İsraili qıləy sərvəzirış heste – Nitanyahu, ve patrotə merde, həm ıştə milləti ve pidəşe, həm ıştə zıvoni ve pidəşe, həmən ve sərte, ki səhfə hərəkət bıkə, bəy tov bome, əy ıştə vırədə bənşande. Hejo fik kardedəbim ki, Xıdo boçi bəmə bənə Nitanyahu zoəş doəş ni? Məvotbən doəşe, çəmə xəbəmon ni....
D-r Hilil Məmmədovi məhkəmon
D-r Hilil Məmmədovi məhkəmon sə bin, sıxani rosti qəzetiyən tikəy di bə qornə dərcım kay ki, bə d-r Hilil Məmmədovi ozod be umum hestbe, pidəmbe bə tolışon çaşaruşni bıdəm, sentyabra manqi 27-ədə ın hukumət çəmə umi səpe qıləy xətt kəşəşe. Bə d-r Hilil Məmmədovi 5 sor ko doşone, əncəx əmə ıştə mubarizə bəbardemon, bə dınyo subut bəkardemon ki, d-r Hilil Məmmədovi ittihomon ğəlpin, bəy dəçıkyedənin. Yəne boəməro sıvıkəti ni, konco qıləy qonə ko bedə - şodoydən bə tolışon qıy, bəmə tars omedən ki, ıştə tolışətiku dast bıkəşən, əncəx əmə bəpe həmmə bə i qəv bıvotəmon: MARDE HESTE, QARDE Nİ! Çənə bənə pəsi xıyə bıkəmon ın hukumət hejo bəçəmə sə ıştə ğappozi bəje, əmə d-r Hilil Məmmədovi koədə tikəy lınqmon ğoym bə zəmin jəmone, əvon xəyli bə dumo okıryəyn, ın ğoyməti dəvom kay lozime, çəmə yolə sərkərdə Popoki votəy: jimon i ruje, əvən OZODİ! Tarsiku ozod be lozime, həmmə məxluqat bəmarde, əncəx mardeyədəən bənə merdi marde lozime. Əmə bəpe ıştə həxi - d-r Hilil Məmmədovi ozodəti ha ruj tələbkəmon, dessə bə vaxti ki, əv çı zindono beşe! Əmə bəpe jıqo bıkəmon ki, ın hukumət, bıabur nıbe qornə d-r Hilil Məmmədovi rə çı zindono vadə, əmə bımi hozomon? Az hozo, bəs şımə?
Zabil TV
Bə handakəson sıxanım doəmbe ki, qəzetədə bə Zabil TV fəaliyyəti ıştə fiki bəvotem. Çı Zabil TV iminnə nırəsə cəhət əve ki, bə həmməkəsi dıləhi qıləy sığ şodoydə, ıştənən bə ənnə zori sıği dəçıkyedə ki, şodyədə çəyku qıləy beməxə sədoən beşedə, çəy buəvılə çı Piteri osmoni eqətedə. Demim koyım ni, ıştən bəzne, demokratiyaye, ki çiçiş pidəşe – rost, du, fərğış ni, qəvo-məvo vadoydə. Əncəx bə Zabili qıləy qədə məsləhət bıdəm, Zabil, şinə bo, çı qəvo jıqo sıxan vadə ki, əv kijə nıbu, tıni pəşmon nıkə! Ha, bə mətləbi nez bem. Zabil iminnə videonədəş çımı həxədəən "de yolə hurməti” qəpış jəşbe, peşo həminə qəpon "kijə” ben, əy pəşmon kardışone. Əncəx az bə har irodi ıştə fiki votedəm, bə qornəən bə Zabili irodonən bəpe hay bıdəm. Az 3 sore tolışi qəzetədəm, həmməkəs zınedə ki, qəzeti de piyəçınəti vadoydəm, ımi hiç nyoyən kardənim, çımı de piyəçınəti qəzet vadoy bomıro ayb ni, az i kərə 2500 mənot kreditım peqətme, 1 sorisə ve qəzeti haftədə i kərə dərcım kay, qəzeti bə kioskon bekardıme, hukuməti abunəm təşkilim kay, koməkım nıbe qornə, həmən d-r Hilil Məmmədovi həbsi bə peşt çımı xarcon ve be qornə məcbur bim qəzeti manqədə 1-2 kərə dərckəm, ısət tı bəmı de ləğləği "piyəçın” votedəş, çok, əcəb kardedəş, əncəx tı bəştə nıbə vicdoni i kərə nıvote ki, az bə piyəçıni bı 3 sorədə boçi i kərə koməkəti kardəm ni? Ə piyəçın