eyni ölkənin eyni zavodunun məhsullarına niyə qadağalar qoymur?
Hər dəfə çıxışlarınızda "Rüşvət və monopoliya ölkəmizin ən böyük bəlasıdır, ona qarşı mübarizə aparmaq lazımdır” –deyirsiniz. İndi özünüz deyin, məmurlar tərəfindən təhqir və təhdid ediliriksə, Sizə edilmiş müraciətlərsə cavabsız qalırsa vətəndaş olaraq nə etməliyik?
Hörmətli Prezident! Xahiş edirəm səlahiyyətləriniz daxilində Astara Dövlət Gömdük keçid məntəqəsindəki qanunsuzluqları, korrupsiya və rüşvət hallarını, ölkə vətəndaşlarının hüquq və iqtisadi azadlıqlarına zərbə vuran halların qarşışını alasınız.
Hüseynqulu Məmmədov
Lənkəran ş.
|
Хватит просить, надо требовать и заставить негодяев уважать народ !