 Azərbaycanda özünün irqçilik yönümü ilə tanınan qəzetlərdən olan "Təzadlar"ın məmləkətimizin aborigen xalqlarına qarşı nifrət və qəzəb hissi ilə yaşaması va bunun səbəbləri barədə çox yazılıb. Nəticə çıxartmaq, muasir dünyamızın sivil qaydaları ilə heç olmasa sözdə yaşamaq istəyini birüzə vermək əvəzinə bu qəzet öz səhifələrində ölkəmizin köklü xalqlarına qarşı düşmənçilik mövqeyi sərgiləyən və soy-kökü məlum olmayan cızmaqaraçılara gen-bol yer verməkdə, hətta şərəf və ləyaqəti bir qəpiyə dəyməyənlərin imzası ilə belə mövqeyi dəstəkləyən "zəhmətkeş məktubları" yaymaqda davam edir.
Azərbaycanda separatçılığın əsasını qoyan və bundan bəhrələnənlərin ünvanını məlumdur. Bu barədə son zamanlar işıq üzü görmüş Turqut Ərin "Azadlıqdan tiranlığa" kitabında da geniş izahat verilərək, konkret ünvan və faktlar göstərilib. Azərbaycanı kökündən təhdid edən belə faktlara diqqət yetirmək əvəzinə məmləkətimizin aborigen xalqların öz özünəməxsusluğunun qorunması istiqamətində olan təbii hüquqlardan istifadə istəyini separatçılıq kimi qələmə vermək irqçilikdən və faşizmdəm xəbər verir.
Növbəti dəfə bu qəzet öz səhifələrində cızmaqaraçı Elnur Eltürkün "Separatçılığa "demokratiya” donu, Yaxud Mətləb Dadaşova bəzi xatırlatmalar” məqaləsinə və yüxarıda qeyd etdiyimiz "zəhmətkeş məktublara" yer vermişdir. Yazıda (əgər yazı demək mümkünsə) dəfələrələ təkzib edilən və irqçilik mərəzindən irəli gələn bir sıra uydurmalar əksini tapmaqla yanaşı şair Xəlil Rza Ulutürk və Azərbaycanda demokratiya hərəkatının liderlərindən olan Ələkrəm Hümmətzodənin adları çəkilir.
Qarabag müharıbəsinin veteranı olan Mətləb Dadaşov irqçilərlə polemikanın prespektivsiz olduğunu önə çəkərək, redaksiyamıza təqdim etdiyi Xəlil Rza Ulutürkün "Ələkrəm" şerinin onlara layiqli cavab olmasını bildrir, onun bir daha çap edilməsini xahiş edir.
Xəlil RZA ULUTÜRK
ƏLƏKRƏM
Qalx ayağa cəsur gəlir!
Zindanları söküb tökən qüdrət, qeyrət, qürur gəlir!
Adı dustaq, özü igid,
Düşmənləri canlı meyid
Qara bığlar şəvə kibi… alnı qaya, üzü də ağ,
Qılınc qaşlar altındakı odlu gözlər bir cüt çıraq!
Qalx ayağa bir ər gəlir, ərən gəlir,
Həyatını öz xalqına çörək kibi, tüfəng kibi verən gəlir!
Qalx ayağa, sıx əlini,
Gözlərində öpüb oxşa addımlayan heykəlini!
Daş zindana sığışsa da, görəməzsən qəhərini,
Yumruğunda həbs eləmiş dərdlərini, qəmlərini.
Kölə deyil, məhkum deyil, sükut edən tufandır o,
Ağız açsa görəcəksən, od püskürən vulkandır o!
"Qalx ayağa, hakim gəlir!” demərəm mən,
Hakimlərin sırasında ağciyər də, əfəl də var,
Ruhu qotur keçəl də var.
Rəzillərin ən rəzili yaltaq da var,
Taxt əhlinə baş endirən qanı kölə maymaq da var.
Qalx ayağa, vətənimin oğlu gəlir!
Pəncərəni açıb lay-lay günəş ona doğru gəlir!
Azərbaycan alqışlayır əziz oğlu Ələkrəmi,
Azadlıqdır, səadətdir arzu- kamı.
Seyr et nəhəng izdihamı,
Bacarsaydı ürəyini gətirərdi-
Gül gətirmiş ona hamı.
Ləngərlənir böyük salon, dustaqdadır bütün gözlər,
Qarşısında al qərənfil, tər nərgizlər.
Nərgizləri baxışıyla o əzizlər.
Vətənimin timsalıdır bu nərgizlər.
Ətirli, saf, bakir, təzə,
Bu saflığı qorumaqçün
qoy yenidən alovlansın mübarizə!
Müttəhimlər kürsüsündə qoy əyləşsin onlar özü!
Qul ağası, qul sürüsü!
Nərgizlərin yaz ətrini məhv edənlər,
İnsanlığı öz canında, vicdanında dəfn edənlər.
Bağı gülsüz, gözü nursuz, yurdu mərdsiz qoyanlar var,
Doğmasını ögey bilib düşməninə uyanlar var.
Ələkrəmə yaddır onlar,
Canavara təslim olan bu qoyunlar,
Çəyirtkədən şərəfsizdir o məlunlar.
Neçin gəlib oturmurlar müttəhimlər kürsüsündə
O gözü dar, ürəyi dar…
Boşqab dibi yalayanlar!
Bu gün yer, göy çıraqbandır,
Qürurumuz, sevincimiz aşıb-daşan bir ümmandır.
Bu gün Xəzər qayalara çırpılmada ləpə-ləpə,
Ələkrəmın qədəmində qəzəl qumu öpə-öpə,
Lənkəranlı sahilləri quca-quca,
Qanad çalıb uça-uça,
Yüz qəndilli Sürəyya da bu gün bizə doğru gəlir,
Yoldaş hakim, qalx ayağa, Vətənimin oğlu gəlir!
( Bakı, cümə, 21 aralıq 1990)
Mənbə: Xəlil Rza Ulutürk "DAVAM EDİR 37…”, Bakı, "Gənclik” nəşriyyatı, 1991, səh.81-83
|