oxo tolışon dılədə kıft bastə tarsış vırt-vılo kaşe, bə tolışi hərəkət çand qılə cıvonə zoə, kinə vardışe, həminə cıvonon d-r Hilil Məmmədovi məhkəmə vədə piketon kardəşon bə nəbəyn, ısət bə d-r Hilil Məmmədovi 15 sor handəşonbe, bəştə nıbə vicdoni i kərə quş bıdən, şımə nıbə vicdon bəşmə bəvote ki, şımə de ləğləği votə "piyəçın”, "mərəzin” deştə də şıkəstə coni bo milləti bə hərəkəte, bəs əmə, co kişvərondə jiyə tolışon bəy boçi dastək bedənimon? Yəne boəməro odamə manqədə i kərə, 6 manqədə, 1 sorədə, 3 sorədə i kərə bo piyəçıni 10-15 mənot ğande çətine? Bəle, çətine, pul şinə çiye, çı dasto vamədən, ehanə de 10 mənoti kosib bəbeşon. Tı peşo bəçımı mərəzi pearış karde, əcəb karde, dyəyən ıştə votə nımojon, ıştə şə Məşəd jəy bə zəmin, çı əsl mısılmonon kitob bə mərəzinə insoni ləğləğə kay bə Xıdo koon dast dəsye təkin bə ğələm doydə, az bətı, bəştı bı qəpi sırəkəson har çi əbaxşim, ımi əbaxşnim, ıştə baxşe çı Xıdoku bıpyən, qavar ƏV bəşmə pandış doy, şımənış baxşəy. Peşo votedəş ki, qəzeti nomi dəqişkəm, tırkon sədo bınəm, ın qəzeti bə tolışon hiç aidiyatış ni, (ımi i kərə ıştı şinə bo Fərhadan votəşbe) çok, əla məsləhəte, əncəx hələm hejo bı qəzetədə beşə bəştə nıvıştəyon dyəkə kon zıvonədən? Tırkin? Iştı "Şücaəti Əli” şerə daston tırkiye, ıştı "Toponimlərimiz” tırkiye, çiç be? Qavar az bətı votəme ki, tırki bınıvışt? İjənən votedəm, çı qəvo sıxani vadyədə əy jıqo vadə ki, kijə nıbu. Iştı səpe ve mande pidəm ni. Bətı qonyəti bəkam, bə zəmin dəbəçıkyeş, əncəx bətı qıləy qədə məsləhətən bıdəm: çı Xıdoku bə camaati pand piyədə itkə, kamişəvoy boştəroən bıpi, bətı ve lozime, bəçımı votəy şıbhə kardedəbuşsə hejo bəştə kəşə videon "besədo” i kərə dyəkə...... Dyəkə, pəşmon əbıniş
Prezidenti səçın
Azərbaycanadə prezidentə səçıne, 10 xonəxo prezident be pidəşe. (əslədə 2 xonəxo prezidentəti iddiodən, ə 8 xonəxo ısətnə prezidenti TV-ədə vəkilonin) Az bı koon veyən marağin nim, əncəx həğığət ıme ki, əmə bəpe bənə milləti ıştə səçıni bıkəmon. Həmməkəs səçınədə ozode, əncəx mıku bəbəy bəşmə əvotim: Iştə sədo bə Cəmil Həsənli bıdən, bı 10 sorədə bəçəmə milləti sə omə koon əməni vadar kardedə ki, ıştə səçıni bıkəmon! Az zinə, d-r Hilil Məmmədovi məhkəmədə ıştə səçınım kame: Cəmil Həsənli!
Çəmə Nitanyahu?
Zabil boəməro anqıştə eşandə: Şımə nətəği bəjem! Az ıştə nətəğiku ve tarsedəm, Zabileyəni, iberdəmədə çəy "pandinə sə” bəqarde, pandon vılo bəben, dyə əkəni, çəmə həmmə nətəği bəje, boəməro itkəyən nətəğ onibəqəte, çiç bəkamon? Peş çəmə nətəğon jə bəpeşt Zabil bəbe Natağyahu, yəne çəmə Nitanyahu, səlom çı Tolışıstoni sərvəzir Natağyahu....
P.S. Bə handəkəson vacib ni bə Zabil TV be sədo dyə kay, bətarseşon dılətok bəbeşon.
P.S.S. Zabil, şinə bo, ım çımı "nezjə artileriya”be, ehanə çımı həxədə qəp jəy piyəy, çımı "dyərojə artileriya” bə nəzə bıstən, pandin bıbi, şinə bo, pandin.
Rafiq CƏLİLOV
Tolışın Sədo № 55
