Imruj, 2014-nə sori oktyabra manqi 18-də Boku şəhərədə Tolışi i qrup ruşinfik xalqi miyonədə bə problemon, çəvon həlkarde ron muzakirə karde qorış, bə i vırə qırdə bən. Bı qırdəbemon-iclasədə Ulduz Həşimov, Seyran Dadaşov, Rabil Abdinov, Seyidəmir Məmmədov, Əli Nasir, Hamlet Vəlizadə, Bəhruz Huseynzadə, Bəxtiyar İzzətov, Etibar Ağazadə, Mehdibəy Səfərov, Vuqar Mustafayev iştirok kardıjone! 

İclasədə, dı qılə məsələ muzakirə be;

1. Imruj, bə Tolışi zıvoni, mədəniyyəti, mental irsi, ijən bə co milli-mənəvi hestemoni inkişafi mane bə əsas səbəbon, çəvon çı miyonə peqəte ron. 

2. Çı “Hirkan” jurnali sənibəton nəşr karde barədə. 

İclasədə iştirok kardəkəson həmə bı məsəlon barədə ıştə fikjon ifadə karde.

1-nə məsələ muzakirədə natiqon bı umumi fik oməyn ki, Azərbaycani hukmətədə bo Tolışi mədəniyyəti nığo doy qorış, bə xalqi ictimai navəşənon kali umion doəbujonən, dosə ımrujnə ruj çəvonədə hiç qıləjon bə vırə rosnə ni! Imən, bo Tolışi zıvoni, mədəniyyəti ijən co milli-mənəvi dəyəron inkişafi roədə ve ciddi maneon, problemon bə məydon vardə! İntasi, iclasədə ımən məxsusi qeyd bə ki, xalqi inkişafi roədə ən yolə problemon kali dəmərəsə tolışon ıştənin boştə xalqi soxtedə. Yolon votəy; “pidəjone bəvi duzkən, jəydən çaşiən bevardən!” Yəne, ıştə sinə bənə avtomati ambrazura bə nav doə, boştə xalqi kam-ve ko kardə, 5-6 kəs fədakara odəmon jı ko nıkardə, əncəx internet-vertual aləmədə bə kali pravokatoron təhqir, təhdid, şantaj kardən! De ğaydə çəvon kəşpori arıştən, əvoni çı həvəso eğandən! İclasədə, zıne-zıne, ya nızne-nızne bəştə xalqi ctimai-mədəni jiemoni ciddi mane bə jıqo odəmon veni nomonjon qəte! Bə ğəror oməyn ki, ha kəs ıştə zınə odəmi məzəmət bıkə, bə sə dənə! 

İclasi 2-nə məsələ çı “Hirkan” jurnali sənibəton nəşri həsr be. İştirakəkon bə nəticə oməyn ki, “Hirkan” Tolışi, Tırki ijən Urusi zıvonədə ədəbi, elmi, publisistik materialon dərc kardə jurnal bıbu. 

Jurnali təsisəkə Rabil Abdinovi məsləhətıj karde ki, jurnal siyasətiku deəro bıbu çoke! İclasi iştirakəkonən de fiki rozi ben. 
İclasi iştirakəkon çı jurnali Sərredaktorəti bə Mehdibəy Səfərovi, tarix şöbə bə Ulduz Həşimovi, ədəbiyyat şöbə bə Əli Nasiri, elmi məqalon şöbə bə Bəxtiyar İzzətovi, huquq şöbə bə Seyran Dadaşovi, xalqi təbobət şöbə bə Hamlet Vəlizadə, fotomuxbir şöbə bə Vuqar Mustafayevijon asparde. İclasədə bə jıqo fik oməyn ki, “Hirkan” jurnal hələ ki, ha kvartalədə i kərə beşo, məsləhəte! 

Iclasi oxiədə Mehdibəy Səfərovi çıxış karde. Əy vote; “xosə bolion, bə hiç vırəy peştpur məbəmon! Boən, hay dasti-dasti bıdəmon, ıştə xalqi tale, çəy mədəni inkişafi roədə ıştən zəhmət bıkəşəmon! Əy rostkəmon, bınəmon ıştə amonsə, nığodəmon bo nav omə nəslon! Bəştə umi bıbəmon!”

Vuqar MUSTAFEYEV