 İnən poze çəmə diədə,
Voş voydə nam-nami, hırd-hırdi
Bo zəmini məlhəme
hıtovniedə tovostono mandə qardi.
Dəpuşiedə hır bə bandon,
bəne uvuşqınyə pambə
Poz eğandə sardi,
Olovniedə, tojə kardə çımı dardi.
Ehuriedə qədə-qədə, çı xose voş,
Bə yod omdən kanə rujon,
dılım sutdə, bedə purvoş.
Dəxısniedə, bə şığ kardə doy bınədə zardə livon,
Xıvət kardən tojə şivon;
oxo əvon iqlə ımsor vindəjone
qədə zizon, havzə livon,
jıqo zındən orəxedə dımiən çəvon
əvəsori, tovostoni şığnə şəvon.
Şiv çı zındə inən bome
əvəsor dı tovostoni,
şiv yol bəbe, puzə bəbe
bə en əvəni pozi inən zımıstoni.
Sardım bedə çımı hejo poz dəşiədə,
voş voyədə sardım bedə,
hıri vindəm bandonədə,
ehuriədə çı pozi voş, dardım bedə.
Jiqo bızın voşon voydən tılə-tılə,
lap bəçımı çaşi qılə.
Ovəyz bedən, jıqo bızın ekardedən ğır bə çaşon,
Dast peqətdə çı bandiku, dəpuşiedə hır bə çaşon.
Konco mandij çaşim ruşnə, dılim xolə, bə kovrə şij ?
Sardım bedə oxo çımı poz dəşiədə, voş voyədə,
Çımı xosə tatə həşi, çune gin bij, boçi eşij?
Dıroz bedən pozi şəvon, i tərəfoən toki, zılmot,
Fikir kardəm, han bardəni, yavə-yavə şedəm bə mot.
Dı xıvəton, dıştə dardon haşte mını coyli-coyli...
Pozi şəve, hani bəbam, sard bəqınye,
Edəyj mıni şinə moyli...
|
Башма зывыни гыбон, чама БЫЛБЫЛОН!