 "Azərbaycan xalqı çox dözümlü xalqdır!" - H.Ə.Əliyev
"Azərbaycan iri addımlarla irəliləyir!" - L.İ.Brejnev
Əcnəbilərə Azərbaycanı türk ölkəsi kimi tanıtdımağa çalışan stalinçilər hərdən bir deyirlər ki, bu ölkə çoxmillətli, polietnik ölkədir. Bilmirəm bu doğru, yoxsa yalandır, çünki Azərbaycan çox qəribə ölkədir. Məsələn, prezidentləri deyirlər ki, bura türklərin ölkəsidir və onlar guya qədim şumerlərdən əmələ gəlmişlər. Türkoloqlar isə bu fikirləri cəfəngiyyat kimi dəyərləndirirlər.
Bəlkə bütün dünyanın türkoloqları öz ixtisaslarında naşıdılar? Deyərsiz ki, ola bilməz? Niyə? Məyər biz bilmirik ki, universitetlərdə oxuyan tələbələr qiymətlərini pulla alırlar? Kim deyir ki, korrupsiya yalnız Azərbaycana xas olandır? Buranın deputat və dövlət məmurları bir ağıza bunu inkar edib, inandıracaqlar ki, rüşvətxorluq Avropadadı, Azərbaycan isə hamıya qanunçuluğu və demokratuyanl ixrac edəndir. İnanmırsınızsa, Azərbaycan telekanallarına tez-tez baxın.
Türkşünaslar öz tədqiqatlarında olsun, biz isə Azərbaycanda gəzən söhbətlərə qulaq asaq. Yuxarıda yazdığım kimi, burda bəzi siyasi adamlar həmçinin həvəskar antropoloq və etnoloqluq edirlər. Bir qismi iddia edir ki, şumerologiya elmi gərək türkologiya adlansın. Onlar deyirlər ki, qədim Şümer sivilizasiyasını türklər yaratmış, sonradan isə nədənsə Çinin şimalına köçmüşlər. Onlar orada bütün köhnə sivilizasiyasını unutmuş, maldarlıqla məşğul olmağa başladılar və buna görə öz irqlərini dəyişməli oldular. Azərbaycanın siyasi etnoloqları və etnosiyasiləri çox qəribə və olduqca maraqlı insanlardı. Əgər siz onlarla razılaşmasanız, özünüzdən küsün, çünki sizi "savadlılar", yəni savadsızlar siyahısına qatacaqlar. Çox qəribə fikir tərzi olsa da, təəccüblənməyin, çünki Azərbaycan olduğca qəribə ölkədir. Burada alimlər siyasətlə, siyasilər isə elm ilə məşğuldu.
Elə bilməyin ki, bu naşılıqdandı, xeyr, bu ağıllarının analoqu olmamağından irəli gəlir. Alimlər onun üçün siyasətlə məşğuldular ki, onlara verilən tapşırıqları elmiləşdirib, özləri üçün pul, məqam əldə etsinlər. Siyasilər də geri qalmırlar, elmi araşdırmalara baş qatmayıb, elə çayxanalarda oturub elmi mülahizələr uydutub, camaatın başını qatırlar ki, iqtidar öz işindən qalmasın. Buna görə onlar da pula və məqama çatırlar. Hətta parlamentdə yer də ala bilirlər.
Amma parlament əhli daha qanunçuluqla məşğul olmur, millət vəkillərinin məşğulluğu biznes olur. Nə qədər ki, onların toxunulmaz immuniteti var, sağdan-soldan oğurlayıb, özləri və övladları üçün firavan yaşayış qururlar. Bunun üçün çox vəsait lazım deyil, cəmisi bir milion manat tapıb, MM sədrinə bir fənd ilə çatdırmaq lazımdır ki, o da həmin adamı siyahıya salıb, prezidentin razılığını əldə edəcək və o, pul-para verəni deputat təyin edəcək.
Siz heç də təəccüblənməyin, Azərbaycanda seçki formal bir şeydir, Braziliyadakı festival tamaşasını xatırladır. Seçki əsas deyil, əsas pul çatdırmaq və sehirli siyahıya düşməkdir.
Əlbəttə ki, bunun üçün siz tarixçilik və enoloqçuluğu da bacarmalısınız. Xeyr, bunun üçün universitet oturacaqlarına şalvar yırtmağa dəyməz, sadəcə hər xalqı türklərə bağlamağı bacarmalısınız.
Bunun səbəbi çox sadədir. Bunu prezidentlər deyirsə, siz də deməlisiniz. Bunu siz özünüz hətta yalan və uydurma saya bilərsiniz, bunun heç eybi yoxdur. Əsas odur ki, siz Şarl Perronun nağılındakı kimi kralı geyimli görməyi bacarasınız, heç bir vəchlə ona çılpaq deməməlisiniz.
