Imruj, 2014-nə sori noyabra manqi 18-ədə, bə Tolışi məhol maştə-maştə ve qıləy qonə xəbə pevlo be! Çı Tolışi ədəbi muhitədə məxsusi vırəj bə, ıştə jiemonıj bəştə xalqi zıvoni, mədəniyyəti, folklori, adət ənənon, iyən bə co milli-mənəvi dəyəron təbliği, hifz karde sərfış kardə şair Şahmirzə Tolışəxun 59 sinədə bə Xıdo rəhmət şe.
Tolışi poeziya həvəskon bə Şahmirzə muəllimi nomi çok bələdin! Əv ve xosə inson, ləyoğətinə şəxsiyyət, mehribanə valideyn, etiborinə dust, vətənpərvərə evlad, mənəvi dınyoj zəngin bə qıləy tolışə ruşinfik be!
Ş.Tolışəxun 1955-nə sori iyulə manqi 10-də Liki rəyoni Vizəzəmin diədə moəmo bə. Əy Boku Dövlət Universitetıj sə kardəbe. Dosə ıştə umri oxiən Vizəzəminədə jiyəy, koj karde, fəaliyyətıj nışo doy!
Imruj, Şahmirzə Tolışəxuni fiziki cəhəto əmənış tərk karde. İntasi, əçəy mubarəkə xatirə çəmə xalqi – çı tolışon dılədə əbədi bəjiye! Şairi Tolışi zıvonədə bə ğələm sə, ha sətirədəj ıştə el, oba de pokə məhəbbəti, yolə hurməti tərənnomış kardə! Hiç şubhəmon ni ki, Xıdovandə-Aləm bo Şahmirzə Tolışəxuni vəştədə vırəj co kardə! Çumçıko, bənə Şahmirzə be təmənno, dıli-sıxto bəştə xalqi mental irsi, milli-mənəvi hesemoni xidmət kardə ləyoğətinə evladon çı Xəlləği-Aləmi nəzəri jiədən bedən, İnşallah!
Xıdo tıni rəhmət bıkə, Şahmirzə Tolışəxun – ey çı Tolışi mərd, ruşinfikə zoə!
Mehdibəy SƏFƏROV
