Son zamanlar kodlar haqqında, sirli rəqəmlər barəsində yazmaq dəb halını alıb. Necə deyərlər: "qalma qonşudan dala” prinsipinə əməl edib, mən də bir rəqəmdən, 13 rəqəmindən "yapışdım”. "13” rəqəminin nəs adlandırılması səbəbini müsəlman cəmiyyətində nə qədər araşdırdımsa, "13” rəqəminin uğurundan başqa bir şey tapmadım…
Üz tutdum xristian cəmiyyətinə ki, bəlkə bir şey taparam… Tapdım da… Sən demə xristian aləmi 13 rəqəmindən çox qorxurmuş… Tapdığım bir neçə səbəbi diqqətinizə çatdırmaq istərdim.
Səlahəddin Əyyubi Səlib yürüşlərinin on üçüncüsündə xristianları qəti məğlubiyyətə uğradıb. İstanbul 29 may 1453-cü il çərşənbə axşamı günü türklər tərəfindən fəth edilir. 1453-cü il tarixinin rəqəmlərinin cəmi (1+4+5+3=13) "on üç”- dür.
"13” rəqəminin uğursuzluğuna səbəb olan inancın mənşəyində bir il içində ayın 13 dəfə bütöv ay olaraq görünməsini söyləyənlər də az deyil.
13 Oktyabr 1307-ci il, cümə günü, Fransa Kralı Filiplə Papa Klemensin əməkdaşlığı nəticəsində Məbəd (Dəfinə) Cəngavərlərinin çoxu həbs olunub, edam edilmişdi.
Daha bir maraqlı fakta görə isə İbranilər (yəhudilər) "13” rəqəminin uğursuz olmasının səbəbini İbrani əlifbasının 13-cü hərfinin «mavet» (ölüm) sözünün ilk hərfi olan «m» olmasıyla izah edirlər. Hətta Hammurapi qanunlarına diqqət yetirsək, siyahıda 13 nömrəli qanunun olmadığının şahidi olarıq.
Xristian dünyası 13-dən niyə qorxur? Hətta çox evlərdə 13 nömrəsi olmaz. Təyyarələrdə 13-cü oturacaq sırası yoxdur. Otel binalarında 13-cü qat ya 12A-dır, ya da 14.
Ümumiyyətlə, "13” rəqəminin uğursuzluğuna dair inancın Həzrəti İsanın məşhur son yeməyindəki həvarilərin sayından qaynaqlandığı da əldə etdiyimiz məlumatlardandır. Qeyd etmək lazımdır ki, İsanın çarmıxa çəkilməsindən əvvəlki son şam yeməyində cəmi 13 nəfər adam vardı: İsa Peyğəmbər və 12 həvari. Buna görə də Xristianlarda axşam yeməyində 13 adam bir araya gələrsə, bunlardan birinin başına bir fəlakət gələcəyinə inanırlar. Sonralar özündə "13” rəqəmini təcəssüm edən hər bir şeyə nifrət etdilər.
Araşdırmalar zamanı belə bir rəqəmlə rastlaşdım. "571” Bildiyimiz kimi Allahın Rəsulu Məhəmməd peyğəmbər (s.ə.s.) Miladi təqvimlə e.ə. 571-ci ildə doğulmuşdur. (5+7+1=13)
Ey mənim müsəlman bacı və qardaşlarım, 13 rəqəminin uğursuzluğuna bütün Xristian aləmi inanır. Ancaq müsəlmanların da bu rəqəmdən qorxması mənim ürəyimi ağrıtmaya bilməz. Axı, müsəlman aləmi üçün "13” rəqəmi ən azı "7” rəqəmi kimi müqəddəsdir. Elə isə xristian dünyasının qorxduğu rəqəmdən nəinki qorxmaq, əksinə, biz müsəlmanlar üçün həmişə xoş hadisələrlə yadda qalmış rəqəmi sevməyi də öyrənməliyik… Necə deyərlər; «Axı, biz müsəlmanıq»”… Rüfat Həşimov, "Tolışon Sədo”, N: 03 (15), 21 yanvar 2012
