2014-nə sori çap bıə tolışə kitobon
Tolışi zıvonədə, şikilinə, ranqinə kitob çapo beşə ”Üfuq-S” MMC tərəfo Boku şəhrədə (Qanun nəşr. 2014. 38 səh. 500 tiraj). “Üfuq-S” MMC ıştə minnətdorəti rosnedə bə ın kitobi hozı kardeədə zəhmətış bıə tolışə xəlği numoyondon, məxsusən bə İradə Məlikzoda dodo.
Kitobədə de əlifbo sirə doə bıə hərfon, çəy jiyo də hərfi bino bıə cınəvon, həyvonon, pərəndon qrafikə şikil. Hırdənon de ranqinə karandaşon həminə şikli bə ranq bəkan. Ha jıqo tolışi əlifbo 29 hərf, də hərfi bino bıə 1-2 qılə conəvə, ya həyvon, ya pərəndə qrafikə şikil dəvoştə bıə. Oxeədə “Fərğon nişo bıdə” sərlohə jiyo şikilinə sujeton doə bıən. Hırdənon əvoniən bə ranq bəkarden, şifahi qəp bəjen çəvon məzmuni.Har qrafikə şikli jiyo nıvıştə bıə çəy məzmuni ifadə bıkə qıləy cumlə: Məsələn, A a ASP (aspi şikil) Aspi balə diyedə əy... yaxud B b BABD (voa eqətə bandi şikil) Voa heste bandi sədə i.c.q.
Kitobi avtor İradə xanım Məlikzoda “Tolışi zıvon” saytədə, “Tolış.org” səyfədə (http://zivon.info/index.php/tol-x-bon) nıvıştedəki, ın jurnal-kitob nəzədə qətə bıə bo hırdə sinnə əğılon. Əmma qəncon, nuperəson həm foydə pebəqəten çı kitobo. Bə vırəy mehmon şeədə, fik kardeydəm ki, ən çokə sovqate ın kitob bo hırdənon. Kitob tojə beşeədə 2-3 qılə hədiyyə bardıme deştə bə kə. 74 sinninə pıəm bəməy ın kitobi vindeədə çe şoy-şoyku. Məvuji 5-6 sinninə hırdənbe, jıqo şo bedəbe. Çə rujon həsrət vəşedəbe çəy çəş-dimədə. Pıəm bə kitobi dast dəsuye-dəsuye votedəbe:
-Esə jıqo famedəm ki, az piyəmerd ne, qədə hırdənim. Umrədəm çımı hiç jıqo tolışə ranqinə, şikilnə kitobım bıə ni. Çəmə tolışə hırdənon hərəbəxtin ki, bənə Şımə tolışduston jıqo kitobon çap kardedəyon bəvono.
Allahverdi BAYRAMİ
