Əliyevlərin adı "Kojeni işi” ilə bağlı yenidən hallanmağa başladı
Federal məhkəmə bu korrupsiya əməliyyatında ittiham olunan iş adamı Frederik Burkun apelyasiya şikayətini rədd edərək onu həbsdə saxlayıb
Dünən ABŞ-ın nüfuzlu "New-York Times” qəzeti veb-saytında Azərbaycan hakimiyyətini, xüsusilə prezident Ilham Əliyevi qəzəbləndirəcək məqalə yayıb. Söhbət Heydər Əliyevin prezident olduğu dövrdə ABŞ biznesmenlərinin qanunsuz yolla, rüşvət müqabilində Dövlət Neft Şirkətini ələ keçirməsi ilə bağlı məşhur "Kojeni işi” üzrə məhkəmə proseslərindən gedir. Məlum olur ki, korrupsiya əməlində ittiham olunan biznesmenlərdən biri təqsirsizliyi ilə bağlı apelyasiya şikayəti verib. Lakin tutarlı sübutları olmadığı üçün Federal Apelyasiya Məhkəməsi onun şikayətini qəbul etməyib. Yazını olduğu kimi təqdim edirik:
"Federal Apelyasiya Məhkəməsi, rüşvətlə ələ almaq yolu ilə Azərbaycan Dövlət Neft Şirkətinin qanunsuz özəlləşdirilməsində başqa şəxslərlə birlikdə ittiham olunan Konnektikut ştatından olan bir biznesmenə qarşı həbs-qətimkan tədbirini qüvvədə saxlayıb. Manhettendəki ABŞ ikinci dairə Apelyasiya Məhkəməsi bildirir ki, Frederik Burk başqaları ilə birləşərək xarici bir ölkənin Korrupsiya haqqında qanununu pozaraq Azərbaycan Respublikasının prezidenti və digər rəsmi şəxsləri rüşvətlə satın alıb. Bu səbəbdən jürinin yuxarıda adıkeçən biznesmeni təqsirləndirməsi tamamilə qanunauyğundur. Bu o deməkdir ki, Frederik Burkun məhkəmədə dediyi sözlər sübutlara söykənmədiyi üçün heç bir əhəmiyyət daşımayıb.
Azərbaycan öz müstəqilliyini 1991-ci ildə Sovet Ittifaqı dağıldıqdan sonra bərpa edib. Prokurorlar iddia edirlər ki, Burk və başqaları qanunsuz şəkildə Azərbaycanın Dövlət Neft Şirkətini ələ keçirmək istəyiblər. Burk bir illik həbs cəzasına məhkum olunduqdan dərhal sonra, həbsinin ilk günündə apelyasiya şikayəti verib. Daha sonra ona bir milyon dollar cərimə də kəsilib. ABŞ-ın Yaxın Şərq üzrə xüsusi nümayəndəsi Corc Mitçel federal məhkəmə prosesində Burkun adından şahid ifadələri verib” (Azadlıq Qəzeti).
