 Əssalamun əleykum, ey Adəm övladları!
Salamımı almadınız, neynək. Bilirəm məndən xoşunuz gəlmir. Nəyimdən xoşunuz gəlmir ay zavallılar? Sancıram, hə? Bəs siz necə, heç kimi sancmırsınız?...
Vallahi və billahi, mən siz Adəm övladlarından həm mərd, həm də ədalətliyəm. Mərdliyim bundadır ki, kimisə sancmaq istəyəndə vızıldayıb, xəbərdarlıq edirəm. Ədalətliyəm ona görə ki, sancmaqla vəzifəmi icra edirəm. Kimisə sancmaq istəyəndə heç kimə fərq qoymuram. Varlını da sancıram, kasıbı da, acı da, toxu da, fəhləni də, məmuru da, polisi də, prezidenti də....
Siz isə bir-birinizi elə namərdcəsinə sancırsız ha, dərdi illərlə canınızdan çıxmır!...
Bu cür vızıldamaqla sizi yorub təngənəfəs etmək fikrim yoxdur. Həmişə siz zavallılara demişdim ki, Masallı rayonu "arıq eşşəyin yaylağıdır”, mənə inanmırdınız. Sabiq İHB-sı Ğəzi müəllim Naxçıvandan sizin rayona gələndə elə arıq idi ki, bəzi hacı və kərbəlayiləriniz məscidlərdən füqəralara yığdıqları fitrə-sədəqələrdən ona pay verib başınıza bəla etdilər. Bir qədər özünə gəlib, ətə-cana gələndən sonra mələk cildini soyunub, əzrayıl cildinə girdi. Neçə-neçə günahsız insanları rayonda tanınan 28 nəfər "əsrin üzəduranları” vasitəsi ilə şərlətdirib həbs etdirdi. Bütün bunlar bir tərəfə, rayona çıxıb, yaşıllığa qərq olan təbiət gözəlliyini görüb, onu vahimə bürüdü. Axı yazıq Naxçıvanda göz açıb duzlu, keçəl dağlardan başqa nə görmüşdü?...
Meşə təsərrüfatı idarəsinə tapşırdı ki, rayonun bütün ağaclarını kəsib, MBAVODA təhvil versin, pulunu da nəğd alıb gətirsin. Nə başınızı ağrıdım?
Kolatanlıların təbii QAZ çəkilişi üçün ona verdikləri 280 min dollar pulu həzm mədaxil etdikdən sonra, hörmətli prezidentimiz "lütfükarlıq” edib, necə deyərlər "Tağının papağın Nağının başına” qoyan kimi, onun bir çox cinayətlərinin izini süpürmək məqsədi ilə Astara rayonuna transfer etdi. Beləliklə Ğəzi müəllim bu "yaylağda yaxıca kökəldi”....
Təzə gələn İHB-sı Rafil Hüseynov öz yalançı vədləri, tikinti-söküntü əməlləri ilə bir növ Ğəzi müəllimə "rəhmətlik” qoydu.
Bunu da deyim ki, Rafil müəllim də gələndə lap arıq idi. İndi maşallah olsun, göz dəyməsin, "Köhnə bazar”ı müvəqqəti bağlayıb haqq-hesab məsələsindən sonra yaxşıca "tüklənib-kökəldiyi” hamınızın gözü qabağındadır. Əslində onun kökəlməsi Masallı əhalisini heç də maraqlandırmır. Əhalini maraqlandıran və narahat edən, payonun büdcəlinə ayrılan pulların lazımsız olaraq havaya sovurub, korrupsiya, rüşvətxorluğa geniş yol açması, məmur özbaşınalığıdır.
 Bir ili tamam olmayan, milyonlarla vəsait sərf edilən binalar təzədən sökülür, bəzi ərazilərə döşənən metlax-kafellər sökülərək, kənd yollarının təmiri üçün RF-da yaşayanların çəkdiyi xərclər müqabilində bələdiyyəçilər vasitəsi ilə saxtakarlıqla sənədləşdirilərək banklardan külli miqdarda pullar oğurlanır. Rayon əhalisinin ən ağrılı yeri olan səhiyyə sisteminə baxanda özbaşınalıqların əndazədən çıxmasını görməmək mümkün deyil. Masallı rayon Mərkəzi Xəstəxanasının ən mühüm sahəsindən olan İnfeksion Xəstəlikləri şöbəsinə yolu düşən hər kəs ehtiyyatlanır ki, bu binaya daxil olanda, daxili infeksiyadan yoluxmasın. Yoxsa müalicəsi üçün qonşu İran İslam Respublikasına gedərlərsə, qorxurlar ki, Hilal Məmmədovu şərləyərək həbs edilməsi kimi acı bir tale ilə üzləşməli olarlar. Xatırladıram ki, infeksion xəstəliklərin müalicə şöbəsi hələ SSRİ dönəmində tikilməsinə baxmayaraq, bu günə kimi əsaslı təmir olunmamış, heç bir tibbi avadanığın da olması gözə çarpmır. Bu şöbə istər zahirdən, istərsə də daxildən açıq-aşkar kolxozçuluq dövrünün maldarlıq fermasını xatırladır.
Bunu da siz Adəm övladlarına bildirim ki, sözügedən infeksion xəstəliklərin müalicə şöbəsinin müdiri Bəşirov Bəşir rayonda yeganə peşəkar, həkim olmaqla, insanlarla yaxşı davranması, musavat partiyasının üzvü olması, YAP-çı rəhbərliyin maraq dairəsini daraldır. Məlum olduğu kimi bu bina əsaslı təmirə başlanılarsa, Bəşir bəy çox çətin ki, korrupsiya halı ilə barışsın. Guman olunur ki, bəlkə də bu mühüm əhəmiyyət kəsb edən tibb ocağının təmir edilməməsinin əsas səbəblərindən biri də zavallı şöbə müdrinin siyasi baxışıdır. Heç kimə də sirr deyil ki, B. Bəşirova başqa cür təsir edə bilmirlər. Bu hakimiyyətdə isə belə insanlara yer olmaması da heç kimə sirr deyil. Azərbaycanın bütün dövlət strukturlarında çalışanlar rüşvətxorluğu, korrupsiyanı, məddahlığı, oğurluğu bacarmırsa, deməli keyfiyyətsiz kadr sayılır. "Keyfiyyətsiz kadr” isə ya şərlənərək həbs olunmalı, ya da həkim Bəşirov kimi "acı taleyin” yaşamalıdır. (?)
Ay canınıza daraşım, siz Adəm övladlarına məsləhətim budur ki, Rafil Hüseynov kimi rəhbərlər Qəzənfər Ağayev kimi kökəlmək üçün, özlərinə əziyyət verib yeni "yaylaqlar” axtarmasınlar, elə bizim Masallı rayonu başqa yerlərdən fərqli olaraq, "Arıq eşşəyin yaylağıdır”!
DİTDİLİ bəy,
20 noyabr 2012-ci il,
Masallı rayonu
|