Ən əsası, siz özünüzə "türk", "azəri türkü", "oğuz türkü", yaxud heç birini deyə bilməsəniz, stalinçilər sayaq azərbaycanlı deməlisiniz. O mənada yox ki, bu ölkədə doğulmusuz, xeyr, bu əsas deyil, əsas odur ki, ata-ananızı, dədəvü-əcdadlarınızdan imtina etməyi bacarasınız. Başqa əlamətlərinizdən də imtina edə bilərsiz, vicdandan, qeyrətdən, namusdan, şərəfdən və sairə. Bu da vacib sayılır, amma ən vacibi, dediyim kimi, etnik mənsubiyyətinizdən tamamilə kənarda olmalısız. Bu əsas şərtdir və bütün deputatlar belədir. İstisnalar da olur, amma icazəli olmalıdılar.
Məsələn, talışların başını aldatmaq üçün, əsilikcə talışsınızsa, gərək yuxarıdan verilmiş komanda ilə dərhal özünüzü talış elan edib, deməlisiniz ki, talışlar heç də talış deyil, türkdülər və talışlığlarına nifrət edib özlərinə türk deməlidilər. Həmən təbliğatı aparanda, nabədə talışca danışasınız. Olmaz! Yoxsa sizi də, baxmayaraq ki, deputat qayırıblar, bir dəqiqə içində "separatçı", "xain", "milli birliyi dağıdan ünsür"," hərbi sirrləri xaricə aparan cəsus", ən azı isə "narkoman və narkodiler" adlandırıb quduzxanaya salacaqlar. Sizin deputatlığınız Gülər Əhmədovanın deputatlığından artıq olmayacaq ki? Siz təəccüblənməyəsiniz, çünki bu ölkənin demokratik dövlət kimi yalanları özünüz yayırdız, bunu yaddan çıxarmayın. Yalançıların axırı pis olur, bunu tarix sübut edir, amma sizin qondarma tarixiniz yox, əsl tarix. Siyasi tarixçilərin "tarixi" belə məqamda kara gəlmir. İşdi şayəd, məhkəmələrə müraçiət etsəniz, çox büyük səhvə yol vermiş olarsız. Çünki Azərbaycan çox qəribə məmləkətdir, burda məhkəmə də alimlik edir və siyasətlə məşğul olur, hüquq isə qalıb kriminallara. Yaxşıdı ki, kriminallar başqa işələ məşğul deyillər, onlar həm hüquqla, həm qanunvericiliklə, həm də düvlətçiliklə məşğul olurlar. Kriminal aləmi olmasa, Azərbaycanın dövləti çökər, çox davam gətirə bilməz.
Birdən düşünməyəsiz ki, bunları sizi ayıltmaq üçün yazıram, belə fikrə düşməyəsiniz, axı siz çox dözümlü xalqın nümayəndəsi adlanırsız. Bu adı Sizə atanız, babanız, həmişə azərbaycanlı adlanan, hətta bu ad mövcud olmayanda belə, bütün Azərbaycanı irəli addımlarla addımlatdıran, sizi müstəqil qullara çevirən general, katib, prezident, Sov.İKP-nin Mərkəzi Komitəsi Siyasi Bürosunun üzvü, iki dəfə Sosialist Əməyi Qəhrəmanı, Ulu Öndəriniz vermişdir. Bu adı şərəflə, ən əziz miras kimi saxlayın, itirməyin. Yonca bitəncə dözümlü olun, ölməyin, çünki Allah-təala da Quran vasitəsilə sizə deyir: "Vəziyyətini dəyişmək istəməyənlərin vəziyyətini dəyişmərəm".
Bu ayə Sizə aid deyil, ey dözümlü azərbaycanlılar, siz ərəbcə oxumursunuz, siz yalnız azərbaycanca, ya da türkçə anlayırsınız, ona görə də Sizi elə bu dildə aldadırlar, çünki siz əcdadlarınız kimi yalnız talışca danışsaydız, sizi dözümlü xalqa aid etmək olmazdı və siz vəziyyətinizi dəyişmək əzmində olacaqdınız. Vəziyyətini dəyişənsə bu dildə yalanlara qulaq asmağdan məhrum olur. İnsan fəali-muxtar yaradılıb, ona görə də seçmək hüqundan istifadə edir. İnsanlar seçə bilərlər, yalnız özlərini insan bilənləri deyirəm, ulu öndərin dözümlüləri ilə heç işim yoxdur.
Səbinə,
TALISH.ORG
|
