Azərbaycanda insan hüquqları sahəsində irəliləyiş yoxdur. Bu barədə obyektiv.tv-yə müsahibəsində beynəlxalq "Human Rights Watch” təşkilatının Avropa və Mərkəzi Asiya şöbəsinin rəis müavini Reyçel Denber bildirib.
Onun sözlərinə görə, daha da pis ola bilərdi, amma jurnalist Eynulla Fətullayevin azad edildiyinə, söz azadlığının məhdudlaşdırılması faktlarının azaldığına sevinmək lazımdır.
Bununla belə, Cabbar Savalan və Bəxtiyar Hacıyev barmaqlıqlar arxasındadır.
Azərbaycanın siyasi və məhkəmə hakimiyyəti, hüquq-mühafizə orqanları dünya ictimaiyyətini aldada bilməz, çünki hamı bu gənclərin öz baxışlarına görə həbsdə olduqlarını bilir. Həbsxanalarda qanuni olaraq sərbəst toplaşmaq və söz azadlıqları hüquqlarını reallaşdırmaq cəhdinə görə cəzalandırılmış onlarla başqa gənclər də var.
Əlbəttə, Türkmənistanla müqayisədə Azərbaycanda vəziyyət pis deyil. Lakin əsas göstərici və meyar – ardıcıllıq və hakimiyyətin siyasi iradəsi böyük problemlərdən xəbər verir.
Məsələn, Avropa Şurasının siyasi məhbuslar üzrə məruzəçisi Kristofer Ştrasser indiyədək öz öhdəliklərinə başlaya və Azərbaycan üzrə məruzə hazırlaya bilmir. Burada hər şey yaxşıdırsa və gizlədəcək bir şey yoxdursa, niyə onun ölkəyə səfəri qadağan edilsin, deyə Denber qeyd edib.
Mülkiyyət hüquqlarına hörmət məsələsində xüsusilə çətin vəziyyət yaranır. Hüquq müdafiəçiləri qeyd edirlər ki, bu il təxminən 60 min yaşayış evi sökülüb, gələn il təxminən bu sayda vətəndaşların hüquqlarının pozulacağı gözlənilir.
Hətta Azərbaycan qanunvericiliyinə görə, evlər sökülərkən söküntü qaydaları dəqiq müəyyən olunmalıdır, dövlət ehtiyacını göstərən əsas olmalıdır, kompensasiya ölçüsü dəqiq müəyyən olunmalıdır. Bundan başqa, insanlara əvvəlcədən xəbər verilməlidir, yerli məhkəmə isə bununla bağlı qərar qəbul etməlidir. Bütün bunlar olmayıb və yoxdur, insanlar evlərindən zorla çıxarılır, hər kvadrat metr üçün 1500 manat standart kompensasiya təklif olunur. Çoxları 30-40 kv. m sahəsi olan mənzildə yaşayır, bu məbləğə harada ev almaq olar?
"Təəssüf ki, Azərbaycan demokratiya və insan hüquqlarının müdafiəsi görüntüsü yaradır. Bu, ölkənin BMT kimi beynəlxalq qurumlara verdiyi hesabatlardan da görünür. Beynəlxalq normativlər və standartlara uyğun normal qanunverici baza arxasında anlamsız qanun təqlidi gizlənir ki, bu da insan hüquqları sahəsində vəziyyətin tədricən pisləşməsinə gətirib çıxarıb (2003-cü ildən etibarən). Beynəlxalq ictimaiyyət real dəyişikliklər gözləyir”, deyə Reyçel Denber əlavə edib (turan).
