2014-nə sori çap bıə tolışə kitobon

Mirzəzodə Vuqar Mirzəkişi zoa (Vuqar Tolış) moəo bıə 18.06.1975-nə sori Lik rayoni Həmat diyədə. Oroxniyəşe Həmat mionə tam məktəb (1992) Xərəboği daveədə hərbi xıdmət kardəşe vəsə cəbhədə (1993-1997) Se avlodi xıvande. Bokuədə Sədərək vojoro kosibəti kardedə. “Həyf çə rujon” (Boku, MBM , 2014, 124 səh) iminə şeerə kitobış çapo beşə. “Xasay nəsli salnamə” kitobış esə boy çapədəy. 

Vuqar Mirzəzodə (Vuqar Tolış) – ın ğol (imzo) vey vaxtono oşnəy bə tırki, tolışi zıvonə bahandon. 25 sore ın cıvonə şair, bınıvışt nıvıştedə həm bə tırki, həm bə tolışi, çap bedə respublikə mətbuatədə ( “Zizə”, “Tolışi sədo”, “Tolışon sədo”...) interneti səyfonədə, deştə lirikə şeeron bahandon ən vey piyə şaire. 

“HƏYF ÇƏ RUJON” kitobi raybıdə ın sətron mıəllife. Çəy sərredaktor esə boy çəmə xanımə dodo İradə Məlikzodəy.Vuqari har şeerədə çe xanımə filoloqi dəstı-xət famə bedə. Şeeron kompüterədə qırdə kardey, korrektə kardey, de tema yəndı dumo dəvoştey kamə ko ni, yolə zəhmət kəşəşe.
Bı nezono bə bahandon edoştə bıə ın kitobədə cıvonə şair Vuqari 1991-1993-nə sorono nıvıştə şeeron qırdə kardə bıən. Kitob bə ço vırə baxş bıə: “Eşği kəşpərədə”, “Jimoni qulqulon”, “Ğəzəlon”, “Səni yaradan rəssama əhsən!” Vində bedə ki, çəy se baxş bə tolışi, i baxş esə boy bə tırki nıvıştəyonin.
Ranqbəranqə movzuon, ibrətinə məzmunə nımunəon , de poetikə mənəon ləjən bıə lirikə şeeron dığəti calb kardedən deştə soyə ləfzon, de səmimiyə ifodon...
Şəvı co nıkarde rujo,

Dardı-ğəm kaşte, ha reçin.

Çan kərə edome mijon,

Marde nahaşte, ha reçin.

... Məvot ın bebəfo dinyo,

Jıqo omə, jıqo bəşe.

Botı poş, mutə bə dılo

Hejo duyəvul bebəşe!

(“Az çiç bıkəm?”, s. 7-8)

yaxud

Göstərmə gözündə mənə yaşları,

Get gətir onları, yaşaya bilim.

Salıb qucağıma o baxışları

Səni xatırlayıb oxşaya bilim.

( “Yad baxışlar”, s. 111)

Vuqari “Jimoni qulqulon” sərlohə jiyo qırdə bıə şeeronədə Əli Nəsiri hay-haray məsə bedə, Tofiq İlhomi sutemon vəşedə, Xəlil Rza nəfəs omedə!

Lik xun pevardedə, Lankon bəmedə,

Çe Masali pur bə arsinə çəşon.

Ostoro səş noə, bə dumot şedə,

Kenə ico bəben çəmə tolışon?

(“Kenə ico bəben?”, s. 70 )

yaxud

Bu torpağın qucağında,

Kama çatan oğullarım,

Düşmən kəsib qapımızı,

Qalxın, yatan oğullarım,

( “Qalxın, yatan oğullarım”, s.118 )

In şeeron Vuqari ğələmi sıftənə nubənə əsəronin. Be bəzıne ki, şeriyəti kali normon vırədə nıbun, təqti, vəzn, ğafiyə xətoon bıbun. Əncəx bahandon təsdığ bakarden ki, Vuqar məvuji har şeerədə bə nav şedə, çəy sənətkoəti puxtə bedə. Bı cıvonə şairi poeziyə roonədə çokə ovand orzu kardəmon!

Allahverdi BAYRAMİ

Vuqar Tolışi şeerono vıjniyəon 

EŞĞIM DIVU Nİ

Bə şəv- bə ruj az vəşedəm,
Bəzıneş ın dardi peşo.
Ğəm ekardəş, peşomedəm,
Piyoləmən pure hejo.
Har dıl jıqo piyedəşni,
Tı əvı vey diye zınə.
Bı nocon i umur vəs ni,
İco bıbom az detınə.
Həmə bəştə orzu rəsdən,
Benıbəşe hiççi rıku.
Az bıştı sə çəvom, məsdən
Çe ğısməti rıki mıku.
(s.12) 

BE KƏŞ JİDƏM, DARD DİDƏM

Iştı çəşi arsi az
Vindeyədə, mardedəm.
Ehaştedəm çe dılo,
Əvoni az hışk kardedəm.
Kavuçəm çəşon hese,
Muyon çəy səpe base.
Iştı ray bəmı vəse,
Tıni deştə bardedəm.
Bə canqim de jimoni,
Bəstem çəy çanqo tıni.
Boy tı şo bıkə mıni,
Be kəş jidəm, dard didəm.
(s.13) 

AZ QINOKOR BEŞEDƏM 

Qətıme ın riz, ın ro,
Nəvəym boştı dıliro.
Bılbıl bəştə vıliro,
Az botıro vəşedəm.
In aşığ həni səy bə,
Çəşə arsonış təy bə.
Okə çe dıli kəybə,
Az bəştı dıl dəşedəm.
Az nıbom, tı bedəniş,
Ha beinsof, zındəniş?
Sıxanisə mandəniş,
Az qınokor beşedəm!
(s.13) 

HƏX-HİSOB Nİ 

Bəştə nav bınə kılo,
Diyə bikə çiç kardə?
In dınyo bıbo vılo,
Həx-hisobış omardə!
Oxoy nişe in dınyo,
Veyən məşi çe peyo.
Ruj çe şəvisə siyo,
Əyən siyo tankardə.
Ğanun dıvuyə qəpe,
Veyə pul bıbo bəpe.
Mişor mandə səy səpe,
Zıvon bekardəş, bırdə!
Dard bəsə dardi mandə,
Kəybəsə lorun handə.
Xani avlod çe zındə
Kosib vəşiku mardə!
(s. 81)